Ezekiel 46

Edo ((E Baibol Ẹdo) Version 1996)

← Chapter 45 Jump to: Chapter 47 →

1E Nọyaẹnmwa ne Udazi khare wẹẹ, “Onurho ne ọ rre odẹ ahọ vbe ne a la sẹ ikun ne ọ ke uwu ẹre, te a ra gha khui ẹre gbua vbe ikpẹdẹ ehan ne a ya winna, sokpan, a ghi gha kie ẹre yotọ vbe Ẹdẹ Ikẹtin kevbe ẹghẹ Emwiukpo uki Ọgbọn.

2Ovbiọba ne ọ rre asẹ ghi ke ẹghodo ore ladian la ikun nọkhua ne ọ rre onurho, ọ ghi mudia ye ẹkpo orre ne ọ rre onurho, avbe ohẹn ghi gha gien ikun emwi ne ọ ya zọ ese ohoho, ọ ghi vbe si isara ọghọe. Onurho vbe evba nii ọ re ọ gha na ga, ọ ghi dọlegbe ladian. A ghẹ khui urho nii ọ te ya sẹ ota.

3Vbe Ẹdẹ Ikẹtin hia, kevbe Ẹdẹ Uki Ọgbọn hia, avbe emwa nii hia gha vbe gha ghughẹrre ya uhunmwu rhanmwẹ otọ ne Nọyaẹnmwa vbe odaro onurho nii.

4Vbe Ẹdẹ Ikẹtin, ovbiọba ghi viọ ivbi ohuan ehan kevbe ogho ọkpa ne ẹ i mwẹ okan zẹ vbe ese ne a ra gien ọre ikun ẹnrẹn ohoho.

5Ọ ghi mu ukhiọnmwẹ adanna ọghe ọka lele ogho ọkpọkpa ne ọ do ya mu ohan rre, ọ ghi vbe mu emwi ne ọ rhirhi khọn rẹn wẹ rẹn gha ya mu ohan lele dọmwadẹ ovbi ohuan rre. Ọ ghi gha mu ekuiyẹ nọkhua eha ọghe ofigbọn oliv lele dọmwadẹ ukhiọnmwẹ adanna ne ọ mu rre, rre.

6Vbe emwiukpo uki Ọgbọn ọ ghi viọ ovbi ẹkhuia ẹmila ọkpa, ivbi ohuan ehan, kevbe ogho ọkpa, ehia na ghi gha re ne ẹ i mwẹ okan ọ ghi do ya gha mu ohan.

7“Ọ ghi mu ukhiọnmwẹ adanna ọka lele ẹkhuia ẹmila ọkpọkpa kevbe ogho ọkpọkpa rre. Emwi ne ọ rhirhi khọn ovbiọba ọ re ọ gha mu lele dọmwadẹ ovbi ohuan rre. A ghi mu ekuiyẹ nọkhua eha ọghe ofigbọn oliv lele dọmwadẹ ukhiọnmwẹ; adanna ọka rre do ya gha mu ohan.

8Ovbi ọba gha ra kpa vbe ikun nọkhua ne ọ rre onurho ni, ehe ne ọ la larọ ọre ọ gha vbe la ladian.

9“Avbe emwa nii gha rre do ga e Nọyaẹnmwa vbe ẹghẹ emwiukpo, iran ni la urho odẹ okuọ la owa vbe iran dee, ghi la urho odẹ ekẹn ladian vbe iran a ghi gha ke ugamwẹ rrie owa, iran ni la urho odẹ ekẹn la owa ghi la urho odẹ okuọ gha rrie. Ọmwaikọmwa ghẹ la urho ne ọ la la owa gha rrie, sokpan urho ne ọ mu aro da ehe ne ọ la rre ọre ọ gha la rrie.

10Emwa nii gha la owa, ọ re ovbiọba gha na vbe la owa iran gha ladian, ọ ghi vbe ladian.

11Vbe ẹdẹ eghọ kevbe ẹdẹ emwiukpo, ukhiọnmwẹ adanna ọka ọre a gha mu lele ẹkhuia ọkpọkpa kevbe ogho ọkpọkpa rre. Emwi ne ọ ye ọmwa ne ọ do ga nii ọ re ọ gha rhie lele ovbi ohuan ọkpọkpa rre. Ekuiyẹ nọkhua eha ọghe ofigbọn ọliv, ọre a gha mu lele dọmwadẹ ukhiọnmwẹ adanna ọka rre.

