Jeremiah 30

Amharic Gofa GFBEVF (ጌሻ ማፃፋ)

← Chapter 29 Jump to: Chapter 31 →

1ጎዳፐ ኤርምያሳኮ ይዳ ቃላይ ሀይሳ።

2“ኤርምያሳ፥ ታ ነዉ ኦድዳ ቃላ ኡባ ፃ ማፃፋን ፃፋ።

3ታኒ ታ አሳ እስራኤለነ ይሁዳ ድኦፐ ጉየ ዛርያ ዎደይ ማታትስ። ኤንታ ማይዛታስ እምዳ ቢታ ኤንታ ዛራና፤ ኤንቲ እያ ላታና” ያጌስ ጎዳይ እስራኤለ ፆሳይ።

4ጎዳይ እስራኤለባነ ይሁዳባ ኦድዳ ቃላይ ሀይሳ።

5“ታ ያሻነ ዳጋማ ዋሶ ስአስ፤ ዳጋማ ዋሶፐ አትሽን፥ ሳሮ ዋሶ ግደና።

6አነ ኦይችተ፤ በእተ፤ አደይ ናአ የላናዉ ዳንዳኢ? ያትን፥ አደ ኡባይ እቀ ኦይክዳ ማጫሳዳ፥ ባ ኩሸን ባ ኡሉዋ ኦይክዳሽን ታ በኤይስ አይቤ? አሳ ኡባ ሶምኦይ አይስ ካሬፅዴ?

7ሄ ጋላሳይ አይ መላ ኡንኤያ ጋላሴ? ሄሳ መላ ጋላስ ባዋ። ሄ ጋላሳይ ያይቆባ ዘረስ ኡንአ ዎደ ግዳና። ግዶሽን ኤንቲ ሄ ኡባፈ አታና” ያጌስ ጎዳይ።

8ኡባፈ ዎልቃማ ጎዳይ ሀይሳዳ ያጌስ፦ “ሄ ጋላሳን ታ ኤንታ ጋናፈ ቃምባራ መንና፤ ኤንቲ ቃሸትዳ ሳንላታ ዱና። ሄሳፈ ጉየ፥ አላጋ ቢታ አሳይ ኤንታ አይለየና።

9ሽን ኤንቲ ጎዳስ፥ ባንታ ፆሳስ፥ ኦና፤ ታ ኤንታዉ ደንያ ካዋ ዳዊታስ ሃረታና።

10“ሄሳ ግሾ፥ ታ አይለቶ፥ ያይቆባ ኮቻቶ፥ ያዮፍተ። ህንተኖ፥ እስራኤለቶ፥ ዳጋሞፕተ። ህንተ ሃሆ በሳን ደእሽን፥ ታ ህንተና አሻና፤ ህንተ ኮቻታ ኤንቲ ድኤትዳ ቢታፈ ዛራና። ያይቆባ ዛረት ስሚድ፥ ሳሮ ዳና፤ ኤንታ ኦንካ ያሽሰና።

11ታ ህንተና አሻናዉ ህንተራ ደአይስ። ህንተና ላልዳ ካዎተታ ኡባ ይሳና፤ ሽን ህንተና ይስከ። ታ ህንተና ፅሎ ፕርዳን ሴራና፤ ሽን ሴሮና ህንተና ጮ የድከ” ያጌስ ጎዳይ።

12“ህንተ መቆይ ኮለተና፤ ህንተ ማዱንይ ፓፀና።

13ህንተዉ ሞተተይ ባዋ፤ ህንተ ማዱንስ ለይ ዴና፤ ህንተዉ ፓፆይ ባዋ።

14ህንተ ዶሰይሳት ህንተና ዶግዶሶና፤ ኤንቲ ህንተባ ዉዳ ጎኮና። ህንተ ባላይነ ህንተ ናጋራይ ዳሮ ግድያ ግሾ፥ ታ ህንተና ሞርከዳ ሾጫስ፤ ቃይ ባይና ሴራስ።

15ፓፆይ በንቶና ህንተ ሀርግያስነ ህንተ ማዱንስ አይስ ዋሰቲ? ህንተ ባላይነ ህንተ ናጋራይ ዳርዳ ግሾ ታ ሀይሳ ህንተ ቦላ ኦስ።

16“ሽን ህንተና ጋሽድ ምዳ ኡባይ ሜተታና፤ ህንተ ሞርከት ኡባይ ድኤታና። ህንተና ቦንቅዳይሳት ቦንቀታና፤ ህንተባ ኤክዳይሳት ኤከታና።

17ኤንቲ፥ ‘ኦንካ ኮዮናነ ቦረትዳ ፅዮነ’ ግዶሶና፤ ሽን ታ ህንተዉ ኬሀና፤ ህንተ ማዱን ፓና” ያጌስ ጎዳይ።

18“ያይቆባ ኮቻታ ድኤትዳ በሳፈ ጉየ ዛራዳ፥ ኬፃና፤ ኤንቲ ደእያ በሳስካ ቃታና። የሩሳላመ ካታማይ ካሰ ባ ላለትዳ በሳን፥ ካዎ ጋይ ካሰ ባ በሳን ስሚድ ኬፀታና።

19ያን ደእያ አሳ ኡባይ ጋላታ ማዝሙረነ ኡፋይሳ የ የፃና። ታ ኤንታ ታይቡዋ ዳርሳናፐ አትሽን፥ ጉፀና። ታኒ ኤንታ ቦንቸትዳ ደረ ኦና፤ ኤንቲ ካዉዮኮና።

20ኤንታ ናይት በን ዱሳዳ ዳና፤ ኤንታ ማባራይ ታ ስንን ምንድ ዳና። ኤንታ ኡንኤያ ኡባ ታ ሴራና።

21ኤንታ ካለናይ ኤንታ ግዶፈ ከያና፤ ኤንታ ሃራናይ ኤንታ ግዶፈ ደንዳና። ታኒ እያ ታዉ ማታ ኤሀና፤ እ ታኮ ሺቃና። ታኒ እያ ሺሾና ደእሽን፥ ምንድ ታኮ ሺቃናዉ ዳንዳኤይ ኦኔ?” ያጌስ ጎዳይ።

22ሄሳ ግሾ፥ ህንተ ታ አሰ ግዳና፤ ታካ ህንተ ፆሰ ግዳና።

23ሄኮ፥ ጎዳ ሀንቆይ ጎተዳ ደንዴስ፤ ሽረት ሽረት ዎሸ ኢታታ ሁጰን ዎና።

24ጎዳይ ባ ዎዛና ቆፋ ዉርስድ ፖላና ጋካናዉ ኤፅያ እያ ሀንቆይ ጉየ ስመና። ሄሳ ስንፈ ያና ዎደታን ህንተ አኬካና።

← Chapter 29 Jump to: Chapter 31 →