Jeremiah 33

Amharic Dawro DFBE (ጌሻ ማጻፋ) No Year

← Chapter 32 Jump to: Chapter 34 →

1ኤርማስ ብሮ ናግያዋንቱ ዳባባን ደእሺና፥ መና ጎዳ ቃላይ ላኤንዋካ ዬዳ።

2ሳኣ መዳ መና ጎዳይ፥ ጊግሲደ አ ሳኣን ዎዳ መና ጎዳይ፥ አ ሱንይካ መና ጎዳ ጌተትያዌ ታና ሀዋዳን ያጌ፤

3“ኔን ታና ጼሳ፤ ታን ነዉ ኮያና፤ ኔን ኤረና ዎጋባነ ዎልቃማባ ታን ነዉ ኦዳና።

4ባብሎናቱዋ ቢታ ዶሪታ፥ ዶደነ ማሻ ድጋና ማላ፥ ድርሳ ግምቢያ ምንሳናዉ ኮሌዳ ሀ ካታማ ጎለቱዋባነ ይሁዳ ካተቱዋ ጎለቱዋባ ታን መና ጎዳይ፥ እስራኤልያ ጾሳይ ኦዳይ።

5ህንተናና ኦለታናዉነ ታን ታ ሀንቁዋንነ ይሉዋን ሾጫና አሳቱዋ አሃ ሄ ሳአቱዋን ኩንናዉ ባብሎነቱ ገሊኖ። አያዉ ጎፐ፥ ኡንቱንቱ ኢታተ ኡባ ድራዉ፥ ታን ሀ ካታማፐ ታ ሶምኡዋ ገንድ።

6“ግዶፐነ፥ ታን ሀ ካታማነ አን ደእያ አሳ ዛራደ ፓና፤ ኡንቱንቱ ፓጻተካ ዛራና፤ ሎይ ዳሮ ሳሩዋነ ዎፓ ደኡዋ ታን ኡንቱንቶ እማና።

7ይሁዳ አሳነ እስራኤልያ አሳ ኦሞዱዋፐ ዛራደ እሻልሳና፤ ኡንቱንቱ ካሰ ደኤዳዋዳን ኦደ ታን ኡንቱንታ ግምባና።

8ኡንቱንቱ ታና ናቄዳ ናጋራ ኡባፐ ታን ኡንቱንታ ጌሻና፤ ጌሻደ ኡንቱንቱ ታና ናቄዳ ናቁዋነ ማካሌዳ ማካላ ኡባ አቶ ያጋና።

9ሄዋፐ ጉይያን፥ የሩሳላመ ካታማይ ታዉ ናሸቻ፥ ቦንቹዋነ ጋላታ ሳኣን ደእያ ካዉተቱዋ ኡባ ስንን አሀና። ታን የሩሳላመ አሳዉ ኦያ ሎኦባነ ሄ ካታማዉ አህያ ዱረተነ ሳሮተ ስሲደ፥ ካዉተቱ ኡባይ ያሻን ኮኮራና” ያጌ።

10መና ጎዳይ ሀዋዳን ያጌ፤ “ህንተ፥ ‘አሳይነ መሂ ባይና መላ ቢታ’ ጌዳ ሀ ሳአቱዋን፥ አሳይነ መሂ ባይና ይሁዳ ካታማቱዋንነ የሩሳላመ ኦገቱዋን፥ ናሸቻነ እልልሳ ኮሻይ፥

11ቡላችያዋነ ቡላቼትያን ኮሻይነ መና ጎዳ ጌሻ ጎልያ ጋላታ ያርሹዋ አሂደ፥ ሀዋዳን ያጊደ የጽያ አሳ ኮሻይ ስሰታና። “ኡባፐ ዎልቃማ መና ጎዳ ጋላትተ፤ አያዉ ጎፐ፥ እ ኬካ። አገና አ ሲቁ መናዋ” ያጊኖ። አያዉ ጎፐ፥ “ታን ኡንቱንታ ኦሞዱዋፐ ዛራደ ኡንቱንቱ ቢታ አሀና፤ ኡንቱንታ ካሰ ደኤዳዋዳን ኦደ፥ ታን እሻልሳደ ዎና” ያጌ መና ጎዳይ።

12ኡባፐ ዎልቃማ መና ጎዳይ ሀዋዳን ያጌ፤ “ሀ አሳይነ መሂ ባይና አይነ ባይና ቢታንነ አን ደእያ ካታማቱዋን ሄንንቻቱ ባረንቱ ዶርሳ ዉድያ አላጽስያ ጋዲ ደአና።

