Ezekiel 40 — Edo ((E Baibol Ẹdo) Version 1996)

1Ikpẹdẹ ne ogigbe ọghe ukpo ọgbọn nọ, ọ keghi vbe re ukpo isẹn yan ugie ne ima kegha rre iwe, kevbe ukpo iwenẹ ne a ghi khọn mu e Jerusalẹm. Vbe ẹdẹ nẹdẹrriọ, I keghi kakabọ họn ẹmwẹ ẹtin ọghe Nọyaẹnmwa vbe ọ gu ọmwa mudia vbe egbe mwẹ, ọ keghi mu mwẹ kpao.

2Vbe uwu umian, Osanobua, keghi mu mwẹ gha rrie otọ Izrẹl, ọ keghi mu mwẹ yan oke ne ọ yo, I keghi ya bẹghe vbe odaro mwẹ avbe owa ne a bọlọe eso, ọ keghi yevbe ẹvbo ne ọ kpolo.

3Ọ si mwẹ sikẹ ọre, I keghi ya bẹghe ọmwa ne ọ fi wainwain vbe ẹrọnmwọ, ọ keghi rhie emwi ne a ya mwa emwi ne a ya eto ovbiohuẹ ru mwẹ obọ, kẹe kevbe ọkpọ ne a ya mwa emwi, ọ keghi mudia ye ọkpẹn onurho ẹvbo.

4Rẹn keghi tama mwẹ wẹẹ, “Ovbi ọmwa, gbe aro kotọ, kakabọ danmwehọ ne u kakabọ ye avbe emwi ne I ra ma ruẹn re ẹro, rhunmwuda, ọnii ọ si ẹe ne a na mu ẹẹn gha die emwa na. U gha ya talọ emwi ne u miẹn hia ma ivbi Izrẹl.”

5Emwi ne I bẹghe kegha re Ọgua Osa, a keghi gbe ekẹn lẹga ẹre. Ọmwa nii keghi rhie ọkpọ ne ọ ya mwa emwi ne ọ re ibata igbe vbe utanmwẹ, ọ keghi mwa ekẹn ne a gbe nii. Ọ keghi gha re ibata igbe vbe uyomwẹ kevbe igbe vbene ọ mwẹ imi sẹ.

6Ọ keghi gha rrie onurho ne ọ mu aro da odẹ ahọ, ọ keghi nana ikpawẹ gha khian, ọ ghi sẹ odukhunmwu ẹnrẹn, ọ keghi mwa onurho ne ọ rrọ, ọ keghi gha re ibata igbe vbe udinmwimwẹ.

7Ọlẹla kevbe gha rre vbe a gberra ẹre nẹ, ughugha ọkhẹ eheha kegha rrọ ẹre obọ eveva. Nene ughugha ọkhẹ na hia kegha re umwọmwẹ vbe igienenẹ, ibata igbigbe vbe obọ ọkpọkpa, ekẹn ni rre ẹkpo iran kegha re ibata erẹnrẹn erẹnrẹn vbe umwẹimimwẹ. A ghẹ ghi vbe gberra avbe ughugha ọkhẹ na nẹ, ọlẹla ọkpa keghi vbe gha rrọọ ne ọ re ibata igbe vbe utanmwẹ, ọna ọ re a la sẹ Ọgua nọkhua ne ọ mu aro da Ọgua Osa.

8Rẹn keghi miẹn wẹ ibata iwenẹ nọ vbe udinmwimwẹ. Rẹn ọ re ọ ghi re ufomwẹ onurho ne ọ sikẹ Ọgua Osa sẹẹ ehia. Ekẹn ọnrẹn kegha re ibata enẹ vbe umwẹimimwẹ ọnrẹn vbe odẹ ukpẹ ọre.

10(Avbe ughugha ọkhẹ na ne ọ rre obọ eveva vbe ọlẹla na, ukpọlọmwẹ ọkpa ọ re ọ gue ehia, ọkpa ọ re ekẹn ni rre ẹkpo iran vbe khin vbe ukpọlọmwẹ.)

11Vbe iyekọnii, ọmwa nii keghi mwa uvbẹmwẹ ọlẹla ne ọ rre onurho. Ọ keghi gha re ibata evayan ugie vbe ehia ẹkpo ne ọ rre onurho ore kegha re ibata ẹnẹirrọvbugie.

