Song of Solomon 1

Edo ((E Baibol Ẹdo) Version 1996)

Jump to: Chapter 2 →

1Ihuan ne Solomọn so, ihuan ne ọ sẹre vbe Ihuan hia fẹẹrẹ.

2Akhuarhamwunu ruẹn mama isosunu rhu mwẹ, ahoẹmwọmwa ruẹn maa sẹ ayọn.

3Uwinhinmwẹ okpa rre egbe ruẹ, a gha so eni ruẹn, a ghi vbe yerre okhuo okpa ne ọ gha sẹtin we rẹn I ra ho ẹmwẹ ruẹn i rrọ.

4Rhie mwẹ ba egbe, ne ima lẹ kpao, gha re ọba mwẹ ne u rhie mwẹ la ughugha ruẹ. Ọyẹnmwẹ gha gba sẹ mwa, ma ghi da, a ghi gha maẹn rhan ruan vbe aho ẹmwẹ ọmwa. Ẹkhabe ne ikhuo hia na ho ẹmwẹ ruẹn.

5Wa ne ikhuo Jerusalẹm te I siere sokpan, I wa mose, I sie rua vbe owa e Keda ni rre ato sokpan I mose vbe ukpọn ne a ya te ẹguae Solomọn.

6Ghẹ tila mwẹ uan rhunmwuda ighe I siere rhunmwuda ighe ovẹn ya mwẹ sie, avbe etẹn mwẹ nikpia keghi gha mu ohu mwẹ. Iran na ya mwẹ gbe ẹgbo gbe ogo iran, I ma ghi miẹn ẹghẹ ya dọlọ egbe yi.

7Enida mwẹ, tama mwẹ ehe ne u viọ avbe ohuan ruẹn rrie ya rria? De ehe ne iran ra na lẹ ovẹn ro? Ne I ghẹ ya gha gualọ ọ khian vbe ẹbu ohuan avbe ọsuohuan nekpa.

8Wẹ ma rẹn ehe ne ọ khin ra okhuo ne ọ mose sẹ ikhuo hia? Gha khian ya lele avbe ohuan nii gualọ ehe ne avbe ẹwe ruẹ, gha na rria vbe ọkpẹn owa ukpọn avbe ọsuohuan.

9Enida mwẹ, te u fi ikpia aro werriẹ vbe uhunmwu, vbene ẹsin amwẹ fi aro avbe ẹsin ọwẹe ni si ikẹkẹ e Fero werriẹ vbe uhunmwu.

10Eto ruẹ mose vbe irho ruẹ ọ tuo sẹ ẹyaẹn ruẹn vbe emwi urhu.

11Sokpan ma gha ru emwi urhu igoru nuẹn deba emwi itegbe ọghe esiliva.

12Ọba mwẹ keghi hẹko lovbiẹ ye aga ẹre, emwi ne I ya wo keghi winhin gba ehe hia.

13Te enida mwẹ winhin vbe oziya vbe ọ lovbiẹ yọmwẹ ẹwẹe.

14Enida mwẹ yevbe avbe obobo ni sa kua vbe ogba Ẹngẹdi.

15A miẹn vbene u mose hẹ enida mwẹ; a miẹn vbe aro ruẹ fi wain hẹ ne ahoẹmwọmwa!

16A miẹn vbene u mose hẹ enida ne enida mwẹ a miẹn vbe u yẹ mwẹ! Irunmwu ni ma kaka a ọ gha re ukpo mwa.

17Avbe sida ọ ra gha re inianwẹ vbe owa mwa. A ghi ya uvbiakhẹ ru ihie ẹre.

Jump to: Chapter 2 →