13ገዝያን ደእያ ካታማቱዋን፥ ዞዝያፐ ጋርሳና ደእያ ካታማቱዋን፥ ኔጌባ መላ ቢታን ደእያ ካታማቱዋን፥ ቢንያማ ቢታን፥ የሩሳላመ ዩሹዋን ደእያ ሄራቱዋንነ ይሁዳ ካታማቱዋን ሄንንቻቱ ባረንቱ ዶርሳ ዛረደ ፓይዱዋን። ታን መና ጎዳይ ሀዋ ኦዳይ” ያጌ።

14መና ጎዳይ ሀዋዳን ያጌ፤ “ታን እስራኤልያ አሳዉነ ይሁዳ አሳዉ ኦና ጌዳ ሎኦ ቃላ ፖልያ ጋላሳቱ ያና፤

15ሄ ጋላሳትዋንነ ሄ ዎደቱዋን ታን ዳዊታ ዛርያፐ እት ጽሎ አጫ ደንና፤ እ ሄ ቢታን ሱረ ፕርዳነ ጽሎተ ኦና።

16ሄ ዎደ ይሁዳ አሳይ አታና፤ የሩሳላመ አሳይካ ዎፑ ጊደ ደአና፤ ሀ ካታማይካ መና ጎዳ፥ ኑ ጽሎተ ያገት ጼሰታና።

17ዳዊታ ዘረፐ እስራኤልያ ካዉተ አራታን ኡትያ አሳይ ኡባካ የና።

18ሄዋዳንካ፥ ጹግያ ያርሹዋ፥ ካ ያርሾነ ሀራ ያርሹዋ ኡባ ገደ ያርሻናዉ ሌዊያ ዛርያፐ ቄስያ ግድያ አሳይ መናዉካ ታ ስንን የና። ታን መና ጎዳይ ሀዋ ኦዳይ” ያጌ።

19መና ጎዳ ቃላይ ኤርማሳኮ ዬዳ።

20መና ጎዳይ ሀዋዳን ያጌ፤ “ታን ጋላሳናነ ቃማና ቃላ ጫቁዋ ጫቀታድ፤ ሄ ጫቁዋን ኡንቱንቱ ባረንቶ ኬረቴዳ ዎድያን ስመረቴድኖ። ሄ ጋላሳነ ቃማ ጫቁዋ ህንተ ላማናዉ ዳንዳዮፐ፥

21ታን አ ዛርያፐ ካዉተ አራታን ኡታና አሳይ ኡባካ የናዳን፥ ታ ቆማ ዳዊተና ጫቀቴዳ ጫቁዋ ላማና፤ ቃይ ኡባቶ ታዉ ኦያ፥ ሌዊያ ዛረ ግድያ ቄሳቱ ዋና ጫቀቴዳ ጫቁዋካ ላማና።

22ታን ታ ቆማ ዳዊታ ዘረቱዋነ ታ ስንን ኦያ ሌዊያ ዛረ ቄሳቱ ዋ ፓይዳናዉ ዳንዳየተና ሳሉዋ ጾልንተቱዋዳንነ ማክና ዉረና አባ ሻፍያዳን ጮራያና” ያጌ።

23መና ጎዳ ቃላይ ቃይካ ኤርማሳኮ ሀዋዳን ያጊደ ዬዳ፤

24“ሀ አሳይ፥ ‘መና ጎዳይ ባረ ዶሬዳ ላኡ ካዉተቱዋ፥ እስራኤልያነ ይሁዳ አግ ባሼዳ’ ያጊደ ሃሳይያዋ ኔን አኬካበይኪ? ኡንቱንቱ ታ አሳ ካደ፥ ባረና ዳንዳዬዳ ካዉተ ከስክኖ ጊደ ቆፒኖ።

25ታን መና ጎዳይ ጋላሳናነ ቃማና ጫቀቴዳ ጫቁዋነ ሳሉዋነ ሳኣ ህግያ ምንቤናባ ግድንቶ፥

26ታን ያቆባ ዘረቱዋነ ታ ቆማ ዳዊታ ዘረቱዋ አጋ ባሻና፤ ያታቤናዋ ግድንቶ፥ አብራሃማ፥ ይሳቃነ ያቆባ ዛራቱዋ ቦላ ካተያናዉ ዳዊታ ዘረ ዶረናን አጋና። ታን ታ አሳ ማራና፤ ታን ኡንቱንታ ዛራደ እሻልሳና” ያጌዳ።

← Chapter 32 Jump to: Chapter 34 →