Jeremiah 39

Amharic Gofa GFBEVF (ጌሻ ማፃፋ)

← Chapter 38 Jump to: Chapter 40 →

1ሰደቅያስ ይሁዳን ካዎትዳ ኡዱፉን ላይን፥ ታማን አጌናን፥ ባብሎነ ካዎይ ናቡካዳናፆርነ እያ ኦላንቾት ኡባይ ይድ፥ የሩሳላመ ተቅዶሶና።

2ሰደቅያስ ካዎትዳ ታማነ እስን ላይን፥ ኦይዳን አጌናን፥ ኡዱፉን ጋላሳን ባብሎነ ኦላንቾት ካታማ ግምብያ መንዶሶና።

3ሄ ዎደ ባብሎነ ካዋ ሀላቃት፥ ኤርጋል-ሳራስራ፥ ሳምጋር-ናቦ፥ ሳርሳክማነ ኤርጋል-ሳራስራ ጌተተይሳት ሀራ ዳሮ ሀላቃታራ እስፈ ይድ ግዶ ፐንገ ጌተትያ በሳን ኡትዶሶና።

4ይሁዳ ካዎይ ሰደቅያስነ እያ ኦላንቾት ኡባይ ባብሎነ ኦላንቾታ በእዳ ዎደ ባቃትዶሶና። ቃማ ካታማፐ ከይድ፥ ካዋ አታክልተ በሳ ኤፍያ ኦግያራ፥ ናምኡ ድርሳ ግምበታ እስፈ ጋያ ፐንግያራ ከይድ ዮርዳኖሰ ዛንጋራኮ ስሚድ ብዶሶና።

5ግዶሽን፥ ባብሎነ ኦላንቾት ኤንታ የደድ፥ እያርኮ ደምባ ጋሸ፥ ሰደቅያሳ ኦይክዶሶና። ሀማታ ቢታን፥ እርብላ ካታማን ደእያ ካዋ ናቡካዳናፆራኮ ኤፍዶሶና። ካዎይ ናቡካዳናፆር ያን ሰደቅያሳ ቦላ ፕርድስ።

6ባብሎነ ካዎይ፥ ሰደቅያሳ አደ ናይታ እያ ስንን፥ እርብላ ካታማን ዎስ፤ ቃስ ይሁዳ ሀላቃታ ኡባ ዎስ።

7ሰደቅያሳ አይፈታ ዎጭ ከስድ፥ እያ ባብሎነ ቢታ ኤፋናዉ ሳንላታን ቃችስ።

8ባብሎነ ኦላንቾት ካዎ ጋነ አሳይ ደእያ ኬ ኡባ ታማን ፁግዶሶና፤ የሩሳላመ ግምብያካ ላልዶሶና።

9ካዋ ናገይሳታ ሀላቃይ ናቡዛርዳን ካታማን አትዳ አሳነ ካድድ እያኮ ይዳ አሳ ኡባ ድእድ ባብሎነ ቢታ ኤፍስ።

10ካዋ ናገይሳታ ሀላቃይ ናቡዛርዳን አይኮካ ባይና ጉ ማንቆታ ይሁዳን አግድ፥ ኤንታዉ ዎይነ ጋደነ ጎሻ ጋደ እሚስ።

11ናቡካዳናፆር፥ ካዋ ናገይሳታ ሀላቃ ናቡዛርዳና ሀይሳዳ ያግድ ኪትስ፦

12“ባዳ ኤርምያሳ ኮያ ደማዳ፥ እያዉ ኮሽያባ ኡባ ኦ፤ እያ ቦላ ሀራ ኢታባ አይኮካ ኦፋ” ያግስ።

13ሄሳ ግሾ፥ ናቡዛርዳን፥ ናቡሻዝባና፥ ኤርጋል-ሳራስራነ ባብሎነ ካዋ ሀላቃታ ኡባ ኪትድ፥

14ኤርምያሳ ቃሸትድ ደእያ፥ ናገይሳታ ዳባባፐ ከስዶሶና። ባ ሶ ኤፍድ ዎና መላ ሳፋና ናኣ፥ አክቃማ ናኣ ጎዶልያስ ሀዳራ እምዶሶና። ሄሳ ጋሶን፥ ኤርምያስ ባ ቢታ አሳራ እስፈ ደእስ።

15ኤርምያስ ናገይሳታ ዳባባን ቃሸትድ ደእሽን፥ ጎዳ ቃላይ እያኮ ሀይሳዳ ያግድ ይስ።

16“ባዳ፥ ቶጰ አድያ ኤበመለካኮ ሀይሳዳ ያጋ፦ ‘ኡባፈ ዎልቃማ ጎዳይ፥ እስራኤለ ፆሳይ፥ ሀይሳዳ ያጌስ፦ ህዛፐ ጉየ ታ ኦድዳይሳዳ ሀ ካታማ ቦላ ሎኦባ ግዶናሽን፥ ዮ ኤሀና። ሄስ ኡባይ ሀንያ ዎደ ነ ሀ ካታማን ኡታዳ፥ ነ አይፈን በአና።

17ግዶሽን፥ ሄ ጋላስ ታ ነና አሻና፤ ነ ያይያ፥ ነ ሞርከታ ኩሸን አዳ እምከ።

18ታ ነና ፖሎ አሻና፤ ነ ኦላን ሀይቃካ፤ ነ ታናን አማነትዳ ግሾ፥ ሀይቆፐ አታና’ ” ያጌስ ጎዳይ።

← Chapter 38 Jump to: Chapter 40 →