Ezekiel 21

Edo ((E Baibol Ẹdo) Version 1996)

← Chapter 20 Jump to: Chapter 22 →

1Enọyaẹnmwa keghi gunmwẹ guan wẹẹ,

2“Ovbi ọmwa, ta ku e Jerusalẹm. Ta ku ehe ne emwa na ru ugamwẹ. Tama otọ Izrẹl yotọ wẹ,

3Mẹ ne Nọyaẹnmwa khare wẹ, eghian uwa ọ re imẹ khin, I gha yuo umozo mwẹ ladian, I ghi gbele uwa hia a, ke ne ọ re ọmwa esi ke ne ọ re ọmwa dan.

4I gha ya umozo mwẹ giagia edọmwadẹ ọghọe ke odẹ okuọ ya sẹ odẹ ekẹn.

5Edọmwadẹ ọghọe gha rẹn wẹ mẹ ne Nọyaẹnmwa yuo umozo mwẹ ladian nẹ, kevbe wẹ mẹ i ra rhie ẹre yotọ.

6“Ovbi ọmwa, gha rriakọn obalọ vbene a miẹn wẹ te egbe wọ mwẹ ghi ra gie ẹkoko udu ruẹ vua. Gha rriakọn akhiẹ, vbe ehe ne emwa hia gha na bẹghe ruẹe.

7Iran gha nọ ruẹn emwi ne ọ zẹ ne u na rriakọn, u ghi tama iran wẹ rhunmwuda iyẹn ne ọ he dee nọ. Ẹghẹ ne iyẹn nii gha ya sẹ obọ, ohan gha mu iran hia ẹsẹse, obọ iran gha wu ginna iran egbe, ẹtin gha fo iran, igbọn iran ghi gha rhie gbe egbe. Nene ẹghẹ wa dee, ọ sẹẹ emwa fo nẹ,” E Nọyaẹnmwa ne Udazi guan nẹ.

8E Nọyaẹnmwa keghi tama mwẹ wẹẹ,

9“Ovbi ọmwa, guan ẹmwẹ akhasẹ. Tama emwa nii vbene imẹ ne Nọyaẹnmwa kha hẹ wẹẹ: Umozo, umozo, a gha lọ ẹe, a gha kpe ẹe.

10A gha lọọ ẹe nẹ ọ gha gbe emwi, a gha kpe ẹe nẹ ọ gha fi wain vbe ayan. Oghọghọ i sẹtin gha rrọọ. Rhunmwuda, avbe emwa mwẹ hee ẹmwẹ ne a tama iran yotọ, ke vbe oya ne a rri iran re.

11A gha kpe umozo nii, ne a rhie ẹre yotọ ne a miẹn lo. A lọ ẹe, a keghi vbe kpe ẹe ne a mu ye odiọnmwa obọ.

12Ovbi ọmwa, kpe orhu eve orriara, emwa mwẹ ọ re a rhie umozo na bu dee, deba avbe ọkaolotu Izrẹl hia. Te a ra gbele iran an, deba avbe emwa nekpa. Ye obọ akhiẹ gbe ẹwẹe!

13Te imẹ danmwẹ emwa mwẹ ghe na, a deghẹ iran ma fiwerriẹ, emwi na hia gha sunu vbe egbe iran.

14“Wanwanna nian, ovbi ọmwa, guan ẹmwẹ akhasẹ. Kpe obọ ruẹ, umozo gha vbe gha gbe emwi yan egbe yan egbe. Umozo ne ọ gbe emwi nọ, umozo ne ọ runran ọmwa ke ne ọ vbe lọkọ nọ.

15Ọ gie ẹtin wa fo avbe emwa mwẹ iran ghi vbe gha rrua owẹ. I gha ye umozo ne ọ fi wain vbe ayan, yan gie ẹvbo nii, umozo ne ọ vbe mu egbe ne ọ ya gbe emwi.

16Umozo ne ọ mu, gbe vbe obọ erha ọmwa kevbe obọ iye ọmwa. Ehe ne u rhirhi a gban egbe ghe, gbe vbọ.

17Mẹ tobọ mwẹ gha vbe kpe obọ mwẹ, ohu ghi do fo vbe ẹko mwẹ. Mẹ ne Nọyaẹnmwa ta ẹe nẹ.”

18E Nọyaẹnmwa keghi gunmwẹ guan wẹẹ,

19“Ovbi ọmwa, ya umozo na vinnọ ama ye odẹ eva ne ọ gha gie ọba e Babilọn la rre ke irẹn kevbe umozo ẹre. Uhunmwu ẹvbo okpa ọ re eveva nii gha na suẹn, u ghi gbẹn uhanhan ama ne a ya rẹn odẹ ye ehe ne iran na van obọ.

