Acts 21

Bodo BDVNT (ବ୍‌ଡ଼୍ ହ୍‌ର୍‌ଜା ବାଇବଲ)

1ସେମ୍‌ନ୍‌କେ ଚାଡିକ୍‌ରି ଗ୍‍ଲାହ୍‌ଚେ ଅମିମ୍‍ନ୍ ଜାଜେ ଚ୍‌ଗି କୋସ୍ ଦ୍ବୀପ୍‌କେ ଆଇଲୁ, ତାର୍ ଆରେଗଟ୍ ଦିନ୍ ରୋଦ ଦ୍ବୀପ୍ ଲ୍‌ଗେ ଆଇଲୁ, ଆର୍ ସେ ଜାଗାଇ ହ୍‍ଣି ଅମି ପାତାରା ସ୍‌ହରେ କେଟ୍‌ଲୁ।

2ସେତି ଅମିମ୍‍ନ୍ ଫେନିକିଆକେ ଜାତିରିଲା ଗଟେକ୍ ଜାଜ୍ ଦ୍‍କ୍‍ଲୁ ଆର୍ ସେତି ଚ୍‌ଗିକ୍‌ରି ଅମି ଗ୍‌ଲୁ।

3ତାର୍‌ହ୍‌ଚେ ଅମିମ୍‍ନ୍ କୁପ୍ର ଦ୍ବୀପ୍‌କେ ଦ୍‍କ୍‍ଲୁ, ଆର୍ ଡେବ୍‌ରି ବାଟ୍ ଅଇକ୍‌ରି ସିରିୟା ଦେଶେ ଗ୍‌ଲୁ, ଆର୍ ସର୍ ସ୍‌ହରେ କେଟ୍‌ଲୁ, କାଇତାକ୍ ସେତି ଜାଜେହ୍‌ଣି ଜିନିଷ୍ ହ୍‌ତାର୍ ଉତ୍‌ରାଉତାର୍ ରିଲି।

4ସେତି ଅମି କ୍‍ତେକ୍ ବିଶ୍‍ବାସି ଚେଲାମ୍‍ନ୍‍କେ ବେଟ୍ ହାଇଲୁ, ଆର୍ ସେତି ସାତ୍‌ଦିନ୍ ରିଲୁ। ପବିତର୍ ଆତ୍ମାର୍ ଆଦେଶ୍ ହାଇକ୍‍ରି ସେମ୍‍ନ୍ ପାଉଲ୍‌କେ ଯିରୁଶାଲମ୍‌ ସ୍‌ହରେ ଜ୍‌ମ୍‌କେ ମ୍‍ନା କ୍‌ଲାଇ।

5ସେମ୍‍ନ୍‍କାର୍ ସ୍‍ଙ୍ଗ୍‍ ସାତ୍‌ଦିନ୍ ରିଲା ହ୍‌ଚେ, ଅମିମ୍‍ନ୍ ସେମ୍‌ନ୍‌କେ ଚାଡିକ୍‌ରି ଗ୍‌ଲୁ, ଅମୁକେ ଚାଡି ଦେମ୍‌କେ ସେମ୍‍ନ୍ ତାକାର୍ ଡକୁର୍‌ସି ଆର୍ ତାକାର୍ ହିଲାମ୍‌ନ୍ ହେଁ ସ୍‍ମ୍‍ଦୁର୍ କ୍‌ଣ୍ତିହ୍‌ତେକ୍ ଚାଡୁକେ ଆଇଲାଇ,

6ଆରେକ୍‌ ଅମିମ୍‍ନ୍ ସେତି ସ୍‌ବୁଲକ୍ ମାଣ୍ତିକୁଟା ଟେସି ପାର୍‌ତେନା କ୍‍ଲୁ, ତାର୍‌ହ୍‌ଚେ ସେମ୍‍ନ୍‍କାର୍ ସ୍‍ଙ୍ଗ୍‍ କ୍‌ତାବାର୍‍ତା କ୍‍ଲୁ ଆର୍ ଚାଡ୍‌ଲୁ। ତାର୍‌ହ୍‌ଚେ ଅମିମ୍‍ନ୍ ଜାଜେ ଚ୍‌ଗ୍‌ଲୁ, ଆର୍ ସେମ୍‍ନ୍ ଗ୍‍ରେ ଲେଉଟି ଗ୍‍ଲାଇ।

7ସର୍ ସ୍‌ହରେ ହ୍‍ଣି ଅମିମ୍‍ନ୍ ଡଙ୍ଗାଇ ଗ୍‌ଲୁ ଆର୍ ପତଲିମାଇ ଦେଶେ ହଚ୍‌ଲୁ, ଆର୍ ବିଶ୍‍ବାସି ବାଇମ୍‌ନ୍‌କେ ମିଳାମିଶା କ୍‍ଲୁ, ଗଟେଦିନ୍ ସେମ୍‍ନ୍‍କାର୍ ସ୍‍ଙ୍ଗ୍‍ ରିଲୁ।

