Ezekiel 14

Edo ((E Baibol Ẹdo) Version 1996)

← Chapter 13 Jump to: Chapter 15 →

1Eso vbe avbe ivbi Izrẹl keghi do nọ mwẹ emwi ne Nọyaẹnmwa ho.

2E Nọyaẹnmwa keghi tama mwẹ wẹẹ,

3“Ovbi ọmwa, avbe emwa na, ẹmwẹ ẹbọ okpa ọ re ọ wa rre iran ekhọe rhunmwuda ọnii, te iran ghi gie ẹbọ gha si iran fi orukhọ. Te iran ro ighẹ mẹ gha rhie ewanniẹn ne iran ra?

4“Rhunmwuda ọnii, gu iran guan ne u tama iran vbene imẹ ne Nọyaẹnmwa ne Udazi kha ma iran. Ovbi Izrẹl ike ovbi Izrẹl ne ọ rhie ekhọe ne ẹbọ ne ọ na gie ẹbọ nii si ẹe la orukhọ, ọ na vbe gha dee do nọ akhasẹ ọta, I gha rhie ewanniẹn ne ẹn — ewanniẹn ne ọ khẹke ẹmwẹ avbe ẹbọ ne ọ mu ẹn.

5Avbe ẹbọ nii ni ye ivbi Izrẹl fi iyeke gbe mwẹ, sokpan, I yayi wẹ ewanniẹn ne I gha rhie ne iran gha ya iran dọlegbe bu mwẹ rre.

6“Rhunmwuda ọnii nian, tama ivbi Izrẹl vbene imẹ ne Nọyaẹnmwa ne Udazi kha hẹ wẹẹ: ‘Wa fiwerriẹ, ne uwa sẹ avbe ẹbọ osọnnọ uwa rae.’

7“Ẹghẹikẹghẹ ne ovbi Izrẹl okpa ra orhunmwuyẹn ni rre uwu ẹbu ivbi Izrẹl ya fi iyeke gbe mwẹ, ọ na ya gha gho ẹbọ, ọ na vbe kpao ya gualotọ emwi vbe obọ akhasẹ, mẹ ne Nọyaẹnmwa ọ re ọ ra rhie ewanniẹn ne ẹẹn.

8I gha mu aro da ẹre. I gha ya ẹe ru igiemwi. I gha yuo ẹre hin uwu ẹbu emwa mwẹ rre, ne uwa miẹn ehe na rẹn ighẹ mẹ ọrọre Nọyaẹnmwa.

9“A deghẹ akhasẹ ghi vbe khian ne a rẹrẹe, ọ na ya gha rhie ewanniẹn ohoghe ne emwa, emwi ne ọ si ẹe ọrọre wẹẹ, Mẹ ne Nọyaẹnmwa ọ re ọ rẹrẹ ọe. I gha yuo ẹre hin uwu ẹbu ivbi Izrẹl rre.

10Ke akhasẹ kevbe ọmwa ne ọ do gualotọ emwi vbe obọ ẹre, emwi okpa ọ ra mian eveva.

11I gha ru ẹe vberriọ ne ivbi Izrẹl ghẹ ghi lẹ sẹ mwẹ rae, ne iran ghẹ ghi ya gha ya orukhọ mu awua ye egbe iran egbe. Te iran ra gha re emwa mwẹ, ne imẹ vbe gha re Osanobua iran.” E Nọyaẹnmwa ne Udazi guaan nẹ.

12E Nọyaẹnmwa keghi gunmwẹ guan wẹẹ,

13“Ovbi ọmwa, uhunmwu ẹvbo okpa gha rukhọ ighẹ ọ ma mudia ẹse ghe mwẹ, I gha nien obọ ladian, I ghi guọghọ ehe ne ọ la miẹn evbare kua. I gha gie ukhunmwu, I ghi gbele emwa nagbọn kevbe avbe aranmwẹ ba ẹre.

14Gia kha ighe te Noa, e Daniẹl kevbe Job gha rre evba, uhunmwu iran okpa ọ re umamwẹ iran ra sẹtin sinmwi ye agbọn.” E Nọyaẹnmwa ne Udazi guan nẹ.

15“Ra, adeghẹ I gie aranmwẹ akọn ne ọ ya gbele emwa nii, ne ọ gha gie otọe nii vuọn ne ẹbe sẹrriọ wẹ a i ghi miẹn ọmwa ne ọ la ẹe gberra.

16Ọ gha khọnrẹn wẹ ne ikpia eheha na gha rre evba, omwa vbene a na miẹn wẹ mẹ ne Nọyaẹnmwa ne Udazi ọrọre Osanobua ne ọ rrọ, iran i ra sẹtin miẹn ivbi iran ne a rẹngbe fan, uhunmwu iran ọkpa ọre iran gha miẹn fan, otọe ni gha vbe khian oha.

17“Ra, I sẹtin mu okuo la ẹvbo ọkpa, I ghi vbe viọ emwi igbinna dan larọ, ne ọ ya fuẹn emwa nagbọn kevbe aranmwẹ,

18gie a kha ighẹ te iran eheha na rre evba, omwa vbene a na miẹn wẹ mẹ ne Nọyaẹnmwa ne Udazi ọrọre Osanobua ne ọ rrọ, iran, i sẹtin miẹn ivbi iran ne arẹnegbe fan sokpan egbe iran ọkpa.

19“I gha gie okpemianmwẹ la ẹvbo ọkpa, ighe I gbele emwa nibun kevbe aranmwẹ rhunmwuda ighe ohu mu mwẹ,

20ọ gha khọnrẹn ne Noa, kevbe Daniẹl kevbe Job gha rre evba, omwa vbene a na miẹn wẹ mẹ ne Nọyaẹnmwa ne Udazi ọrọre Osanobua ne ọ rrọọ, iran i ra sẹtin miẹn ivbi iran ne arẹnegbe fan, egbe iran ọkpa ọ re iran ra ya uyinmwẹ esi iran miẹn fan.”

21Vbenian ọ re Nọyaẹnmwa ne Udazi khare: “I gha gie emwi ne I ya rri emwa oya enẹ ni khọ sẹ gha rrie Jerusalẹm, ena ọrọre okuo, ukhunmwu, aranmwẹ akọn, kevbe emianmwẹ, ne I ya fuẹn emwa nagbọn kevbe avbe aranmwẹ ba ẹre.

22Adeghẹ a miẹn ọmwa ne ọ miẹn uhunmwu vbọ, ọ na miẹn ivbi ẹre fan, u ghi gbearokotọ ghe iran vbe iran a sẹ ehe ne u ye. Ghe vbene iran i zẹdẹ maa hẹ. Ẹghẹ nii, u gha rẹn wẹ oya ne I wẹ I ra rri ivbi e Jerusalẹm re, emwi ne ọ wa khẹke nọ.

23“Ẹghẹ nii u gha na rẹn wẹ emwikemwi ne I rhirhi a ru, ọ mwẹ emwi ne ọ sii ẹe ne ọ na kei!” E Nọyaẹnmwa ne Udazi guaan nẹ.

← Chapter 13 Jump to: Chapter 15 →