Jeremiah 26

Amharic Dawro DFBE (ጌሻ ማጻፋ) No Year

← Chapter 25 Jump to: Chapter 27 →

1እዮስያሳ ናአይ ይሁዳ ካቲ እዮአቄም ኮይሮ ካተቴዳ ዎደ፥ ሀ ቃላይ መና ጎዳፐ ዬዳ።

2መና ጎዳይ ታና ሀዋዳን ያጌዳ፤ “መና ጎዳ ጎልያ ዳባባን ኤቃ። መና ጎዳ ጎልያን ጎይናናዉ ይሁዳ ካታማቱዋፐ ይያ ኡባዉ ኦዳ። ታን፥ ‘ኦዳ’ ጋደ አዛዜዳ ቃላ ኡባፐ እቱዋነ አሾፓ።

3ኦን ኤሪ፥ ኡንቱንቱ ስሲደ፥ ባረንቱ ኢታ ኦግያፐ ስማነንቶነ። ያትንቶ ታንካ ኡንቱንቱ ኦሱዋ ኢታተ ድራዉ፥ ኡንቱንታ ይሳናዉ ቆፔዳዋ አጋ ባሻና።

4“ኡንቱንቶ ኦዳ፤ መና ጎዳይ ሀዋዳን ያጌ፤ ‘ህንተ ታን ኦድያዋ ስሰናን እጾፐ፥ ታን ህንተዉ እሜዳ ህግያን ቤናን እጾፐ፥

5(ህንተ ስሰናን እጽናካ) ታን ዛራ ዛራደ ህንተኮ ኪቴዳ፥ ትምቢትያ ኦድያ ታ ቆማቱዋ ቃላ ስሰናን እጾፐ፥

6ያቶፐ ታን ሀ ጌሻ ጎልያ ሴሎዳን ኦና። ሀ ካታማካ ሳኣን ደእያ ካዉተቶ ኡባዉ ቃንገ ኦና’ ያጌ” ያጋ ያጌዳ።

7ኤርማስ መና ጎዳ ጎልያን ሀ ቃላ ኦድሽን፥ ቄሳቱ፥ ትምቢትያ ኦድያዋንቱነ አሳይ ኡባይ ስሴድኖ።

8ቃይ ኤርማስ መና ጎዳይ፥ “አሳ ኡባዉ ኦዳ” ጊደ አ አዛዜዳ ቃላ ኡባ ኦዲደ ፖሌዳ ዎደ፥ ቄሳቱ፥ ትምቢትያ ኦድያዋንቱነ አሳይ ኡባይ አ ኦይቄድኖ። ኦይቂደ፥ “ኔን ሀይቃናዉ በሳሳ!

9ኔን፥ ‘ሀ ጎሊ ሴሎዳን ሀናና፤ ቃይ ሀ ካታማይካ ባዙዋነ ኦና ግዳና’ ያጋደ፥ መና ጎዳ ሱንን አያዉ ትምቢትያ ኦዳዲ?” ያጌድኖ። መና ጎዳ ጎልያን ሺቄዳ አሳቱ ኡባይ ኤርማሳ ዶዴድኖ።

10ይሁዳ ካፓቱ ሄዋ ስሴዳ ዎደ፥ ካትያ ጎልያፐ ከሲደ፥ መና ጎዳ ጎልያ ዬድኖ። ዪደ መና ጎዳ ጎልያ ዩሹዋ ግምቢያዉ ኦራ ፐንግያ ግያ ፐንግያን ኡቴድኖ።

11ቄሳቱ ነ ትምቢትያ ኦድያዋንቱ ካፓቶነ አሳ ኡባዉ ሀዋዳን ያጌድኖ፤ “ህንተ ህንተ ሀይን ስሴዳዋዳን፥ ሀ ብታኒ ሀ ካታማ ቦላን ትምቢትያ ኦዴዳ ድራዉ፥ እ ሀይቃናዉ በሴ!” ያጌድኖ።

12ኤርማስ ካፓቶነ አሳ ኡባዉ ሀዋዳን ያጊደ ሃሳዬዳ፤ “ሀ ህንተ ስሴዳ ቃላይ ኡባይ ሀ ጎልያ ቦላነ ሀ ካታማ ቦላ፥ ‘ሀናና’ ጋደ ታን ኦዳና ማላ፥ መና ጎዳይ ታና ኪቴዳ።

