Acts 17

Bodo BDVNT (ବ୍‌ଡ଼୍ ହ୍‌ର୍‌ଜା ବାଇବଲ)

← Chapter 16 Jump to: Chapter 18 →

1ହ୍‌ଚେ ସେମ୍‍ନ୍ ଆଂଫିପଲି ଆର୍ ଆପୋଲ୍ଲୋନିଆ ସ୍‌ହର୍ ବାଟ୍ ଅଇକ୍‌ରି ଥେସଲନିକି ସ୍‌ହର୍‌କେ ଆଇଲାଇ। ସେତି ଗଟେକ୍ ଯିହୁଦିମ୍‍ନାର୍ ପାର୍‌ତେନା ଗ୍‍ର୍‌ରିଲି।

2ଆରେକ୍‌ ପାଉଲ୍ ତାକାର୍ ନିତିନିୟମ୍ ହର୍ ପାର୍‌ତେନା ଗ୍‍ରେ ଗ୍‍ଲା, ସେତି ସେ ତିନିଗଟ୍ ହୁଣ୍ତ୍‌ତା ଦିନ୍ ଲକ୍‌ମ୍‍ନ୍‌କେ ଶିକ୍ୟା ଦେତିରିଲା,

3ଆର୍ ଖ୍ରୀଷ୍ଟ ଯେ ଦୁକ୍ ବଗ୍ କ୍‍ରେଦ୍ ଆର୍ ମ୍‌ରେଦ୍ ତାର୍‌ହ୍‌ଚେ ଜୀବନ୍ ହାଇକ୍‍ରି ଉଟ୍‌ତା ଲଡାରିଲି ବ୍‌ଲି ଦ୍‌ର୍‌ମ୍ ଶାସ୍‌ତରାର୍ ବାକ୍ୟ ବୁଜାଇକ୍‍ରି ଦ୍‍କାଇ ଦିଲା। ପାଉଲ୍ କଇଲା, ଜୁଇ ଯୀଶୁର୍ ବିଷୟେ ମୁଇ ପର୍‍ଚାର୍ କ୍‌ରୁଲେ ସେ ହ୍‌କା ଖ୍ରୀଷ୍ଟ।

4ସେମ୍‍ନ୍‍କାର୍ ବିତ୍‌ରେ କ୍‍ତେକ୍ ଲକ୍‍ମ୍‍ନ୍ ପାଉଲ୍ ଆର୍ ଶୀଲାର୍ ପ୍ରଚାରେ ସେବା କ୍‍ରି ତାକାର୍ ଦ୍‌ଳେ ମିସ୍‌ଲାଇ। ସେନ୍‍କ୍‌ରି ବେସି ମାନ୍‍ତି ହାଉତା ମାଇଜି ଟକିମ୍‌ନ୍, ଆର୍ ଇଶ୍ଵରାର୍ ଡିର୍‌ତି ରିଇଲା ଗ୍ରୀକ୍ ବକ୍ତ ଲକ୍‌ମ୍‌ନ୍‌କାର୍‌ ଗଟେକ୍ ବ୍‍ଡ୍ ଦ୍‌ଳ୍ ହେଁ ସେମ୍‍ନ୍‍କାର୍ ସ୍‍ଙ୍ଗ୍‍ ମିସ୍‌ଲାଇ।

5ମ୍‍ତର୍ ଯିହୁଦି ଲକ୍‍ମ୍‍ନ୍ ରିସାଅଇକ୍‌ରି କ୍‍ତେକ୍ ଦୁଷ୍ଟ ଲକ୍‌ମ୍‍ନ୍‌କେ ଦ୍‍ରି ଆଣି ଗୁଳା ସ୍‌ହରେ ମାଡ୍‌ଗଳ୍ ଆରମ୍ କ୍‌ଲାଇ। ସେମ୍‍ନ୍ ପାଉଲ୍ ଆର୍ ଶୀଲାକେ କଜି ଆଣୁକ୍ ଯାସନ୍ ନାଉର୍ ଗଟେକ୍ ଲକାର୍‌ ଗ୍‍ରେ ଜାଇକ୍‍ରି ହୁର୍‌ଲାଇ।