12“Ovbiọba ne ọ rre asẹ gha ho ne ọ ya imuohan akekhọerre gie Nọyaẹnmwa, ọ gha re emwi imuohan ne a ra gien ikun ẹnrẹn ohoho nọ, ra ọghe ne a ya si isara nọ, a ghi kie urho odẹ ahọ ọghe ikun ne ọ ke uwu ẹre ne ẹẹn. Vbene ọ vbe ya yo imuohan vbe Ẹdẹ Ikẹtin ọre ọ gha vbe ya ru ẹe, ọ gha ladian nẹ, a ghi khui urho ni.”

13E Nọyaẹnmwa khare wẹẹ, “Owiowiẹ, wa ghi gha gien ovbi ohuan ne ẹ i mwẹ okan ne ọ rre ukpo ọkpa ikun ẹnrẹn ohoho zẹ vbe emwi ne a ya yọ imuohan gie Nọyaẹnmwa. Owiowiẹ ọ re ọ kere ne a ya gha yo imuohan na.

14Debare, a ghi vbe gha ya uwan isẹn ọghe irhuanrhua ọka yo imuohan owiowiẹ, deba ukhiọnmwẹ egalọn ọghe ofigbọn oliv ne a gha ya gha gbe irhuarhua ọka na. Ẹmwẹ ọghe imuohan ne a yo gie Nọyaẹnmwa na, te ọ ra gha rre otọ rhinrin ẹdẹdẹmwẹdẹ,

15oteghe ohuan nii, irhuarhua kevbe ofigbọn ọliv nii, a ghi gha yae ha oko gie Nọyaẹnmwa owiowiẹ ẹdẹdẹmwẹdẹ.”

16E Nọyaẹnmwa ne Udazi tae nẹ wẹẹ, “A deghẹ ovbiọba ne ọ rre asẹ mu vbe otọe ne ọ mwẹ ya ru ẹse ne ọkpa vbe uwu ivbi ẹre nikpia, ọ ghi khian ọghe ọmọ okpia nii zẹ vbe emwi ne ọ mwẹ vbe ọghe ẹgbẹe nii.

17Sokpan, a deghẹ ovbiọba ne ọ rre asẹ mu otọe ne ọkpa vbe uwu iran ni winna ne ẹẹn, otọe nii ghi dọlegbe khian ọghe ovbiọba nii vbe ukpo Amuẹn werriegbe. Ọghọe nọ, rẹn kevbe ivbiẹre ọkpa ọ re ọ sẹtin yan rẹn rhinrin ẹdẹ.

18Ovbiọba ne ọ rre asẹ, wẹ ne ọ ghẹ miẹn ọmwaikọmwa emwi ewe ẹre. Otọe ne a mu ne ẹẹn ọ re ọ gha na gha mu ne avbe ivbi ẹre, ne ọ ghẹ ya gha zẹ emwa mwẹ rhọkpa kpokpo vbekpa ne ọ gha na mu iran miẹn iran otọe iran.”

19Ẹre ọmwa na na rhie mwẹ gha rrie onurho avbe ughugha ni mu aro da odẹ okuọ vbe ọkpẹn onurho ne ọ rre odẹ ekẹn ọghe ikun ne ọ ke uwu ẹre. Ena kegha re ughugha nihuanrẹn ọghe avbe ohẹn. Ọ keghi nien obọ da ihọkpa vbe odẹ orrie avbe ughugha nii.

20Ọ wẹẹ, “Emwa na ọ re avbe ohẹn na le emiowo ne emwa do ya zọọ ese ye orukhọ ra ne iran do ya haa osa, evba ọ re iran na vbe le eka ọghe irhuarhua, ne a ghẹ miẹn ehe na mu emwikemwi nọhuanrẹn ladian gha rrie ẹghodo ore, ne ọ ghẹ ya kuan avbe emwa.”

21Iyekọni, rẹn keghi rhie mwẹ gha rrie ẹghodo ore, ọ keghi ma mwẹ re wẹ vbe igienenẹ ne ọ mwẹ nii, a vbe mwẹ ẹghodo giẹrẹ eso vbọ ne utanmwẹ ọnrẹn re ibata erẹnrẹn yan iyeha kevbe uvbẹmwẹ ọnrẹn re ibata erẹnrẹn yan iyeva.

23A keghi gbe ekẹn okuta lẹga dọmwadẹ ọghọe, a na vbe ru ehe ne a hie erhẹn yi vbọ ginna ekẹn.

24Ọmwa ni keghi tama mwẹ wẹẹ, “Enena ọrọre ukoni ne avbe eguọmwadia ni rre Ọgua Osa na le emwi ne emwa do ya yo imuohan.”

← Chapter 45 Jump to: Chapter 47 →