Song of Solomon 6

Edo ((E Baibol Ẹdo) Version 1996)

← Chapter 5 Jump to: Chapter 7 →

1Olose ne ọ sẹre vbe uwu avbe ikhuo hia vbe enida ruẹ ghi la? Tama ima odẹ ne ọ lae nẹ ima miẹn ehe na guẹ gualọ ẹe.

2Enida mwẹ rrie uwu ogba ẹre, ehe ne avbe erhan balsam na wan. Ọ gha koko avbe ohuan rẹn vbe uwu ogba. Ọ gha vbe si avbe obobo ẹzẹ koko.

3Mẹ ọ re ọ yan enida mwẹ, rẹn ọ re ọ yan mwẹ ọ gha koko avbe ohuan rẹn vbe uwu avbe obobo ẹzẹ.

4Enida mwẹ u ye mose mose vbe Tiza u wa mose zẹvbe ore Jerusalẹm u keghi re ọyunnuan vbene avbe ẹvbo na ye.

5Werriẹ aro ruẹ hin odẹ ne I ye rre, iran mu mwẹ gba zẹ vbe oghunmwu. Eto ruẹ gha biyo birre zẹ vbe oghẹn ẹwe ni rhulẹ rrie ototọ Giliad.

6Akọn ruẹn fọfua zẹvbe oghẹn ohuan, ne a da khuẹ. Ọkpa ma vbe kpaẹn fua vbọ; te ehia wa ya ye umwọmwẹ.

7Irho ruẹ ye rodorodo vbe uwu ukpọn ne u rhie rhu uharo.

8Wa gie ọba gha mwẹ oloi iyeha, kevbe egbakhian iyenẹ, deba avbe uvbi ne a i sẹtin ka.

9Sokpan okpa kẹkan ọ re ọ yẹ mwẹ vbọ, te ọ wa ye mose mose vbe idu. Ukpọmọkpa ọ re ọ khin iye ẹe re, ọmọ ne iye ẹe ho ẹmwẹ ọnrẹn sẹ, ikhuo ghi gha ghe ẹre, iran ghi gha tian ẹnrẹn. Avbe Iloi kevbe avbe egbakhian ghi gha go wan rẹn.

10Gha ọna khin ne a ghe vbene ẹdẹ da gbe dee na yi? Ọ mose, ọ ye wainwain, ọ fi wainwain vbe owẹn ra uki.

11Uwu ẹbu erhan ni kọnkọn ọ re I ke tuorre dee ne I do ghe ivbi erhan ni rre iya, ne I do ghe ebe ọgbọn ne azara họnrẹn kevbe obobo erhan ighee.

12Te I ghi guọ, te ghi ya ẹmwẹ okhuo khọnmwẹ zẹ vbene okuo khọn ọmwa ne ọ fi ikẹkẹ okuo.

13Gha ku, gha ku uvbi ne Siulam gie ima ghe ruẹ vbe u kuu Vbọzẹ ne uwa na ho ne uwa ghe mwẹ vbe I kuu yi vbe ehe ne iran ni ghe ughe na tẹn ye obọ eveva?

← Chapter 5 Jump to: Chapter 7 →