20Ọkpa ghi gie odẹ ne ọ rrie Raba ne ẹvbo Amọn ma ọba, nọkpa ghi ma ẹre ne ọ rrie Jerusalẹm ne ẹvbo ne a gbe odin ga vbe Juda.

21Ọba e Babilọn mudia vbe ehe ne ọ gie odẹ ma ọmwa vbe ehe ne odẹ nọ va ada nii ye. Ne ọ miẹn ehe na rẹn odẹ ne ọ gha la ghe vbọ, ọ fieghe ifẹnmwẹ, ọ nọ avbe amazẹ ọre, ọ gbe aro kotọ ghe vbene ihẹnmwẹ aranmwẹ ne ọ ya zọ ese ye hẹ.

22Ẹn hẹn! Obọ erha ọmwa rẹn gua ifẹnmwẹ ne a gbẹn ‘Jerusalẹm’ yi rhie. Ọ tama rẹn wẹ ne ọ ya yọ emwi igbinna, ne ọ ya go ugomwẹ okuo, ne ọ mwamwa emwi igbinna yo odẹ ne a la larọ, ne ọ tọnnọ ekẹn gbe odẹ ke ne ọ tọnnọ uvun yọ.

23Ivbi e Jerusalẹm i ra ya ẹmwẹ na yi rhunmwuda ebe ne iran gu emwa rhie obọ yi. Sokpan, a ta yotọ ọghe emwi ne ọ dee na, te a wẹ ne a ya ye iran orukhọ iran rre, kevbe wẹ ne a tae ma iran yotọ ighe obọ gha vba iran ya munọ.

24Rhunmwuda ọnii, ẹmwẹ ne imẹ ne Nọyaẹnmwa ne Udazi tae ọ re ọ nii khin. Orukhọ uwa vẹ gbe uwa. Emwa hia rẹn vbene uwa rri abe sẹhẹ. Emwi ne uwa ru hia ọ re uwa na rhie orukhọ uwa maa. Wa rri abe nẹ, te I ra viọ uwa ye avbe eghian uwa obọ.

25“Wa ne emwa dan ni ma huan ni khaemwisẹ yan Izrẹl. Ẹdẹ uwa dee, ẹdẹ ne a gha rri uwa oya ne okiekie.

26Mẹ ne Nọyaẹnmwa ne Udazi tae nẹ. Wa viọ ẹde uwa kevbe ukpọn ne uwa ya gbalọ uhunmwu egie hin rre. Emwi okpa ne ọ gha ye dunna vbene ọ ka ye dee yi, ẹ i ghi rrọọ. Wa tọn ivbiogue mu ye ukpo ọdakha. Wa ya iran ni te khaemwisẹ owẹ yotọ.

27Ọfuan, ọfuan, vbe ẹmwata, mẹ gha ya ore ẹvbo nii khian itowa. Sokpan ọna i ra sunu, a te do miẹn wẹ ọ rre ighe ọmwa ne I zẹe ne ọ do rri ẹvbo nii oya. Rọẹn nii ọre I ra mu ẹẹn ẹre na.

28“Ovbi ọmwa, guan zẹvbe akhasẹ, ta ẹe ladian wẹ mẹ ne Nọyaẹnmwa ne Udazi ọ re ọ tama ivbi Amọn ni kpa unu ghe Izrẹl, tama iran wẹẹ, ‘Umozo mu egbe nẹ ọ ra ya fuẹn emwi. A kpee ẹe nẹ ọ gha gbe emwi, ne ọ gha fi wain zẹ vbe ayan,

29ohoghe ọ re umian ne uwa miẹn khin. Ẹmwẹ ne uwa ta yotọ khẹ ọ dee, ohoghe nọ. Emwa dan ne ekhọe dan ọ re uwa khin, ẹdẹ uwa wa vbe dee, ẹdẹ ne a ra rri uwa oya ne okiekie, umozo gha de ye uwa ẹyaẹn.

30“ ‘Ziẹn umozo ni ye ako! Ehe ne a na yi uwa ọ re I ra na bu ohiẹn uwa. Vbe otọ ne a na biẹlẹ uwa.

31Wa gha họn obọ ohu mwẹ vbe egbe vbe ẹghẹ ne I gha na rhurhẹ ọe yan uwa zẹ vbe erhẹn ne ọ baa gidigidi. I ghi viọ uwa yan emwa dan obọ, emwa ni fuẹro emwi ne a mu rhia.

32Erhẹn gha fuẹn uwa a. A gha gbe esagiẹn uwa yotọ vbe ẹvbo uwa tobọ uwa, a i ghi vbe miẹn ọmwa rhọkpa ne ọ gha ye uwa rre ọvbehe.’ ” E Nọyaẹnmwa guaan nẹ.

← Chapter 20 Jump to: Chapter 22 →