Ezekiel 36

Edo ((E Baibol Ẹdo) Version 1996)

← Chapter 35 Jump to: Chapter 37 →

1E Nọyaẹnmwa keghi kha wẹẹ, “Ovbi ọmwa, gu avbe oke nekhua Izrẹl guan, tama iran ne iran danmwehọ ẹmwẹ ne,

2I ra, tama iran, mẹ ne Nọyaẹnmwa ne Udazi. Avbe eghian Izrẹl kegha kha wẹẹ, ‘Banbanna nian, ma ọ re ọ ghi yan avbe oke arre nii!’

3“Rhunmwuda ọnii nian guan yotọ ne u vbe ta vbene imẹ ne Nọyaẹnmwa ne Udazi kha hẹ, wẹẹ: Ẹghẹ ne avbe ẹvbo ni yin ke Izrẹl na khọn, iran na vbe fu emwi avbe oke Izrẹl hẹ, emwa hia keghi ya Izrẹl gbogiẹ.

4Rhunmwuda ọnii, wa ne oke nekhua kevbe negiẹrẹ, wa danmwehọ ẹmwẹ ne imẹ ne Nọyaẹnmwa ne Udazi tama uwa, kevbe uwa ne ivbi ẹzẹ kevbe iya, kevbe uwa ne ehe ne a ya khian itowa hia, kevbe uwa ne ore ẹvbo ne a lẹẹ sẹrae, ne a fu ẹre emwi hẹ, avbe ẹvbo ni yin lẹga ẹre na vbe yae gha gbogiẹ.

5“Mẹ ne Nọyaẹnmwa ne Udazi, vbene ohu wa ya mu mwẹ ọ re I ya gu avbe ẹvbo ni yin lẹga ẹre guan, kpataki Idọm. Iran keghi ye ọpakharha kevbe a i zama ọmwa khọn otọe mwẹ, iran na vbe munọ avbe ehe ne aranmwẹ na rria ni rrọọ.

6“Rhunmwuda ọnii, ta ẹmwẹ akhasẹ ma otọe Izrẹl, tama avbe oke nekhua kevbe negiẹrẹ, avbe ivbiẹzẹ kevbe iya, ẹmwẹ ne imẹ ne Nọyaẹnmwa ne Udazi ye ohu taa, rhunmwuda vbe ne avbe uhunmwu ẹvbo ya rhovbiẹ iran, vbe fa iran an hẹ.

7Mẹ ne Nọyaẹnmwa ne Udazi yan tae nẹ wẹ, a gha rri avbe ẹvbo ni yin lẹga ẹre oya.

8Sokpan, avbe erhan gha ye dọlegbe zọ, iran ghi vbe zẹ ebe vbe uhunmwu oke Izrẹl, iran gha mọ ne uwa, ivbi Izrẹl ne emwa mwẹ. Wa gha dọlegbe gha die owa vbe ọ ma he kpee wan.

9“Wa ọ re imẹ deba, I gha vbe ru ẹe ne a miẹn wẹ a gua ye otọe uwa, a vbe kọ emwiokọ yọ.

10I gha ru ẹe ne uwa gha muan yọ, wa gha yin avbe ore nekhua ọghe uwa, wa ghi vbe dọlegbe bọlọ ehe ne ọ te re itowa hia.

11I gha ru ẹ ne emwa nagbọn kevbe avbe ẹmila gha muan yọ. Wa gha bun sẹẹ vbene uwa te ka ye yi, wa gha vbe biẹlẹ emọ nibun. I gha gie uwa yin evba nii vbene uwa te ka gha ye yi, I ghi vbe ru ẹe ne agbọn ma uwa sẹẹ vbene uwa ka ye yi. Ẹghẹ nii, wa gha rẹn wẹ mẹ ọrọre Nọyaẹnmwa.

12Ivbi Izrẹl ne emwa mwẹ, I gha viọ uwa rre ne uwa do dọlegbe yin otọe nii. Ọ gha khian otọe uwa, ohanmwẹ i ghi ra dọlegbe gbe uwa emọ.

13“Mẹ ne Nọyaẹnmwa ne Udazi khare wẹ, ẹmwata nọ wẹ emwa tie otọe nii otọe ne ọ rri ọmwa, iran wẹ ọ vbe do ẹvbo emọ he.

14Sokpan ke ẹghẹ na kpao, ẹ i ghi ra gha re otọe ne ọ rri ọmwa, ne ọ do uwa emọ hẹ. Mẹ ne Nọyaẹnmwa ne Udazi ọ re ọ tae.

15Otọe avbe uhunmwu ẹvbo nii i ghi ra dọlegbe ye iran gbogiẹ.”

16E Nọyaẹnmwa keghi gunmwẹ guan wẹẹ,

17“Ovbi ọmwa ẹghẹ ne avbe ivbi Izrẹl na gha rre otọe iran, iran keghi ya emwi ne iran ru kevbe uyinmwẹ iran mu awua ye otọe nii, I keghi ghe uyinmwẹ ne iran yin zẹ vbe emwi ne awua ye zẹ vbene ọ rre egbe okhuo ne ọ mu obọ mwẹ.

18I keghi gie iran họọn obọ ohu mwẹ vbe egbe rhunmwuda izigha ne iran dee vbe otọe nii kevbe rhunmwuda avbe ẹbo ne iran ya mu awua yọ.

19I keghi bu ohiẹn gbe iran rhunmwuda vbe ne iran yin kevbe vbene iran ru emwi hẹ, I keghi zagha iran ku ẹvbo ẹrrẹe.

