Jeremiah 44

Amharic Gofa GFBEVF (ጌሻ ማፃፋ)

← Chapter 43 Jump to: Chapter 45 →

1ግብፀን ምግዶላ፥ ፃፍናሳ፥ መምፕሳነ ጳትሮሳ ቢታን ደእያ አይሁደታስ ጎዳ ቃላይ ኤርምያሳኮ ሀይሳዳ ያግድ ይስ።

2“ኡባፈ ዎልቃማ ጎዳይ፥ እስራኤለ ፆሳይ፥ የሩሳላመ ቦላነ ይሁዳ ካታማ ኡባ ቦላ ታ ኤህዳ ዮ ኡባ ህንተ፥ ህንተ አይፈን በእደታ። ኤንቲ ሀች ጋካናዉ ላለትድ አትዶሶና፤ ኦንካ ያን ዴና።

3ሄስ ሀንዳይ፥ ኤንቲ ኢታ ኦሶ ኦድ፥ ታና ሀንቀዳ ግሾሳ። ኤንቲ ዎይኮ ህንተ ዎይኮ ህንተ ማይዛት ኤሮና ሀራ ፆሳታስ እፃነ ጩይስድ ኤንታዉ ጎይንዶሶና።

4‘ታ እፅያ ሀይሳ መላ ኢታባ ኦፕተ’ ያግድ ኦዳና መላ ዛራ ዛራ ታ አይለታ፥ ናበታ ኪታስ።

5ግዶሽን፥ ኤንቲ ስኦና ዎይኮ አኬኮና እፅዶሶና። ሀራ ፆሳታስ እፃነ ጩይስያ ኢታ ኦሱዋ አጎና እፅዶሶና።

6ሄሳ ጋሶን ታ ሱልያ ሀንቆይነ ይሎይ ይሁዳ ካታማታ ቦላነ የሩሳላመ ኦገታን ኤፅስ። ኤንቲ ሀች ህንተ በኤይሳዳ ላለትዶሶና፤ ባይሳ ግድዶሶና።

7“ሀእካ ጎዳይ፥ ኡባፈ ዎልቃማ ፆሳይ፥ እስራኤለ ፆሳይ፥ ሀይሳዳ ያጌስ፤ ህንተ ኮቻይ አቶና መላ፥ ማጫሳ፥ አደታ፥ ናይታነ ዮጋ ናይታ ይሁዳ ቢታፈ ይሳናዳ ኢታባ ህንተ፥ ህንተ ቦላ አይስ ኦቲ?

8ህንተ ዳናዉ ይዳ ግብፀ ቢታን ሀራ ፆሳታስ እፃነ ጩይስድ ታና አይስ ሀንቀቲ? ሳአን ደእያ ካዎተታ ኡባ ግዶን ባደስነ ቦረስ አትድ፥ ህንተና ይሳናዉ አይስ ኮዬቲ?

9ካሰ ህንተ አዋት፥ ይሁዳ ካዎትነ ኤንታ ማቸት፥ ህንተነ ህንተ ማቸት ይሁዳ ካታማታንነ የሩሳላመ ኦገታን ኦዳ ኢታ ኡባ ዶግደትዬ?

10ህንተ ሀች ጋካናዉ ህንተናተ ካዉሽበከታ፤ ታና ቦንችቤከታ። ታ ህንተዉነ ህንተ ማይዛታስ እምዳ ህግያነ ዎጋ ካልበከታ።

11“ሄሳ ግሾ፥ ኡባፈ ዎልቃማ ጎዳይ፥ እስራኤለ ፆሳይ፥ ሀይሳዳ ያጌስ፤ ታ ህንተና፥ ይሁዳ ዘርታ ኡባ ይሳናዉ ቆፋ ቃቻስ።

12ይሁዳን አትዳ አሳ ግዶፈ፥ ግብፀ ብድ፥ ያን ዳናዉ ቆፋ ቃችዳይሳታ ታ ይሳና። ኤንቲ ኡባይ ግብፀን ዉራና፤ ኦላንነ ኮሻን ሀይቃና። ግታፐ ጉ ጋካናዉ ደእያ ኡባይ ኦላንነ ኮሻን ያና። ኤንቲ ዳጋማስ፥ ጫሻስ፥ ባደስነ ሚቻስ አታና።

13ታ የሩሳላመ፥ ኦላን፥ ኮሻንነ ቦሻን ሴርዳይሳዳ ግብፀ ቢታን ደኤይሳታ ሴራና።

14አትዳ ይሁዳ አሳፐ ግብፀ ብድ ደኤይሳት ግብፀታ ኩሽያፐ ፖሎ ከስ ኤኮኮና። ኤንቲ ስሚድ ዳና ግድ አሞትያ ይሁዳ ቢታ አይ አስካ ስመና። ጉ አሳፐ አትሽን፥ ኦንካ ስሚድ ዬና” ያግስ።

15ኤንታ ማቸት ሀራ ፆሳታስ እፃነ ጩይሰ ኤርያ አደይ ኡባይ፥ ያን ደእያ ማጫሳ ኡባይነ ግታ ማባራ ግድድ፥ ግብፀንነ ጳትሮሳን ደእያ አሳ ኡባይ ኤርምያሳኮ ሀይሳዳ ያግዶሶና።