6ମ୍‍ତର୍ ସେତି ସେମ୍‍ନ୍ ପାଉଲ୍ ଆର୍ ଶୀଲାକେ ନାହାଇ ସେମ୍‍ନ୍ ଯାସନ୍ ଆର୍ ବିନ୍ ବିଶ୍‍ବାସିମ୍‌ନ୍‌କେ ଦ୍‍ରି ଆଣି ସେ ସ୍‌ହରାର୍‌ ବିଚାର୍‌ କ୍‌ର୍‌ତା ଲକ୍‌ମ୍‌ନ୍‌କାର୍‌ ଲ୍‌ଗେ ନ୍ଇକ୍‌ରି ବ୍‍ଡ୍ ଟଣ୍ତ୍‌କ୍‌ରି କଇଲାଇ, “ଇ ମାନାଇମ୍‌ନ୍ ଚାରିହାକ୍ ମାଡ୍‌ଗଳ୍ କ୍‌ରାମ୍‌ଲାଇ।

7ଇ ଯାସନ୍ ସେମ୍‌ନ୍‌କେ ତାର୍ ଗ୍‍ରେ ସ୍‌ଙ୍ଗାଇଲା ଆଚେ, ଯୀଶୁର୍ ନାଉଁଏ ଆରେଗଟ୍ ର୍‌ଜା ଆଚେ ବ୍‍ଲି କଇ ଲକ୍‍ମ୍‍ନ୍ ଅମାର୍ କାଇସର୍ ବ୍‍ଡ୍ ର୍‌ଜାକେ ଅପ୍‌ମାନ୍ କ୍‌ରୁଲାଇ।”

8ଇକ୍‍ତା ଶୁଣି ସ୍‌ହରାର୍‌ ନେତାମ୍‍ନ୍ ଆର୍ ସ୍‌ବୁ ଲକ୍‍ମ୍‍ନ୍ ବେସି ଗଣ୍ତ୍‌ଗଳ୍ କ୍‌ରାଇଲାଇ।

9ହ୍‌ଚେ ନେତାମ୍‍ନ୍ ଯାସନ୍ ଆର୍ ବିଶ୍‍ବାସିମ୍‌ନ୍‌କାର୍ ତ୍‌ଇହ୍‌ଣି ଡାବୁ ନ୍ଇକ୍‌ରି ସେମ୍‌ନ୍‌କେ ଜାମିନେ ଚାଡ୍‌ଲାଇ।

10ଆରେକ୍‌ ବାଇମ୍‌ନ୍ ରାତି ଅଇଲାକ୍ ବିଶ୍‍ବାସିମ୍‌ନ୍‌କେ ପାଉଲ୍ ଆର୍ ଶୀଲାକେ ବେରିୟା ସ୍‌ହର୍‌କେ ହ୍‌ଟାଇ ଦିଲାଇ। ସେମ୍‍ନ୍ ସେତି କେଟି ଯିହୁଦିମ୍‌ନ୍‌କାର୍ ପାର୍‌ତେନା ଗ୍‍ରେ ଗ୍‍ଲାଇ।

11ଥେସଲନିକିଆର୍ ଯିହୁଦି ଲକ୍‌ମ୍‌ନ୍‌କାର୍‌ ତ୍‌ଇହ୍‌ଣି ବେରିୟା ସ୍‌ହରାର୍‌ ଇ ଲକ୍‌ମ୍‌ନ୍‌କାର୍‌ ମ୍‌ନ୍ ବ୍‍ଲ୍ ରିଲି। କାଇତାକ୍ ସେମ୍‍ନ୍ ବେସି ସ୍‍ର୍‍ଦା ଅଇକ୍‌ରି ହ୍‌ଟାଇଲା ଚେଲାମ୍‌ନ୍‌କାର୍ ଶିକ୍ୟା ଶୁଣ୍‌ଲାଇ, ଆର୍ ପାଉଲାର୍ ବାକ୍ୟ ସ୍‌ତ୍ କି ନାଇ ସେରି ପରିକ୍ୟା କ୍‌ରୁକେ ସେମ୍‍ନ୍ ସ୍‌ବୁଦିନ୍ ବାକ୍ୟ ହଳ୍‍ତି ରିଲାଇ।