12Vbe odaro ọkpọkpa vbe avbe ughugha ọkhẹ na, ekẹn ne ọ ma yo keghi rrọọ ne ọ re akhuẹn ikpinhianbọ ugie vbe uyomwẹ kevbe umwẹimimwẹ. (Avbe ughugha na kegha re ibata igbe vbe igienenẹ.)

13Vbe iyekọnii, ọ keghi vbe ya mwa vbene ẹkpo ne ọ rre ekẹn odieke ọghe ughugha ọkpa kevbe ekẹn odieke ọghe ughugha ne ọ rre obọ nọkpa vbe a fian ọlẹla rra vbe odaro ẹre, ọ keghi gha re ibata eva yan iyeva.

14A keghi gha la ughugha ne ọ wa ke odọ sẹẹ vbe ehia fi ẹghodo. Ọ keghi mwa ughugha nii, ọ keghi miẹn wẹ ibata enẹ yan ọgban ọ re nọ.

15Utanmwẹ ọghe onurho na ke ekẹn onurho ore ya sẹ uwu ehe ne ughugha ne okiekie lae, kegha re ibata enẹyan iyenẹ.

16Ivbi uvun giere kegha rre ekẹn ne ọ ke ore ọghe avbe ughugha na hia, kevbe ekẹn ne ọ rre uwu owa vbe ẹkpo avbe ughugha na. A keghi ka udin lele egbekẹn ne ọ ke uwu ẹre vbe ehe ne ọ mu da ọlẹla nii.

17Ọmwa nii keghi rhie mwẹ la onurho gha rrie Ọgua ore. A keghi bọlọ ughugha ọgban lele ekẹn ne ọ ke ore, vbe odaro iran, ihe ọkpa ne ọ vbee ne a ya okuta ma otọ ẹre kegha rrọ.

18Ọna keghi wa lẹga ọgua ore nii. Ọgua ore ne ọ ke edinran keghi rriotọ sẹ ọgua ore ne ọ ke odọ.

19Onurho keghi vbe gha rre ehe ne ọ yo sẹẹ ne a la la ọgua ore ne ọ ke uwu ẹre. Ọmwa na keghi mwa vbene onurho eva na rrei ne egbe sẹhẹ. Ọ keghi gha re ibata erẹnrẹn yan iyi erẹnrẹn (168).

20Ọmwa nii keghi vbe mwa onurho ne ọ rre odẹ okuọ vbe ehe ne a lala ẹghodo ne ọ ke ore.

21Ughugha ọkhẹ eheha ne ọ rre obọ eveva ọghe ọlẹla ekẹn ni rre ẹkpo iran, kevbe avbe ughugha nekhua ni rrọ, ukpọlọmwẹ ọkpa ọ re iran wa khin zẹ vbe ne ọ rre onurho odẹ ahọ. Utanmwẹ onurho na kegha re ibata enẹ yan iyenẹ, uvbẹmwẹ ọnrẹn kegha re ibata eva yan iyeva.

22Avbe ughugha nekhua ni rrọ, avbe ewindo ni rrọ, kevbe avbe udin ne a kare kevbe gha yevbe ni rre onurho odẹ ahọ. Vbe emwana, ikpawẹ ihinrin ọ re a hin sẹ onurho nii, ughugha nọkhua nii kegha re odẹ ufomwẹ ehe ne ọ mu aro da ẹghodo nii.

23Onurho ọvbehe ọkpa kevbe gha rre ehe ne ọ mu aro da ẹghodo na vbe odẹ okuọ, zẹ vbene ọ vbe ye vbe obọ nọkpa, ọna ọ re a la sẹ ẹghodo ne ọ ke uwu ẹre. Ọmwa na keghi mwa vbene onurho eva na rrei ne egbe sẹ hẹ, ọ kegha re ibata erẹnrẹn yan iyerẹnrẹn (168).

24Vbe iyeke ọnii, okpia nii keghi rhie mwẹ gha rrie odẹ ekẹn, ma keghi do miẹn onurho nọkpa vbe evba. Ọ keghi mwa rẹn, ọ kevbe gha ye vbene enekpa ye.