8ତାର୍ ଆରେଗଟ୍ ଦିନ୍ ସେ ଜାଗାଚାଡି ଅମିମ୍‍ନ୍ କାଇସରିୟା ସ୍‌ହରେ ଗ୍‌ଲୁ। ବିଦବାମ୍‌ନ୍‌କେ ସେବା କ୍‌ରୁକେ ଜୁଇ ସାତ୍ ଲକ୍‌କେ ଯିରୁଶାଲମ୍‌ ସ୍‌ହରେ ବାଚି ରିଲାଇ ସେ ବିତ୍‌ରେ ଏ ଫିଲିପ୍ପ ରିଲା। ସୁବ୍‌କ୍‌ବର୍ ପର୍‍ଚାର୍ କ୍‌ର୍‌ତାଲକ୍ ଫିଲିପ୍ପାର୍ ଗ୍‍ରେ ଗ୍‍ଲାଇ ତାର୍‌ସ୍‍ଙ୍ଗ୍‍ ରିଲାଇ।

9ତାର୍ ଚାରିଗଟ୍ ବିବା ଅଇନ୍‌ରିଲା ଦ୍‌ଙ୍ଗ୍‌ଳି ଟକି ମାପ୍‌ରୁର୍ ବାବବାଣି କ୍‌ଉତିରିଲାଇ।

10ଅମିମ୍‍ନ୍ ସେ ଜାଗାଇ ବେସିଦିନ୍‌ ରିଲା ହ୍‌ଚେ ଆଗାବ୍ ନାଉର୍ ଗଟେକ୍ ବବିଶତ୍ କ୍‌ତା କ୍‌ଉତାଲକ୍ ଯିହୁଦା ଜିଲାଇ ହ୍‍ଣି ଆଇଲା।

11ସେ ଅମାର୍ ଲ୍‌ଗେ ଆସିକ୍‍ରି ପାଉଲାର୍ ଅଟାଇ ବାନ୍ଦି ଅଇରିଲା ବେଲ୍‌ଟ୍ ଦ୍‍ର୍‍ଲା, ଆର୍ ପାଉଲ୍ ନିଜେ ଆତେ ଗଡେ ବାନ୍ଦିକ୍‌ରି କଇଲାଇ, “ପବିତର୍ ଆତ୍ମା ମକେ ଜାଣାମ୍‌ଲି, ଇ ଅଟାଇ ବାନ୍ଦିରିଲା ବେଲ୍‌ଟ୍ ଯିରୁଶାଲମ୍‌ ସ୍‌ହରେ ବାସା କ୍‌ର୍‌ତାଲକ୍ ଯିହୁଦିମ୍‍ନ୍ ଅନ୍‌କ୍‌ରି ବାନ୍ଦି ଯିହୁଦି ଚାଡି ବିନ୍‍ଜାତି ଲକ୍‌ମ୍‌ନ୍‌କାର୍‌ ଆତେ ସ୍‌ହରି ଦେତି।”

12ଜ୍‌ଡେବ୍‌ଳ୍ ଇ ସ୍‌ବୁକ୍‍ତା ଶୁଣିକ୍‍ରି ଅମିମ୍‍ନ୍ ଆର୍ ସେତିରିଲା ସ୍‌ବୁ ଲକ୍‍ମ୍‍ନ୍ ପାଉଲ୍‌କେ ଯିରୁଶାଲମ୍‌ ସ୍‌ହର୍‌କେ ନ୍‌ଜାମ୍‌କେ ଅନୁରଦ୍ କ୍‍ଲୁ।

13ମ୍‍ତର୍ ପାଉଲ୍ କଇଲା, “ତୁମିମ୍‍ନ୍ କାନ୍ଦିକ୍‌ରି ଆର୍ ମର୍ ମ୍‌ନ୍‌ଦୁକ୍ କ୍‍ରୁଲାସ୍? କାଇତାକ୍ ମୁଇ ମାପ୍‌ରୁ ଯୀଶୁର୍ ଗିନେ ଯିରୁଶାଲମ୍‌ ସ୍‌ହରେ ବାନ୍ଦାଇ ଅମ୍‍କେ ତିଆର୍ ଅଇଲେଆଚି, କାଇତାକ୍ ସେରି ନଇ, ମ୍‍ତର୍ ମାପ୍‌ରୁ ଯୀଶୁର୍ ଗିନେ ମ୍‌ରୁକ୍ ହେଁ ତିଆର୍ ଅଇଲେଆଚି।”