12ସେତାକ୍ ସେମ୍‍ନ୍‍କାର୍ ବିତ୍‌ରେ ଗାଦି ଯିହୁଦି ଦ୍‌ର୍‌ମ୍ ଅଇରିଲାର୍ ଗ୍ରୀକ୍ ମାଇଜି ଟକିମ୍‌ନ୍ ଯୀଶୁକେ ବିଶ୍‍ବାସ୍ କ୍‌ଲାଇ, ଆର୍ ଅଣ୍ଡ୍‍ରା ଲକ୍‍ମ୍‍ନ୍ ହେଁ ବିଶ୍‍ବାସି କ୍‌ଲାଇ।

13ମ୍‍ତର୍ ଜ୍‌ଡେବ୍‌ଳ୍ ଥେସଲନିକିଆର୍ ଯିହୁଦିମ୍‍ନ୍ ଶୁଣ୍‌ଲାଇ ଯେ ପାଉଲ୍ ବେରିୟାର୍ ହେଁ ଇଶ୍ଵରାର୍ ବାକ୍ୟ ପର୍‍ଚାର୍ କ୍‌ରୁଲା ବ୍‌ଲି ସେମ୍‍ନ୍ ସେତିକେ ଆସି ଲକ୍‌ମ୍‍ନ୍‌କେ ଦ୍‍ରି ମାଡ୍‌ଗଳ୍ କ୍‌ରୁକେ ଚେଷ୍ଟା କ୍‌ଲାଇ।

14ବିଶ୍‍ବାସିମ୍‌ନ୍‌ ସ୍‌ଙ୍ଗେ ସ୍‌ଙ୍ଗେ ପାଉଲ୍‌କେ ସ୍‍ମ୍‍ଦୁର୍ କ୍‌ଣ୍ତାଇ ହ୍‌ଟାଇ ଦିଲାଇ, ମ୍‍ତର୍ ଶୀଲା ଆର୍ ତୀମଥି ଦୁଇ ଲକ୍ ବେରିୟା ସ୍‌ହର୍‌ ଲ୍‌ଗେ ରିଲାଇ।

15ମ୍‍ତର୍ ପାଉଲ୍‌କେ ସ୍‌ଙ୍ଗେ ଦ୍‌ରିକ୍‌ରି ଜାତିରିଲା ଲକ୍‍ମ୍‍ନ୍ ତାର୍‌ସ୍‍ଙ୍ଗ୍‍ ଏଥେନ୍‌ସ୍‌ ସହର୍ ହ୍‌ତେକ୍ ଗ୍‍ଲାଇ, ସେତିହ୍‍ଣି ସେମ୍‍ନ୍ ବେରିୟାକେ ଲେଉଟି ଆସି ଶୀଲା ଆର୍ ତୀମଥିକେ କଇଲାଇ, ତୁମି ବେଗି ଜାଇକ୍‍ରି ପାଉଲ୍‌କେ ମିସା, ଇରି ସେ କଇଲା ଆଚେ।

16ଏଥେନ୍‌ସ୍‌ ସ୍‌ହରେ ଶୀଲା ଆର୍ ତୀମଥି ଆସ୍‌ତାର୍ ପାଉଲ୍ ଜାଗିରିଲାବ୍‌ଳ୍ ସେ ସ୍‌ହରେ ଗଟେକ୍ ମୁର୍‌ତି ହ୍‌ଦାଇ ଦ୍‌କିକ୍‌ରି ସେ ବେସି ଦୁକ୍ ଅଇଲା।

17ସେତାର୍‍ଗିନେ ସେ ପାର୍‌ତେନା ଗ୍‍ରେ ଯିହୁଦିମ୍‌ନ୍‌କାର୍ ସ୍‍ଙ୍ଗ୍‍ ଆର୍ ଇଶ୍ଵରାର୍ ଆରାଦନା କ୍‌ର୍‌ତିରିଲା ଯିହୁଦି ଚାଡି ବିନ୍‍ଜାତି ଲକ୍‌ମ୍‌ନ୍‌କାର୍‌ ସ୍‍ଙ୍ଗ୍‍, ଆର୍ ବ୍‌ଜାର୍ ଚକେ ସ୍‌ବୁଦିନ୍ ଜୁଇ ଲକ୍‌ମ୍‌ନ୍‌କାର୍‌ ସ୍‍ଙ୍ଗ୍‍ ଦ୍‍କାଇ ଅଉତି ରିଲାଇ, ସେମ୍‌ନ୍‌କେ ଯୀଶୁର୍ ବିଷୟେ କ୍‌ତାବାର୍‍ତା କ୍‌ର୍‌ତିରିଲା।

