Ezekiel 38

Edo ((E Baibol Ẹdo) Version 1996)

← Chapter 37 Jump to: Chapter 39 →

1E Nọyaẹnmwa keghi gunmwẹ guan wẹẹ,

2“Ovbi ọmwa, ta ku e Gọg ne uhunmwu uta ne ọ khaemwisẹ yan avbe uhunmwu ẹvbo e Mẹsiẹk kevbe Tubal vbe otọ Magọ. Ta ku ọre,

3ne u tama rẹn wẹ mẹ ne Nọyaẹnmwa ne Udazi, oghian rẹn ọ re I khin.

4I gha sua ẹre yo sua ẹre rre, I ghi rhie ẹghọ ye ọ re agbanmwẹ, I ghi kpolo irẹn vbe ivbiyokuo ẹre gha rrie. Ivbiyokuo mu asa mwẹ obọ, iran vbe mwẹ umozo.

5Emwa ni ke Pẹsia, e Sudan kevbe Libya rre gue ẹe, ehia ọ re ọ wa vbe mwẹ erhu ẹgere kevbe asa.

6Iran ni guara gbinna ni ke Goma kevbe Bẹt Togama vbe odẹ okuọ rre gue ẹe, erriọ vbe nọ ne dọmwadẹ uhunmwu ẹvbo nibun ọvbehe.

7Tama rẹn wẹ ne ọ mu egbe ne ọ vbe mu avbe ivbiyokuo ẹre egbe ye otọ ne ọ gha gie ẹre iwinna.

8Vbe iyeke ukpo nibun, I gha tama rẹn ne ọ ya khọn ẹvbo ọkpa ne a ke viọ avbe emwa nii werriegbe gha dee do si iran koko, ne iran vbe gba gha rrọọ ke ẹghẹ nii gha dee vbe ne a i na fian afianma okuo. Ọ gha mu okuo la avbe oke Izrẹl ne ọ dihoi rua kevbe ne emwa na lẹkua ke ẹghẹ ne ọ kpẹre gha dee, sokpan, ne emwa hia ghi ye nian vbe a i mwẹ ẹbe.

9Ke irẹn kevbe ivbiyokuo ẹre deba avbe uhunmwu ẹvbo nibun ni gue ẹe gha mu okuo yo zẹ vbe okpẹhoho, iran ghi vbe gue otọe ni muotọ zẹ vbe ubimwẹ amẹ.”

10Ẹmwẹ ne Nọyaẹnmwa ne Udazi tama e Gọg ọ re ọ ọna khin, “Ọ gha ghi sẹ ẹghẹ nii, u gha suẹn gha mwamwa emwamwa dan vbe ẹko ruẹ.

11U gha kha wẹ u ra mu okuo la ẹvbo ne ẹ i mwẹ ẹtin, ehe ne emwa hia na rrọ vbe ọfumwegbe kevbe ne ẹkun na sotọ vbe avbe ẹvbo ne a ma gbe ekẹn ga vbe ne ẹ i na mwẹ ne ọ gbinna ne ẹẹn.

12U gha derhu iran, u ghi fu iran emwi viọ ighe iran ni rre ẹvbo ni te ka re itowa yi. Dọmwadẹ uhunmwu ẹvbo ọ re a ke viọ iran gha dee, wanwanna nian, te iran ghi mwẹ emwi ewe kevbe emwirri, iran keghi vbe yin ihuada agbọn na.

13Ivbi e Sieba kevbe Dedan, kevbe avbe ikpatẹ ni ke Spen rre gha nọ uwa wẹẹ, ‘Te uwa si ivbiyokuo uwa si koko ne uwa na vbe mu okuo gha khian, ne uwa miẹn ehe na fu emwi kevbe ne uwa do emwi hẹ? Te uwa ho ne uwa viọ esiliva kevbe igoru, ẹmila kevbe emwi ewe, ne uwa viọ emwi ne uwa hẹ re nii hia gha rrie?’ ”

14Rhunmwuda ọnii, e Nọyaẹnmwa ne Udazi keghi gie mwẹ ne I ya tama e Gọg vbene irẹn tama rẹn hẹ wẹẹ, “Banbanna nian, ivbi Izrẹl ne emwa mwẹ gha rrọ vbe ne ẹkun na sẹ iran otọ, wẹ gha wa guakpao,

15vbe odẹ, okuo ne ọ rrei ne u ye, u ghi viọ ivbiyokuo nibun, ni vbe mwẹ ẹtin mwẹ obọ, ne a viọ ke uhunmwu ẹvbo nibun rre ke iran kevbe ẹsin ne iran hinrin.

16U gha dekun Izrẹl ne emwa mwẹ zẹ vbe okpẹhoho ne ọ gbe otọe ni dunmwu. Ẹghẹ nii gha sẹ, I gha giọ ne u mu okuo gha rrie otọe mwẹ ne I miẹn ehe na rhie ma avbe uhunmwu ẹvbo ọmwa ne I khin, ne I la ekpa emwi ne I lo ruẹ ya ru na rhiema vbene I huan hẹ.

17Wẹ ọrọre ọmwa ne I gha kha ẹkporriọ, ẹghẹ ne I na wẹ ne avbe akhasẹ Izrẹl ne eguọmwadia mwẹ tae ladian wẹ ẹdẹ dee ne I gha gie ọmwa ọkpa rre ne ọ do khọn Izrẹl.” E Nọyaẹnmwa ne Udazi ọ re ọ tae.

18E Nọyaẹnmwa ne Udazi khare wẹẹ, “Ohu gha kakabọ mu mwẹ vbe ẹdẹ ne Gọg gha mu okuo la Izrẹl.

19Uwu ohu nọkhua ne ọ mu mwẹ ọ re I na tae na wẹ igbohiotọ nọkhua gha sunu vbe Izrẹl vbe ẹdẹ nẹdẹrriọ.

20Avbe ehẹn kevbe ahianmwẹ hia, avbe aranmwẹ hia, nekhua ke negiẹrẹ, emwa nagbọn ni rre ehe hia gha guọ zighazigha rhunmwuda ohan mwẹ ne ọ mu iran. Avbe oke nekhua gha dele guọghọ ua, avbe oke ni ye gelete gha rẹnkhẹn uan, avbe ekẹn ne a gbe hia gha siẹn kua.

21I gha ya emwi ọfuan hia runran e Gọg. Mẹ ne Nọyaẹnmwa ne Udazi ọ re ọ tae. Emwa rẹn gha ye umozo lọkọ egbe iran an.

22I gha ye emianmwẹ kevbe ukpọba gu ẹe khọn. Okpamẹ kevbe okpẹhoho, deba erhẹn kevbe ugbofi, ehia gha rhurhẹ yan rẹn kevbe ivbiyokuo ẹre, kevbe avbe uhunmwu ẹvbo nibun ni deba ẹre.

23Vbe odẹ vbenian, I gha rhie ma avbe uhunmwu ẹvbo wẹ ọmwa ne ọ kpọlọ kevbe nọhuanrẹn ọ re imẹ khin. Ẹghẹ nii iran gha rẹn ighe mẹ ọrọre Nọyaẹnmwa.”

← Chapter 37 Jump to: Chapter 39 →