25Avbe ewindo kegha rre avbe nene ughugha ni rre onurho na, zẹ vbene nekpa vbe ye. Utanmwẹ ọnrẹn kegha re ibata enẹyan iyenẹ, vbene uvbẹmwẹ ọnrẹn na re ibata eva yan iyeva.

26Ikpawẹ ihinrọn ọ re a nana sẹ ọe. Ughugha nọkhua ne ọ rrọ keghi mu aro da ẹghodo. A keghi gbẹnnẹ udin lele egbekẹn ne ọ ke uwu ẹre vbe ehe ne ọ mu aro da ọlẹla.

27Onurho ọkpa keghi vbe gha rre ne a la sẹ ẹghodo ne ọ ke uwu ẹre. Ọmwa na keghi mwa vbene onurho ne ogieva na rrei sẹ hẹ, ọ kegha re ibata erẹnrẹn yan iyerẹnrẹn (168).

28Okpia nii keghi rhie mwẹ la onurho ne ọ rre odẹ ekẹn ne ọ rrọ gha rrie ẹghodo ne ọ ke uwu ẹre. Ọ keghi mwa onurho ne ọ rrọ, ọ keghi vbe gha re vbene avbe ẹghodo ne ọ ke ekẹn ore vbe ye.

29Avbe ughugha ọkhẹ, avbe ughugha nekhua kevbe ekẹn ni ke uwu ẹre keghi vbe gha ye vbene nekpa ye vbe ukpọlọmwẹ. Avbe ewindo keghi vbe gha rre ughugha na. Utanmwẹ ọnrẹn keghi gha re ibata enẹ yan iyenẹ. Uvbẹmwẹ ọnrẹn keghi gha re ibata eva yan iyeva.

31Ughugha nekhua ni rrọọ keghi mu aro da ẹghodo nọkpa, a keghi gbẹnnẹ avbe udin ye egbekẹn vbe ọlẹla ne ọ rrọọ. Ikpawẹ erẹnrẹn ọ re a nana sẹ onurho na.

32Ọmwa nii keghi rhie mwẹ la onurho odẹ ekẹn gha rrie ẹghodo ne ọ ke uwu ẹre. Ọ keghi mwa onurho ne ọ rrọ, ọ keghi vbe gha ye vbene avbe nekpa ye vbe ukpọlọmwẹ.

33Avbe ughugha ọkhẹ ni rrọọ, avbe ughugha nekhua kevbe avbe ekẹn ni ke uwu ẹre keghi vbe gha ye vbene avbe onurho nekpa ye. Ewindo keghi wa gba ẹre, erriọ avbe ughugha nekhua vbe gha ye. Utanmwẹ ọnrẹn kegha re ibata enẹyan iyenẹ, uvbẹmwẹ ọnrẹn kegha re ibata eva yan iyeva.

34Ughugha nọkhua ne ọ rrọọ keghi mu aro da ẹghodo ne ọ ke ore, a keghi gbẹnnẹ avbe udin lele egbekẹn ọlẹla ne ọ rrọọ. Ikpawẹ erẹnrẹn ọ re a nana sẹ onurho na.

35Ẹre ọmwa nii na rhie mwẹ gha rrie onurho odẹ okuọ Ọ keghi mwa ẹnrẹn ọ na vbe gha re vbene nekpa ye vbe ukpọlọmwẹ.

36Ọ keghi vbe gha mwẹ avbe ughugha ọkhẹ vbene nekpa ye. Avbe egbekẹn ne a te ẹre egbe ni ke uwu ẹre, ughugha nọkhua ọkpa kevbe avbe ewindo ni lẹga ẹre. Utanmwẹ ọnrẹn kegha re iba taẹnẹ-yan iyenẹ, uvbẹmwẹ ọnrẹn kegha re ibataeva-yan iyeva.

37Ughugha nọkhua ne ọ rrọọ keghi mu aro da ẹghodo ne ọ ke ore. A keghi gbẹnnẹ udin lele egbekẹn ọlẹla ne ọ rrọọ. Ikpawẹ erẹnrẹn ọre a nana sẹ onurho na.