20Ehe ne iran a rhirhi yo, iran kegha fa eni mwẹ nọhuanrẹn uan, rhunmwuda, emwa ghi gha kha wẹẹ, ‘Iran si kpao vbe otọe ne Osanobua iran mu ne iran.’

21Ọna keghi ya mwẹ gha mu ẹmwẹ eni mwẹ nọhuanrẹn ro rhunmwuda, te ivbi Izrẹl wa gha fa e rua vbe ehe ne iran yo hia.

22“Rhunmwuda ọnii, ta uhunmwu ne imẹ ne Nọyaẹnmwa ne Udazi gie gie ivbi Izrẹl ma iran. Ẹ i re rhunmwuda uwa ne ivbi Izrẹl ọ re I ra na ru emwi ne I ra ru, sokpan rhunmwuda eni mwẹ nọhuanrẹn nọ, eni ne uwa fara vbe ẹvbo ikẹvbo ne uwa yo.

23I gha rhie igiemwi uhuanmwẹ eni mwẹ nọkhua ma avbe uhunmwu ẹvbo nẹ, eni ne uwa faraa vbe ehe ne iran ye, ẹghẹ nii, iran gha rẹn ighe mẹ ọrọre Nọyaẹnmwa. Mẹ ne Nọyaẹnmwa ne Udazi ọ re ọ tae. I gha ya uwu rhie igiemwi ma avbe uhunmwu ẹvbo wẹ ọmwa nọhuanrẹn ọ re imẹ khin.

24I gha viọ uwa ke avbe uhunmwu ẹvbo kevbe agbọn ẹvbo ladian, I ghi viọ uwa werriegbe gha die otọe uwa.

25I gha miẹn amẹ afọ yan uwa, awua ẹbọ ghi lahin uwa egbe rre, deba avbe emwi ọvbehe hia ne ọ te mu awua ye uwa egbe.

26I gha rhie ẹko kevbe ekhọe ọgbọn ne uwa I gha miẹn uwa ekhọe okuta uwa ne ọ zevbudu nii, I ghi rhie ekhọe ne ọ họn ẹmwẹ ne uwa.

27I gha rhie orhiọn mwẹ ye uwu uwa, I ghi vbe miẹn wẹ wa ya uhi kevbe iyi mwẹ ru emwi.

28Ẹghẹ nii wa ghi yin otọe ne I mu ne avbe erha uwa odede. Wa ghi gha re emwa mwẹ, mẹ ghi vbe gha re Osanobua uwa.

29I gha miẹn uwa fan hin obọ emwi hia ne ọ mu awua ye uwa egbe rre. I gha tama avbe ọka ne ọ gha bun yọ ne ukhunmwu ghẹ ghi fi vbe ehe ne uwa ye ọvbehe.

30I gha gie avbe erhan uwa mọ ọmọ nibun sayọ kevbe ugbo uwa, ne a ghẹ ghi miẹn ukhunmwu ne ọ gha fa uwa a vbe odaro avbe uhunmwu ẹvbo.

31Wa gha ye avbe uyinmwẹ dan kevbe abakuru ne uwa ru rre, ohu egbe uwa ghi gha mu uwa, rhunmwuda orukhọ kevbe uyinmwẹ dan uwa.

32“Izrẹl, I ho ne uwa rẹn wẹ ẹ i re rhunmwuda uwa ọ re I na ru avbe emwi na. I ho ne uwa rẹn ekhue kevbe efaa ne ọ rre emwi ne uwa ru na nian, Mẹ ne Nọyaẹnmwa ne Udazi ọ re ọ tae.”

33E Nọyaẹnmwa ne Udazi khare wẹẹ, “I gha khuẹ uwa huan hin uwu orukhọ uwa rre nẹ, I gha gie uwa dọlegbe yin ẹvbo uwa, ne uwa miẹn ehe na bọlọ avbe ẹvbo ne ọ te khian itowa nii.

34Emwa ni la ọkpẹn ugbo uwa gberra gha miẹn vbene iran te sọn khian oha hẹ, sokpan, I gha gie uwa ye dọlegbe gbe ẹre ugbo.

35Emwa hia ghi vbe tae vbene a miẹn wẹ otọe ne ọ te wa khian ẹgbo, do khian vbene ogba Idẹni ye nian, kevbe avbe ẹvbo nii ne a guọghọ ua, a fu emwi ni rrọọ viọ, a na sẹẹ ọe rae ye itowa, do khian ne a ghi yin nian, a na vbe gbe odin lẹga ẹre.

36Ẹghẹ nii, avbe ẹvbo ni yin lẹga ẹre, ni miẹn uhunmwu vbọ gha rẹn wẹ, mẹ ne Nọyaẹnmwa, sẹtin dọlọ ẹvbo ne a rẹnkhuan bọ, I ghi vbe ye otọe ne a mu rhia gbe ugbo. Mẹ ne Nọyaẹnmwa tae nẹ wẹ I gha ru emwi na, te I ra gele ru ẹe.”

37E Nọyaẹnmwa ne Udazi khare wẹẹ, “I gha dọlegbe gie ivbi Izrẹl do nọ iyobọ vbe obọ mwẹ, I gha gie iran vbe gha muan yọ zẹ vbe oghẹn ohuan.

38Avbe ẹvbo hia ni khian itowa na, emwa gha vuọn rẹn zẹ vbene ohuan te vuọn e Jerusalẹm yi, uwu ne iran na munọ ya zẹ ese vbe ẹghẹ emwiukpo. Ẹghẹ nii iran gha rẹn wẹ mẹ ọrọre Nọyaẹnmwa.”

← Chapter 35 Jump to: Chapter 37 →