Jeremiah 16

Amharic Gofa GFBEVF (ጌሻ ማፃፋ)

← Chapter 15 Jump to: Chapter 17 →

1ጎዳ ቃላይ፥ ሀይሳዳ ያግሸ ታኮ ይስ፦

2“ኔኒ ማቾ ኤኮፋ፤ ማጫ ናአነ አደ ናአ ሀ በሳን የሎፓ።

3ሀ በሳን የለትያ ማጫ ናይታባነ አደ ናይታባ፥ ኤንታ የልያ አየታነ አዋታባ ጎዳይ ሀይሳዳ ያጌስ።

4ኤንቲ ኢታ ሀርገን ሀይቃና፤ ኤንታዉ ዬክያ ዎይኮ ኤንታ ሞግያ አስ በንተና። ኤንታ አሀይ ቢታ ቦላ ፕቶ መላ የገታና፤ ኤንቲ ማሻንነ ኮሻን ዉራና፤ ኤንታ አሾይ ሳሎ ካፎታስነ ሳአ ዶአታስ ካ ግዳና” ያግስ።

5“ዬሆ ኬ ገሎፓ፤ ዬካናዉ ዎይኮ ቃታናዉ ቦፓ። ታኒ ሀ አሳ ቦላፈ ታ ሳሮተ፥ ታ ሲቁዋነ ታ ማሮተ ድጋስ።

6ግትነ ጉ ሀ ቢታን ሀይቃና፤ ኤንቲ ሞገቶኮና። ኦንካ ኤንታዉ ዬከና፤ ኦንካ ባና ጋረና ዎይኮ ሁጰ ሜደትድ ካዮተና።

7ዬክያ አሳስ ሾቹ ኤፍድ፥ ኤንታራ እስፈ ምድ ኡይድ፥ ካዩዋ ባለያ አስ እሶይካ ዴና። ሀር አቶሽን፥ አይያ ዎይኮ አው ሀይቅዳ አሳካ ምንያ አስ ባዋ።”

8“ኤንታራ ማናዉነ ኡያናዉ ግብር ደእያ ኬ ገሎፓ።

9ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ፦ ‘ታኒ ኡፋይስነ እልልስ፥ ያጋኖ የ ሀ በሳፈ ድጋና። ሄሳ አሳይ ባንታ ላይንነ ባንታ አይፍያን በአና።’ ”

10“ነ ሀ ቃላ ኡባ አሳስ ኦድያ ዎደ፥ ኤንቲ፥ ‘ጎዳይ አይስ ሀይሳ መላ ኢታባ ኑ ቦላ አዋጅዴ? ኑ አይ ባልዶ? ጎዳ፥ ኑ ፆሳ ቦላ ኑ አይ ናጋራ ኦዶ?’ ” ያጋና።

11ሄ ዎደ ነ ኤንታኮ፤ “ህንተ አዋት ታና አግዳ ግሾሳ፥ ኤንቲ ሀራ ፆሳታ ካልዳ ግሾሳ፥ ኤንታዉ ኦዳነ ጎይንዳ ግሾሳ፥ ታና አግድ ታ ህግያ ናጎና እፅዳ ግሾሳ።

12ህንተ፥ ህንተ አዋታፐ አድ ኢታ ኦዳ ግሾሳ። ህንተ እሶይ እሶይ ኤሮ ጎና ህንተ ኢታ ዎዛና ካልደታ፤ ታዉ ኪተቶና እፅደታ።

13ሄሳ ግሾ፥ ታ ህንተና ሀ ቢታፈ ደንዳ፥ ህንተ ዎይኮ ህንተ አዋት ኤሮና ቢታ ሆላና። ያን ህንተ ሀራ ፆሳታ ጋላስነ ቃማ ሀጋዛና፤ ታኒ ህንተዉ ቃትከ” ያጌስ ጎዳይ።

14አሳይ፥ “እስራኤለ አሳ ግብፀ ቢታፈ ከስዳ ጎዳይ ኤርያ መላ” ያግድ ጫቆና ዎደይ ያና።

15ሄሳ አግድ፥ “ ‘እስራኤለ አሳ ፑደሀ ባጋ ቢታፈነ ኤንታ ላልዳ ቢታ ኡባፈ ዛሪድ ኤህዳ ጎዳይ ኤርያ መላ’ ያግድ ጫቃና። ታኒ ኤንታ ካሰ ኤንታ አዋታስ እምዳ ቢታ ዛራዳ ኤሀና” ያጌስ ጎዳይ።

16“ታ ሞሎ ኦይክያ ዳሮ አሳ ኪታና፤ ኤንቲ ኤንታ ኦይካና። ሄሳፈ ጉየ፥ ዳሮ ሻንካትያ አሳ ኪታና፤ ደረፐ፥ ዙማፐነ ሹቻ ቆጶፐ ኤንታ ሻንካትድ ከሳና።

17ታ አይፈይ ኤንታ ኦግያ ቦላ ደኤስ፤ ኤንቲ ታፐ ቆሰትቦኮና፤ ኤንታ ናጋራይ ታ ስንፈ ጌምቤና።

18ታ ኤንታ ኢታተነ ኤንታ ናጋራ ግሾ ኤንታዉ ናምኡ ኩሸ ዛራና። ኤንቲ አሀ ዳንያ ባንታ እፀትዳ ኤቃታን ታ ቢታ ቱንስዶሶና፤ ሻትያ ባንታ ምስለታን ታ ላታ ኩንዶሶና” ያጌስ ጎዳይ።

19አቤት ጎዳዉ፥ ታ ዎልቃዉ፥ ታ ሚፃዉ፥ መቶ ጋላስ ታ ባቃታዳ አትያ በሳዉ፥ ካዎተት ሳኣ ጋፃፐ ኔኮ ይድ፥ “ኑ አዋት ፓናነ ማዶና ዎርዶ ፆሳታ ፃላላ ላትዶሶና።

20አሳይ ባንታዉ ፆሳታ መናዉ ዳንዳኦና? ኤ፥ ኤንቲ መያኮካ ቱማ ፆሳታ ግዶኮና!” ያጋና።

21“ሄሳ ግሾ፥ ታ ኤንታ ታማርሳና፤ ታ ዎልቃነ ታ ግታተ ኤንታ ኤርሳና። ሄ ዎደ ኤንቲ ታ ሱንይ ጎዳ ግደይሳ ኤራና” ያጌስ ጎዳይ።

← Chapter 15 Jump to: Chapter 17 →