16“ኔኒ ጎዳ ሱንን ኑስ ኦድያባ ኡባ ኑ ስኦኮ።

17ኑ ኦና ግድ ቆፕዳባ ኡባ ኦና። ኑኒ፥ ኑ ማይዛት፥ ኑ ካዎትነ ኑ ሀላቃት ይሁዳ ካታማታንነ የሩሳላመ ኦገታን ካሰ ኦዳይሳዳ ሳሎ ካውዉ ጌተትያርስ ኑ ፆሴስ እፃነ ጩይሳና፤ ኡሻ ያርሹዋ እዉ ጉሳና። ኑ ካሰ ሄሳ ኦያ ዎደ፥ ኑስ ዳሮ ካ ደኤስ፤ ሄ ዎደ ኑስ ሳእ ኬሀ፤ ኑና አይብካ መትቤና።

18ሽን ሳሎ ካዌስ እፃነ ጩይሰይሳነ ኡሻ ያርሾ ጉሰይሳ አግዳፐ ጉየ፥ ኑስ ኡባባይ ፓጭስ፤ ኑ ኦላንነ ኮሻን ዉርዳ” ያግዶሶና።

19ማጫሳት ጉጅድ፥ “ኑ ሳሎ ካዌስ ማላን ኡይ ኡክያ ዎደ፥ እፃነ ጩይስያ ዎደነ ኡሻ ያርሾ እዉ ጉስያ ዎደ ኑ አዝናት ኤሮና ደእሽን፥ ኑ ኦዳባይ አይብካ ባዋ” ያግዶሶና።

20ሀይሳዳ ያግድ ዛርዳ አሳ ኡባስ፥ ማጫሳስነ አደታስ፥ ኤርምያስ ሀይሳዳ ያግስ፤

21“ህንተነ ህንተ ማይዛት፥ ህንተ ካዎትነ ህንተ ሀላቃት፥ ቢታን ደእያ አሳ ኡባይ፥ ይሁዳ ካታማታንነ የሩሳላመ ኦገታን እፃነ ጩይስዳይሳ ጎዳይ ኤረና ዎይኮ ዶግስ ግድ ቆፔቲ?

22ህንተ ኦያ ኢታነ ሻትያ ኦሱዋ ጎዳይ ስእ ጋናዉ ዳንዳእቦና ግሾ፥ ህንተ ቢታ ሀች ህንተ በኤይሳዳ ላለትዳ፥ ባይሳነ ባደትዳ ቢታ ኦስ።

23ሀ ዮ ኡባይ ህንተና ጋክዳይ፥ ህንተ ሀራ ፆሳታስ እፃነ ጩይስዳ ግሾሳ፥ ጎዳ ቦላ ናጋራ ኦዳ ግሾሳ፥ ጎዳ ቃላ ስኦና እፅዳ ግሾሳነ እያ ህግያ፥ እያ ዎጋነ አዋጁዋስ ኪተቶና እፅዳ ግሾሳ” ያግስ።

24ሄሳፈ ጉየ፥ ኤርምያስ አሳ ኡባስነ ማጫሳስ ሀይሳዳ ያግስ፤ “ህንተኖ፥ ይሁዳፐ ይድ፥ ግብፀ ቢታን ደእያ አሳዉ፥ ጎዳይ ግያባ ስእተ።

25ኡባፈ ዎልቃማ ጎዳይ፥ እስራኤለ ፆሳይ፥ ሀይሳዳ ያጌስ፤ ህንተነ ህንተ ማቸት፥ ‘ኑኒ ሳሎ ካዌስ እፃነ ጩይሳና፤ ኡሻ ያርሹዋ እዉ ጉሳና’ ግድ ጫቅዳ ጫቁዋ ፖልድ፥ ኦሶን በስደታ። ህዛ፥ ጉየ ጎፕተ፤ ህንተ ጫቁዋ ፖልተ።

26“ግዶሽን፥ ህንተኖ፥ ግብፀ ቢታን ደእያ ይሁዳ አሳዉ፥ ጎዳይ ግያባ ስእተ! ጎዳይ ሀይሳዳ ያጌስ፤ ‘ህዛፐ ጉየ ግብፀ ቢታን ደእያ ይሁዳ አሳፐ እሶይካ ታ ሱንን፥ “ኡባ ሃርያ ጎዳይ ኤሮ” ’ ግድ ጫቆና መላ ታ ግታ ሱንን ጫቃስ።

27ታ ኤንታ ቦላ ሎኦባ ግዶናሽን፥ ኢታባ ኤሀናዉ ምናይስ። ግብፀን ደእያ ይሁዳ አሳይ ዉራና ጋካናዉ ኦላንነ ኮሻን ሀይቃና።

28ኦላፐ አትዳ ጉ አሳት ግብፀፈ ይሁዳ ስማና። ሄ ዎደ ግብፀን ደእያ ይሁዳ አሳይ፥ ታ ቃላፐነ ኤንታ ቃላፐ አዉስ ቱሜኮ ኤራና።

29ታ ህንተና ሀ በሳን ሴርያ ዎደ፥ ‘ታ ህንተ ቦላ ኢታባ ኤሀና’ ግዳይስ ቱማ ግደይሳስ ታ ህንተዉ ማላታ እማና።

30ታ ይሁዳ ካዋ ሰደቅያሳ እያዉ ሞርከ ግድድ፥ እያ ዎናዉ ኮይያ ባብሎነ ካዋ ናቡካዳናፆራስ አዳ እምዳይሳዳ ግብፀ ካዋ ሆፍራ እያ ዎናዉ ኮይያ እያ ሞርከታስ አዳ እማና” ያጌስ ጎዳይ።

← Chapter 43 Jump to: Chapter 45 →