18କ୍‍ତେକ୍ ଏପିକୂରୀୟ ଆର୍ ସ୍ତୋୟିକ୍ ଶିକ୍ୟା ଗୁରୁ ମ୍‌ନ୍‌କାର୍ ସ୍‍ଙ୍ଗ୍‍ ଟେକାଟେକି ଅଇଲାଇ, ସେମ୍‍ନ୍‍କାର୍ ବିତ୍‌ରେ କ୍‍ତେକ୍ ଲକ୍ କଇଲାଇ, “ଏ ଗଟେକ୍ ବୁଦି ନ୍‍ରିଲା ବ୍‌ୟା, କାଇରି କ୍‍ମ୍‍କେ ମ୍‌ନ୍ ନ୍‍କେରୁଲା କି?” କ୍‍ତେକ୍ ଲକ୍‍ମ୍‍ନ୍ କଇଲାଇ ସେ ନ୍‌ଜାଣ୍‌ତା ଦେବ୍‌ତାମ୍‌ନ୍‌କାର୍ ପର୍‍ଚାର୍ କ୍‌ର୍‌ତାଲକ୍ ହର୍ ଜାଣା ହ୍‌ଳୁଲା, ଯୀଶୁ ମରିକ୍‍ରି ଜିଇ ଉଟ୍‌ଲା ବିଷୟାର୍ ସୁବ୍‌କ୍‌ବର୍ ପର୍‍ଚାର୍ କ୍‌ର୍‌ତିରିଲାର୍ ଶୁଣି, ସେମ୍‍ନ୍ ଅନ୍‌କ୍‌ରି କଇଲାଇ।

19ସେତାର୍‍ଗିନେ ସେମ୍‍ନ୍ ପାଉଲ୍‌କେ ଦ୍‌ର୍‌ଲାଇ ଆର୍ ଆରିୟପାଗ୍ ନାଉର୍ ସ୍‌ହରାର୍‌ କୁଟୁମ୍ ବ୍‌ସ୍‌ଲା ଟାଣେ ନିଲାଇ, ଆର୍ ସେମ୍‍ନ୍ କଇଲାଇ, ତୁଇ ଜୁଇ ନ୍ଉଆ ଶିକ୍ୟା ଦେମ୍‍ଲିସ୍ ସେ ବିଷୟେ ଅମିମ୍‍ନ୍ ଜାଣୁକେ ମ୍‌ନ୍ କ୍‌ରୁଲୁ।

20କାଇତାକ୍ ତୁଇ କ୍‌ଉତି ରିଲାର୍ ବିଷୟେ କ୍‍ତେକ୍ କ୍‌ତା ଶୁଣୁଲାଇ। ଇ ସ୍‌ବୁ କ୍‌ତାର୍ ଅର୍ତ କାଇରି, ଅମିମ୍‍ନ୍ ସେରି ଜାଣୁକେ ଇଚା କ୍‌ରୁଲୁ।

21ଏଥେନ୍‌ସ୍‌ ସ୍‌ହରେ ବାସାକ୍‌ରିରିଲା ଲକ୍‍ମ୍‍ନ୍ ଆର୍ ସେତିରିଲା ବିଦେଶାର୍ ଲକ୍‍ମ୍‍ନ୍ ନ୍ଉଆ ବିଷୟେ ଶୁଣୁକେ ଆର୍ କ୍‍ମ୍‍କେ ବେସି ବ୍‍ଲ୍ ହାଉତିରିଲାଇ। ଅନ୍‌କ୍‌ରି ସେମ୍‍ନ୍ ବେସି ସମୟ୍ କ୍‌ଟାଉତି ରିଲାଇ।

22ପାଉଲ୍ ଆରିୟପାଗର୍ କୁଟୁମ୍ ବ୍‌ସ୍‌ଲା ମ୍‍ଜାଇ ଟିଆଅଇ କଇଲା, “ହେ ଏଥେନ୍‌ସ୍‌ ସ୍‌ହରେ ବାସାକ୍‌ରିରିଲା ଲକ୍‍ମ୍‍ନ୍, ତୁମିମ୍‍ନ୍ ଦେବ୍‍ତାକେ ବେସି ମାନ୍‌ତା ଲକ୍ ହର୍ ଜାଣା ହ୍‌ଳୁଲି, ଇରି ମୁଇ ଦ୍‌କୁଲେ।