13ሄዋ ድራዉ፥ ሀእ ህንተ ኦግያካ ህንተ ኦሱዋካ ላምተ፤ መና ጎዳ ህንተ ጾሳ ቃላዉ አዛዘትተ። ያቶፐ፥ መና ጎዳይ ህንተ ቦላ አሀና ጌዳ ኢታባ አግ ባሻና።

14ታና ግዶፐ፥ ታን ህንተ ኩሽያን ደአይ። ህንተዉ ሎአነ ሱረ ማለቴዳባ ታ ቦላ ኦተ።

15ህንተ ማታ ስ ባይናን እትባ ኤርተ። ህንተ ታና ዎፐ፥ ህንተ ህንተ ቦላ፥ ሀ ካታማ ቦላነ አ ግዶን አሳ ቦላ ጽሎ ሱ አጩዋ አሀና። አያዉ ጎፐ፥ ታን ሀ ቃላ ኡባ ህንተ ሀይን የጋና ማላ፥ ቱሙዋፐ መና ጎዳይ ታና ኪቴዳ” ያጌዳ።

16ካፓቱነ አሳይ ኡባይ ቄሳቶነ ትምቢትያ ኦድያዋንቶ ሀዋዳን ያጌድኖ፤ “ሀ ብታኒ ሀይቃናዉ በሰና! አያዉ ጎፐ፥ እ መና ጎዳ ኑ ጾሳ ሱንን ኑዉ ኦዴዳ” ያጌድኖ።

17ጋድያ ጭማቱዋፐካ እቱ እቱ ኤቂደ፥ ሺቄዳ አሳዉ ኡባዉ ሀዋዳን ያጊደ ኦዴድኖ፤

18“ህዝቂያስ ይሁዳን ካተቴዳ ላይን ሞረሸታፐ ዬዳ ሚክያስ ይሁዳ አሳዉ ኡባዉ ሀዋዳን ያጊደ፥ ትምቢትያ ኦዴዳ፤ ‘ኡባፐ ዎልቃማ መና ጎዳይ ሀዋዳን ያጌ፤ “ጽዮኔ ሾይቃዳን ጎሸታና። የሩሳላመ ካታማይካ ኮለቲደ፥ ሹቻ ዶርያ ግዳናዋ። ጌሻ ጎሊ ኬጸቴዳ ደሪ ዎራ ማያና” ያጌ’ ያጌዳ።

19ያትና፥ ይሁዳ ካቲ ህዝቂያስነ ይሁዳ አሳይ ኡባይ አ ዎዴ? ቱይት፥ ህዝቂያስ መና ጎዳዉ ያዪደ፥ ጾሳዉ ዋትዋቴዳ። መና ጎዳይ ባረ ኦና ጌዳ ኢታባ አግ ባሼዳ። ሽን ኑን ኑረካ ኑ ቦላ ሎይ ኢታባ አሀና ሀኔቶ” ያጌዳ።

20(ቅርያት-ይኣሪማ ግያ ሳን ደእያ ሻማእያ ናኣ ኦርዮና ግያ እት ሀራ ብታኒ ደኤ፤ እካ ኤርማስ ኦዴዳዋዳን፥ ሀ ካታማ ቦላነ ሀ ቢታ ቦላ መና ጎዳ ሱንን ትምቢትያ ኦዴዳ።

21ካቲ እዮአቄም፥ አ ኦላንቻቱ፥ አ ኦሳንቻቱ ኦርዮን ኦዴዳዋ ስሴዳ ዎደ፥ ካቲ አ ዎናዉ ኮዬዳ። ኦርዮን ሄዋ ስሲደ ያዪደ፥ ግብጼ ቢታ ባቃቴዳ።

22ግዶ ሽን፥ ካቲ እዮአቄም አክቦራ ናኣ ኤልናታናነ ሀራ አሳቱዋ ግብጼ ኪቴዳ።

23ኡንቱንቱ ኦርዮና ግብጼፐ ከሲደ፥ ካትያ ዮአቄማዉ አፌድኖ። ማሻን እ አ ዎሲደ፥ አ አሃ ጋድያ ማካናን ኦልሴዳ።)

24ሽን ሳፋና ናኣ አህቃም ኤርማሳ ማዴዳ ድራዉ፥ አሳይ አ ዎናዉ አደ እምቤና።

← Chapter 25 Jump to: Chapter 27 →