Jeremiah 8

Amharic Gofa GFBEVF (ጌሻ ማፃፋ)

← Chapter 7 Jump to: Chapter 9 →

1“ሄ ዎደ ይሁዳ ካዎታ መቀይ፥ ሀላቃታ መቀይ፥ ካህነታ መቀይ፥ ናበታ መቀይነ የሩሳላመን ደእያ አሳ መቀ ኡባይ ዱፎፐ ማፀትድ ከያና።

2ኤንቲ ሲቅዳ፥ ኪተትዳ፥ ካልዳ፥ ዞረ ኦይችዳነ ጎይንዳ አዋ፥ አጌናነ ሳሎ ፆልንቶታ ኡባ ስንን ምጨታና። ኤንታ መቀይ ሺቀና ዎይኮ ሞገተና፤ ሽን ቢታ ቦላ ፕቶ መላ የገታና።

3ታ ላልዳ በሳታን ደእያ፥ ሀ ኢታ ካዎተፈ አትዳ አሳ ኡባይ ደኦፐ ሀይቆ አሞታና” ያጌስ ኡባፈ ዎልቃማ ጎዳይ።

4ጎዳይ ሀይሳዳ ያጌስ ጋዳ ኦዳ፦ “እስ አስ ኩንድኮ፥ ስሚድ ደንደነዬ? ዎይኮ እስ አስ ኦገ ባለትኮ ጉየ ስመነዬ?

5ያትን፥ ሀ አሳይ አይስ ጉየ ስምዴ? የሩሳላመይ አይስ ኡባ ዎደ ኦገ ባሌቲ? ኤንቲ ጭሞ ባቅድ ኦይክዶሶና፤ ስሞና እፅዶሶና።

6ታ ምንዳ ሀይዛስ፤ ሽን ኤንቲ ቱማ ሃሳዮኮና። ‘ታ አይ ኦድና?’ ግድ ባ ኢታ ናጋራ ፓፀይ እሶይካ ባዋ። ኡባይ ኦላስ ጋላብያ ፓራዳ ባዉ ባዉ ዎፄስ።

7ሀር አቶሽን፥ ሃ ካፎት ባንታ ዎድያ ኤሮሶና፤ ሆለት፥ ካሮትነ ማስቃላ ካፎት ባንታ ስምያ ዎድያ ናጎሶና፤ ሽን ታ አሳይ ጎዳ ዎጋ ኤሮኮና።

8“ያትን ዋንድ፥ ‘ጎዳ ህገይ ኑራ ደእያ ግሾ ኑ ጭንጫ’ ጋናዉ ዳንዳኤቲ? ዎርዳንቾ ፃፈት ታ ህግያ ዎርዶ ከስዳይሳ በኤከቲ?

9ጭንጫት ዬላታና፤ ኤንቲ ካዉያናነ ኦይከታና። ኤንቲ ጎዳ ቃላ እፅን፥ ኤንታዉ አይ ጭንጫተ ደኢ?

10ሄሳ ግሾ፥ ታ ኤንታ ማቸታ ሀራታስ፥ ኤንታ ጎሻ አላጋ አሳስ እማና። ጉፈ ግታ ጋካናዉ በሶና ጎአስ ዪቀቶሶና። ናበትነ ካህነት ኡባይ አሳ ጭሞሶና።

11ኤንቲ ታ አሳ ማዱን ላፋ ግድ፥ ጉ ለ ዎሶና። ሳሮይ ባይናሽን ‘ሳሮ፥ ሳሮ!’ ያጎሶና።

12ሀ ሻትያ ኦሱዋ ኦሸ፥ ኤንቲ ዬላትዶና? አካይ፥ ኤንቲ አይኮካ ዬላትቦኮና። ኤንቲ ዬል አይበኮ ኤሮኮና። ሄሳ ግሾ፥ ኤንቲ ኩንድዳይሳታ ግዶን ኩንዳና፤ ኤንቲ ሴረትያ ዎደ ካዉያና።

13ኤንታ ጎሻ አይፍያ ታ ኤንታፈ ኤካና። ኤንታ ዎይነ አይፈይ ያና፤ ባላሰ ም አይፈይ በንተና። እያ ቦንጮይ ሹላና፤ ታ ኤንታዉ እምዳባ ኤንታፈ ኤካና” ያጌስ ጎዳይ።

14አሳይ ዛሪድ ሀይሳዳ ያጎሶና፦ “ኑ ስእ ግድ አይስ ኡታኔ? አነ ሺቅተ፤ ግምበትዳ ካታማታ ገልድ ያን ሀይቃና። ጎዳይ ኑ ፆሳይ ኑና ሀይቆስ አድ እሚስ። ኑ እያ ቦላ ናጋራ ኦዳ ግሾ፥ ኑ ዎያ ሃ ኡያና መላ ኦስ።

15ሳሮተ ኡፋይሳን ናግዳ፤ ሽን ሎኦባይ ይቤና። ኑ ፓፆ አሞትዳ፤ ሽን ዳጋማ ግድስ።

16ሞርከ ፓራ ጋርማሞይ ዳነ ካታማን ስኤቴስ፤ ኤንታ ኮርማ ፓራታ ጫገን ቢት ቃፄስ። ኤንቲ ቢታነ ቢታን ደእያባ ኡባ፥ ካታማነ ካታማን ደእያ አሰ ኡባ ምድ ይሳናዉ ይዶሶና።

17ታኒ ሾሻታ ህንተ ግዶ የዳና። ብት ተቃናዉ ዳንዳኦና ሀሶ ሾሻታ ህንተ ግዶ የዳና፤ ኤንቲ ህንተና ዱካና” ያጌስ ጎዳይ።

18ታ አዛኑዋስ ምንይ ባዋ፤ ታ ዎዛናይ ትልእስ።

19ታ አሳይ ሃሆ ቢታን ዋስያ ዋሱዋ ስእተ። ኤንቲ፥ “ጎዳይ ፅዮነን ባዌ? ሀ ፅዮነ ካዎይ ዛሪድ ያን ዴኔ?” ያግድ ዋሶሶና። ጎዳይ ኤንታ ካዎይ፥ “ኤንቲ ባንታ መዳ ምስለታን፥ ባንታ ፓና አላጋ ኤቃታን ታና አይስ ይሎይዶና?” ያግስ።

20አሳይ ዛሪድ፥ “ሄኮ ጫካ ዎደይ አስ፤ ቦነይ ዉርስ፤ ኑኒ አትቦኮ” ያግድ ዋሶሶና።

21ታ አሳይ ማዱንፅዳ ግሾ፥ ታ ዎዛናይካ ማዱንፅስ። ታ ካዮታስ፤ ያሽ ታና ኦይክስ።

22ጋላዳን ትየትያ ለይ ባዌ? ያን አክመይ ዴኔ? ያትን፥ ታ አሳ መቆይ አይስ ፓፀኔ?

← Chapter 7 Jump to: Chapter 9 →