38Vbe ẹghodo ore ne ọ rrọọ a keghi vbe bọ ekherhe te ẹe vbe onurho ne ọ ke uwu ẹre vbe odẹ okuọ. Ọ keghi mu aro da ughugha nọkhua ne ọ mu aro da ẹghodo nii, evba nii ọre iran na kpe ikun avbe aranmwẹ ne a ra giuan vbe ne a ya zọ ese.

39Eteburu enẹ kegha rre ughugha nọkhua na, eveva vbe obọ ọkpọkpa vbe ughugha nii. Uhunmwu avbe eteburu na ọ re iran na gbele avbe aranmwẹ ne iran ya zọ ese, ọ gha re te a ra wa gien ikun ẹnrẹn hia nọ, ra ne a ra ya zọ ese ye orukhọ ra imuohan a hae werriegbe.

40Egbe eteburu enẹ vberriọ keghi vbe rre orere vbe nene ughugha, eveva vbe obọ eveva ọghe onurho odẹ okuọ nii.

41Eteburu ne a na gbele avbe aranmwẹ ne a ra ya zọ ese keghi do gha re erẹnrẹn, enẹ vbe uwu ughugha nii, enẹ vbe ẹghodo.

42Eteburu enenẹ ne a na gbe avbe aranmwẹ imuohan ne a ra wa gien ikun ẹnrẹn hia, ne ọ rre ugha ne a bọ te ẹe nii, okuta ọ re a ya ru ẹe. Akhuẹn ikpinhianbọ ugie nọ vbe uyomwẹ, odukhunmwu ẹnrẹn keghi gha re akhuẹn ikpinhianbọ ọgban vbe igienenẹ. Avbe emwi hia ne a ya gbele avbe aranmwẹ ne a ra ya zọ ese, uhunmwu avbe eteburu na, ọ re a viọ iran yi.

43A keghi ru ehe ne a viọ emwi rrọ yi ne ọ re akhuẹn ikpinhianbọ eha lẹga ehọ eteburu nii vbe igienenẹ. Emiowo hia ne a ra ya zọ ese, uhunmwu eteburu nii ọ re a viọ iran yi.

44Vbe iyeke ọnii, ọ keghi rhie mwẹ gha die ẹghodo ne ọ ke uwu ẹre. Ughugha eva ọ re ọ viọ aro da ẹghodo ne ọ ke uwu ẹre nii, ọkpa mu aro da odẹ ekẹn vbe ọkpẹn onurho odẹ ahọ, nọkpa keghi mu aro da odẹ ahọ vbe onurho ne ọ rre odẹ ekẹn.

45Ọmwa nii keghi tama mwẹ wẹ avbe ohẹn ni winna vbe uwu Ọgua Osa ọ re ọ yan ughugha ne ọ mu aro da odẹ ekẹn,

46kevbe wẹ ughugha ne ọ mu aro da odẹ okuọ, avbe ohẹn ni winna vbe Ogiukpo ọ re ọ yan rẹn. Ivbi uniẹn Zadọk ọ re avbe ohẹn nii hia wa khin. Vbe uwu avbe ivbi uniẹn e Livai hia, iran na ọkpa ọ re a kue ne ọ gha rrie odaro e Nọyaẹnmwa ne ọ ya ru emwi ne ẹẹn.

47Ọmwa nii keghi ya mwaa ẹghodo ne ọ ke uwu ẹre, ọ keghi gha re ibata erẹnrẹn yan iyerẹnrẹn vbe igienenẹ (168) Ọgua Osa kegha rre odẹ orrie ẹre, Ogiukpo kegha rre odaro ẹre.

48Ẹre ọ na rhie mwẹ gha rre ugha ne ọ rre onurho ne a la la uwu Ọgua Osa. Ọ keghi mwa onurho nii, ọ keghi gha re ibata ihinrin vbe udinmwimwẹ kevbe ibata enẹyan ugie vbe uvbẹmwẹ, ekẹn ne umwẹimimwẹ ọnrẹn re ibata isẹn kegha rre ọ re obọ eveva.

49Ikpawẹ ọ re a nana sẹ ughugha onurho nii, ọ na keghi vbe gha re ibata enẹ yan ọgban vbe uvbẹmwẹ kevbe ibata ugie vbe udinmwimwẹ. Orre eva kegha rrọ, ọkpọkpa vbe obọ ọkpọkpa vbe onurho.