Song of Solomon 7

Edo ((E Baibol Ẹdo) Version 1996)

← Chapter 6 Jump to: Chapter 8 →

1A miẹn vbene u mose hẹ, uvbi! A miẹn vbe owẹ ruẹ mose hẹ vbe uwu ibata, vbene u gada owẹ yevbe iwinna ọghe, owinna ne ọ guẹ ona.

2Ọkpan ne amẹ ne ọ winhin i na fo rre evba. Ikun erhan ọka ne a gbae rre evba, vbe ne iyokhoẹzẹ na lẹga ẹre.

3Ẹwẹn ruẹn yevbe ẹrhuẹ ivin eva, ra uzo ivin eva.

4Ẹyaẹn ruẹn yevbe orre akọn eni, aro ruẹ yevbe ọghọdọ ne ọ rre Hesbọn ne ọ rre ọkpẹn onurho ẹvbo nii. Ihue ruẹ ye mose mose vbe owa ọkhẹ ọghe Lebanọn ne ọ khẹ odẹ vbe Damaskọs.

5Uhunmwu ruẹn ye gelete vbe Oke Kamẹl eto ruẹ ne a mẹẹn gha fi wainwain vbe esiliki ose ẹre gha sẹtin mu ọba ye imu.

6A miẹn vbe u mose hẹ, a miẹn vbe u yẹ ọmwa hẹ, vbene ahoẹmwọmwa ruẹn ye ọmwa hẹ, ne ọ gbae nọ.

7Te u ye hiọnhiọn-ọnhiọn vbe udin, ewẹn ruẹn ye vbe ititi ivin.

8I gha hin udin nii ne I ya fan vbe ẹdin ẹnrẹn, te ewẹn ruẹn yevbe ititi alimo vbe odaro mwẹ. Uhiọnrọnmwẹ ruẹn yevbe uwinhinmwẹ otiẹn.

9Unu ruẹn zẹ vbe ayọn ne ọ maa sẹẹ. Wa gie nene ayọn gha lẹ bu enida mwẹ yo. Ne ọ gha lẹ ye ọ re akhuarhamwunu kevbe akọn.

10Enida mwẹ ọ re ọ yan mwẹ, ọ vbe gualọ aro mwẹ.

11Larre, enida mwẹ gie ima khian ladian hin ore ẹvbo rre, ne ima ya lo asọn eso vbe avbe igue.

12Ma ghi rherhe rhiọrre vbe owiẹ ne a gha ghe avbe azara ne a ghe deghẹ iran suẹn gha zọ nẹ, adeghẹ obobo ẹre rhan nẹ. Adeghẹ avbe erhan pomegranẹt gbe obobo nẹ. Evba ọ re I gha na rhie ahoẹmwọmwa mwẹ nuẹn.

13U gha sẹtin winhin erhan ni winhin avbe ọmọ erhan ni maa hia sikẹ onurho mwa. Enida, i viọ emwi ni ya ẹko rhiẹnrhiẹn nẹdẹ, ke ọghe orre na khẹ ruẹ.

← Chapter 6 Jump to: Chapter 8 →