Jeremiah 18

Amharic Gofa GFBEVF (ጌሻ ማፃፋ)

← Chapter 17 Jump to: Chapter 19 →

1ጎዳፐ ኤርምያሳኮ ይዳ ቃላይ ሀይሳ፦

2“ደንዳዳ ኡርቃ መያ አድያ ሶ ባ። ያን ታ ነና ታ ቃላ ስሳና” ያግስ።

3ታኒ ዱገ ኡርቃ መያ አድያ ሶ ባዳ፥ እ ባ ገርቱዋ ቦላ ኡርቃ መሽን በአስ።

4እ መሽን፥ ሄ ሚሸይ እያ ኩሸን ኢትስ። እ ሄ ኡርቃ ዛሪድ ሙኑቅድ፥ ባና ሎእያ ሀራ ሚሸ ከስድ መስ።

5ሄ ዎደ ጎዳ ቃላይ፥ ሀይሳዳ ያግሸ ታኮ ይስ፦

6“እስራኤለ አሳዉ፥ ኡርቃ መያ አደይ ኦይሳዳ ታ ህንተና ኦናዉ ዳንዳእክና? እስራኤለ አሳዉ፥ ኡርቃይ ባና መይሳ ኩሸን ደኤይሳዳ፥ ህንተካ ታ ኩሸን ደኤታ።

7እስ ካዎተ ዎይኮ እስ ደረይ ሾደታና መላ፥ ላለታና መላነ ያና መላ ታ ኦድዳ ዎደ፥

8ሄ ካዎተይ ባ ኢታተፈ ስምኮ፥ ታ ኤንታ ቦላ ኤሀና ግዳ ኢታባ ኤሆና አጋጋና።

9ቃስ ሀራ ዎደ እስ ደርያ ዎይኮ ካዎተ፥ ‘ታ ህንተና ኬፃናነ ቶካና’ ጋዳ ኦድዳ ዎደ፥

10ሄ ካዎተይ ታ ኦደይሳ ስኦና እፅድ፥ ታ ስንን ኢታባ ኦኮ፥ ታ ኦና ግዳ ሎኦባ ኦና አጋጋና።

11“ሄሳ ግሾ፥ ይሁዳ አሳስነ የሩሳላመን ደእያ አሳስ ሀይሳዳ ያጋ። ታኒ ህንተዉ ዮ ጊግሳይስነ ኢታባ ሀልቻይስ። ህንተ ኡባይ ህንተ ኢታ ኦግያፐ ስምተ፤ ህንተ ኦግያነ ህንተ ኦሱዋ ላምተ።

12ሽን ኤንቲ፥ ‘ሀይስ አይኮካ ማደና! ኑኒ ኑ ቆፋዳ ሀናና፤ ኑ እሶይ እሶይ ኑ ኢታ ዎዛና ካላና’ ያጋና” ያግስ።

13ሄሳ ግሾ፥ “ጎዳይ፥ ‘ሀይሳ መላባ ስእ ኤሬቲ?’ ያግድ ካዎተታ ኦይችተ። ጌላኦ ግድዳ እስራኤለይ ዳሮ ሻትያባ ኦሱ።

14ልባኖሰ ዙማ ቦላ ደእያ ሻቻይ፥ ዛላ ቦላፈ ይድ ኤሪ? ሄ ዙማፐ ጎግያ እርፃ ሃ መል ኤሪ?

15ሽን ታ አሳይ ታና ዶግዶሶና፤ ፓና ፆሳታስ እፃነ ጩይስዶሶና። ባንታ ኦግያፐ፥ ባንታ በን ኦግያፐ፥ ጋፃ ከይድ በትዶሶና።

16ኤንቲ ባንታ ቢታ ባይሳነ ካትዳባ ከስዶሶና። ያራ አያ ኦንካ ማላለትድ ባ ሁጵያ ቃስ።

17ባን ዶሎሀ ባጋ ጫርኩዋን ላለተይሳ መላ፥ ታኒ ታ አሳ ሞርከታ ስንን ላላና። ኤንታ መቱዋ ጋላስ ታ ኤንታዉ ዞኮ ዛራናፐ አትሽን፥ ታ ሶምኡዋ ኤንታ በስከ” ያጌስ ጎዳይ።

18አሳይ፥ “ካህነታ ማታን ህገይ፥ ጭንጫታ ማታን ዞረይ፥ ናበታ ማታን ቃል ዮና ግሾ አነ ኤርምያሳ ቦላ ማቀቶስ። ኑ እንፃርሳን ኦይኮስ፤ እ ኦድያ ቃላ ስኦና እፃና” ያግዶሶና።

19አቤት ጎዳዉ፥ ታና ስአ፤ ታ ሞርከት ታ ቦላ ግያባ ሀይዛ።

20ሎኦ ኦዳ አሳስ ዛሮይ ኢተዬ? ሽን ኤንቲ ታዉ ኦላ ቦኮሶና። ነ ሀንቆይ ኤንታፈ ስማና መላ ታ ኤንታ ግሾ ጋናተይሳ በአ።

21ሄሳ ግሾ፥ ኤንታ ናይታ ኮሻስ አዳ እማ፤ ኤንታ ማሻስ አዳ እማ። ኤንታ ማቸት ናእ ባይናይሳታነ አምኦ ግዶ። ኤንታ አደት ዎያ ሀርገን ጋሄቶና፤ ኤንታ ናአተት ኦላን ዉሮ።

22ኤንቲ ታና ኦይካናዉ ኦላ ቦክዳ ግሾነ ታ ቶሁዋስ ፅሄ ዎዳ ግሾ፥ ቆፖና ቦንቀይሳታ ኤንታ ቦላ የዳ፤ ኤንታ ኬን ዋሶይ ከዮ።

23ሽን አቤት ጎዳዉ፥ ኤንቲ ታና ዎናዉ ማቀተይሳ ነ ኤራሳ። ነ ኤንታ ኢታተ አቶ ጎፓ ዎይኮ ኤንታ ናጋራ ነ ስንፈ ቁቾፋ። ኤንቲ ነ ስንን ፆነትድ ኩንዶ፤ ነ ሸነትያ ዎደ ኤንታ ሀይሳዳ ኦ።

← Chapter 17 Jump to: Chapter 19 →