Jeremiah 21

Amharic Gofa GFBEVF (ጌሻ ማፃፋ)

← Chapter 20 Jump to: Chapter 22 →

1ካዎይ ሰደቅያስ ማልክያ ናኣ ጳስኮራነ ማእሰያ ናኣ ካህንያ ሶፎንያሳ ኪትዳ ዎደ፥ ጎዳ ቃላይ ኤርምያሳኮ ሀይሳዳ ያግድ ይስ፦

2ኤንቲ፥ “ባብሎነ ካዎይ ናቡካዳናፆር ባ ኦላንቾታራ ሀ ካታማ ተቅዳ ግሾ ኑስ ጎዳ ኦይቻ። ኦን ኤር፥ ጎዳይ በንይሳዳ ማላልስያ ኦሱዋ ኑ ግሾ ኦድ፥ እያ ጉየ ዛሮና አገና” ያግዶሶና።

3ኤርምያስ ኤንታዉ ዛሪድ፥ “ብድ ሰደቅያሳኮ ያግተ፦

4‘ኔኒ ባብሎነ ካዉዋራነ ግምብያፈ ካረራ ነ ካታማ ተቅዳ እያ ኦላንቾታራ ኦለትያነ ነ ኩሸን ደእያ ኦላ ሚሽያ ታ ነ ቦላ ዛራና፤ ኤንታ ኡባ ሀ ካታማ ግዶ ገልሳና።

5ታኒ፥ ታ ሁጰን ሴራስ ምጨትዳ ኩሸን፥ ዎልቃማ ቀስያን፥ ይሎን፥ ሀንቆንነ ዎልቃማ ጋዶን ነና ኦላና።

6ታ ሀ ካታማን ደእያ አሳነ መህያ ሾጫና፤ ኤንቲ ኢታ ጋዶን ዉራና።

7ሄሳፈ ጉየ፥ ይሁዳ ካዋ ሰደቅያሳ፥ እያ ሞርናታ፥ ጋዶፐ፥ ማሻፈነ ኮሻፐ አትዳ፥ ሀ ካታማ አሳ ኡባ፥ ባብሎነ ካዋ ናቡካዳናፆራስነ ኤንታ ዎናዉ ኮይያ ሞርከታስ አዳ እማና። እ ኤንታ ቃራ ማሻን ጎይራና። እ ኤንታዉ ቃተና፤ ሳለትድ አገና፤ ማረና’ ” ያጌስ ጎዳይ እስራኤለ ፆሳይ።

8ጎዳይ ኤርምያሳኮ፥ “ጉጃዳ አሳኮ ሀይሳዳ ያጋ፦ ታ ህንተ ስንን ደኦ ኦግያነ ሀይቆ ኦግያ ዎስ።

9ሀ ካታማን ጋምእያ ኦንካ ማሻን ዎይኮ ኮሻን ዎይኮ ጋዶን ሀይቃና። ሽን ካታማፐ ከይድ ካታማ ተቅድ ኦይክዳ ባብሎነታስ ባ ኩሽያ እምያ ኦንካ ፓፃ አታና፤ ሄ ኡራይ ባ ሸምፑዋ አሻና።

10ታኒ ሀ ካታማ ቦላ ሎኦባ ግዶናሽን ኢታባ ኦናዉ ደንዳስ። ታ እያ ባብሎነ ካዋስ አዳ እማና፤ እ ሀ ካታማ ታማን ፁጋና” ያጌስ ጎዳይ።

11ይሁዳ ካዋ ኬ አሳስ ሀይሳዳ ያጋ፦ ጎዳ ቃላ ስእተ!

12ህንተኖ፥ ዳዊታ ኮቻቶ፥ ጎዳይ ህንተኮ ሀይሳዳ ያጌስ፤ “ዎንታ ዎንታ ሱረ ፕርድተ፤ ቦንቀትዳይሳታ ኡንኤያ አሳ ኩሸፐ አሽተ። ሄሳ ህንተ ኦና እፅኮ፥ ህንተ ኢታ ኦሱዋ ጋሶን ታ ሀንቆይ ታማዳ ኤፃና፤ ኦንካ እያ ቶይሰና” ያጌስ ጎዳይ።

13ነኖ፥ የሩሳላመ፥ ደንባን ደእያ ዛላዳ፥ ዛንጋራፐ ቁ ጋዳ በንታሳ፤ ሽን ታ ነና ኦላና። ኔኒ፥ “ኦንካ ታ ቦላ ፃለና ዎይኮ ታ ደእያ በሳ ገለና” ያጋሳ።

14ሽን፥ “ታኒ ጎዳይ ነና ነ ኦሱዋዳ ሴራና። ታኒ ነ ካዎ ኬን ታማ ኦይና፤ ነ ዩሹዋን ደእያ ኡባ ምድ ይሳና” ያጌስ ጎዳይ።

← Chapter 20 Jump to: Chapter 22 →