23କାଇତାକ୍ ମୁଇ ତୁମାର୍ ସ୍‌ହରେ ବୁଲି ଦ୍‍କ୍‍ଲା ବ୍‌ଳ୍ ତୁମାର୍ ଆରାଦନା କ୍‌ର୍‌ତା ଟାଣ୍‌କେ ମୁଇ ଦ୍‌କ୍‌ଲେ, ଗଟେକ୍ ବେଦିଲ୍‌ଗେ ନ୍‌ଜାଣ୍‌ତା ଇଶ୍ଵରାର୍ ନାଉଁଏ ବ୍‌ଲି ଲେକା ଅଇରିଲାର୍ ମୁଇ ଦ୍‌କ୍‌ଲେ ଆଚି। ତୁମି ଜୁଇ ଇଶ୍ଵର୍‍କେ ନ୍‍ଜାଣିକ୍‍ରି ଆରାଦନା କ୍‍ରୁଲାସ୍, ତାର୍‌କ୍‍ତା ମୁଇ ତୁମାର୍ ଲ୍‌ଗେ କ୍‍ମ୍‍କେ ଜ୍‍ମ୍‍ଲେ।

24ଜୁଇ ଇଶ୍ଵରାର୍ ହୁର୍‌ତିବିକେ ଆର୍ ହୁର୍‌ତିବି ତ୍‌ଇରିଲା ସ୍‌ବୁ ଜିନିଷ୍‌କେ ତିଆର୍ କ୍‌ଲାଆଚେ, ସ୍‌ର୍‌ଗ୍‌ ଆର୍ ହୁର୍‌ତିବି ତିଆର୍ କ୍‍ଲା, ସେ ନିଜେ ମାପ୍‌ରୁ ଅଇଲାର୍ ଗିନେ ମାନାଇମ୍‌ନ୍ ତିଆର୍ କ୍‍ଲା ମନ୍ଦିରେ ବାସା ନ୍‌କେରେ,

25ସେ ମାନାଇମ୍‌ନ୍‌କାର୍ ତ୍‌ଇହ୍‌ଣି କାଇରି ହେଁ ସାଇଜ ହାମ୍‌କେ ଇଚା ନ୍‌କେରେ, କାଇତାକ୍ ସେ ସ୍‌ବୁ ଲକ୍‌ମ୍‍ନ୍‌କେ ଜୀବନ୍ ହୁଣ୍ତାଣ୍ ଦିଲାଆଚେ, ଦ୍‌ର୍‌କାର୍ ରିଲା ଜିନିଷ୍ ହେଁ ଦିଲାଆଚେ।

26ଆର୍ ଗଟ୍‌ଲକାର୍ ତ୍‌ଇହ୍‌ଣି ଇଶ୍ଵରାର୍ ସ୍‌ବୁ ମାନାଇ ଜାତିକେ ତିଆର୍ କ୍‌ଲାଆଚେ। ତାର୍ ଆଦେଶ୍ ତ୍‌ଇ ସେମ୍‍ନ୍ ହୁର୍‌ତିବିର୍ ବିନ୍‌ବିନ୍ ଜାଗାଇ ବାସା ଅଇଆତ୍‌ତି, କେ କୁଇତି ବାସା କ୍‌ର୍‌ତି ଆଗ୍‍ତୁ ହ୍‌କା ସେ ସେରି ଟିକ୍ କ୍‌ରିରିଲା,

27ସେମ୍‍ନ୍ ଜ୍‌ନ୍‌କ୍‌ରି ସ୍‌ବୁଲକ୍ ଇଶ୍ଵର୍‍କେ ଟ୍‌ମ୍‌ଡି ଟ୍‌ମ୍‌ଡି କଜି ତାକେ ମିଳାଅତ୍, ମ୍‍ତର୍ ଅମାର୍‌ମ୍‍ନ୍‍କାର୍ ଲ୍‌ଗେ ଇଶ୍ୱର୍‌ ଦୁରି ନାଇ।”

28ଗଟେଲକ୍ କଇଲା ଆଚେ, “ତାର୍ ଲ୍‌ଗେ ହ୍‌କା ଅମାର୍ ଜୀବନ୍, ଚାଲାବୁଲା ଆର୍ ଯା ଆସ୍ କ୍‌ର୍‌ତାର୍ ସ୍‌ବୁ ଆଚେ।” ତୁମାର୍ ଗିତ୍ ଲେକ୍‍ତା ଲକ୍ ଗଟେଲକ୍ କଇଲା ଆଚେ, “ଅମି ହେଁ ତାର୍ ହିଲାମ୍‌ନ୍।”

29ତ୍‍ବେ ଅମିମ୍‍ନ୍ ଇଶ୍ଵରାର୍ ହିଲାଜିଲା ଅଇଲୁ ଲାଗି ମାନାଇମ୍‌ନ୍ ତିଆର୍ କ୍‌ରିରିଲା ସନା, ରୁହା ଆର୍ ଟେଳାଇ ମୁର୍‌ତି ମ୍‌ନ୍‌କେ ଇଶ୍ଵରାର୍ ସ୍‍ଙ୍ଗ୍‍ ସ୍‍ମାନ୍ ବ୍‌ଲି କ୍‌ଉତାର୍ ଟିକ୍‌ନାଇ।

30ଲକ୍‍ମ୍‍ନ୍ ଇଶ୍ଵର୍‍କେ ନ୍‌ଜାଣ୍‌ତା ଆଗେ ସେ ତାକାର୍ ଦସ୍ ଦ୍‍ରି ନ୍‌ରିଲା, ମ୍‍ତର୍ ସେ ଅବେ ସ୍‌ବୁ ଲକ୍‌ମ୍‍ନ୍‌କେ ସେମ୍‍ନ୍‍କାର୍ ପାପେହ୍‌ଣି ମ୍‌ନ୍ ବାଦ୍‍ଲାଇ କ୍‍ରି ଆସୁକେ ଆଦେଶ୍ ଦିଲାଆଚେ।

31କାଇତାକ୍ ସେ ଗଟେଦିନ୍ ତିଆର୍ କ୍‌ଲାଆଚେ ସେଦିନ୍ ସେ ତାର୍ ବାବିରିଲା ମାନାଇର୍ ସ୍‍ଙ୍ଗ୍‍ ହୁର୍‌ତିବିର୍ ବିଚାର୍‌ କ୍‍ରେଦ୍, ସେ ମାନାଇକେ ସେ ମ୍‌ଲାତ୍‌ଇହ୍‌ଣି ଉଟାଇକ୍‌ରି ଅମୁକେ ଜାଣାଇ ଦିଲାଆଚେ।

32ଯୀଶୁ ମ୍‌ଲାତ୍‌ଇହ୍‌ଣି ଜୀବନ୍ ହାଇକ୍‍ରି ଉଟ୍‌ଲା କ୍‌ତାଶୁଣି ସେତିରିଲା କ୍‍ତେକ୍ ଲକ୍‍ମ୍‍ନ୍ ପାଉଲ୍‌କେ ଲାଜ୍ କ୍‌ଲାଇ, ମ୍‍ତର୍ କ୍‍ତେକ୍ ଲକ୍‍ମ୍‍ନ୍ କଇଲାଇ। ଇକ୍‍ତା ଅମିମ୍‍ନ୍ ଆରେକ୍‌ ଶୁଣୁକେ ମ୍‌ନ୍ କ୍‌ରୁଲୁ।

33ସେ ଦିନ୍ ପାଉଲ୍ ସ୍‌ବୁ ସ୍‌ରାଇ କ୍‍ରି ବାରିଗ୍‍ଲା।

34ମ୍‍ତର୍ କ୍‍ତେକ୍ ଲକ୍‍ମ୍‍ନ୍ ତାର୍ କ୍‌ତାକେ ବିଶ୍‍ବାସ୍ କ୍‌ଲାଇ। ସେମ୍‍ନ୍‍କାର୍ ବିତ୍‌ରେ ଏରିୟାପାଗୀୟ, ଦିୟନୂସୀୟ ଦାମାରି ନାଉର୍ ଗଟେକ୍ ମାଇଜି ଟକି ଆର୍ ସେମ୍‍ନ୍‍କାର୍ ସ୍‍ଙ୍ଗ୍‍ କ୍‍ତେକ୍ ଲକ୍‍ମ୍‍ନ୍ ରିଲାଇ।

← Chapter 16 Jump to: Chapter 18 →