14ଅମିମ୍‍ନ୍ ପାଉଲ୍‌କେ ବୁଜାଇ ବୁଜାଇ ତାକ୍‌ଲୁ ସେ ନ୍‌ମାନ୍‌ଲାକେ ଅମି କଇଲୁ, “ମାପ୍‌ରୁର୍ ଇଚା ହୁରା ଅଉଅ।”

15ଅମିମ୍‍ନ୍ ସେତି କ୍‍ତିଦିନ୍ ରିଲା ହ୍‌ଚେ ଅମାର୍ ଜିନିଷ୍ ହ୍‌ତାର୍ ନ୍ଇକ୍‌ରି ଯିରୁଶାଲମ୍‌ ସ୍‌ହରେ ଗ୍‌ଲୁ।

16କାଇସରିୟା ସ୍‌ହରାର୍‌ କ୍‍ତେକ୍ ଚେଲାମ୍‌ନ୍ ହେଁ ଅମାର୍ ସ୍‍ଙ୍ଗ୍‍ ଗ୍‍ଲାଇ, ସେମ୍‍ନ୍ ସାଇପ୍ରସ୍ କୁପ୍ର ଦ୍ବୀପାର୍ ମନାସୋନ୍ ନାଉର୍ ହ୍‌ର୍‌ନା ଚେଲା ଗ୍‍ରେ ରେମ୍‌କେ ଅମୁକେ ନିଲା ସେ ହେଁ ଅମାର୍ ସ୍‍ଙ୍ଗ୍‍ ରିଲା।

17ଜ୍‌ଡେବ୍‌ଳ୍ ଅମିମ୍‍ନ୍ ଯିରୁଶାଲମ୍‌ ସ୍‌ହରେ ହଚ୍‌ଲୁ ଅମୁକେ ବିଶ୍‍ବାସି ବାଇମନ୍ ସ୍‍ର୍‍ଦା ଅଇକ୍‌ରି କୁଦି ନିଲାଇ।

18ତାର୍ ଆରେଗଟ୍ ଦିନ୍ ଯାକୁବ୍‍କେ ଦ୍‌କୁକେ ପାଉଲାର୍ ସ୍‍ଙ୍ଗ୍‍ ଗ୍‌ଲୁ, ଆର୍ ସେ ଜାଗାଇ ମ୍‌ଣ୍ଡଳିର୍ ପାରାଚିନ୍‍ମ୍‍ନ୍ ରୁଣ୍ଡି ରିଲାଇ।

19ପାଉଲ୍ ସେମ୍‌ନ୍‌କେ ଜୁଆର୍ କ୍‌ଲାହ୍‌ଚେ ଯିହୁଦି ଚାଡି ବିନ୍‍ଜାତି ଲକ୍‌ମ୍‌ନ୍‌କାର୍‌ ଲ୍‌ଗେ ଇଶ୍ଵରାର୍ ଜୁଇସ୍‌ବୁ କ୍‌ଲାଆଚେ ତାର୍ ସ୍‌ବୁ ଗଟେକ୍ ଗଟେକ୍ କ୍‍ରି କଇଲା।

20ତାର୍‌କ୍‍ତା ଶୁଣ୍‌ଲା ହ୍‌ଚେ ସେମ୍‍ନ୍ ଇଶ୍ଵରାର୍ ମଇମା କ୍‌ଲାଇ, ହ୍‌ଚେ ସେମ୍‍ନ୍ କଇଲାଇ, “ବାଇ ପାଉଲ୍, ଅବେ ହ୍‌ଜାର୍ ହ୍‌ଜାର୍ ଯିହୁଦିମ୍‍ନ୍ ମାପ୍‌ରୁ ଯୀଶୁର୍ ଲ୍‌ଗେ ବିଶ୍‍ବାସ୍ କ୍‌ରୁଲାଇ, ଇରି ତୁମିମ୍‍ନ୍ ଜାଣିଆଚାସ୍, ସେ ସ୍‌ବୁଲକ୍ ମୋଶା ବବିଶତ୍ କ୍‌ତା କ୍‌ଉତା ଲକାର୍ ବିଦିବିଦାନ୍‌କେ ବ୍‌ଲ୍‌ବାବେ ମାନୁଲାଇ”।

21ସେମ୍‌ନ୍ ଶୁଣି ଆତ୍‍ତି ଯେ ତୁଇ ଯିହୁଦି ଚାଡି ବିନ୍‍ଜାତି ଲକ୍‌ମ୍‌ନ୍‌କାର୍‌ ଦେଶେ ବାସାକ୍‌ରିରିଲା ଯିହୁଦିମ୍‌ନ୍‌କେ ମୋଶାର୍ ବିଦିବିଦାନ୍‌କେ ଚାଡୁକେ ଆର୍ ସେମ୍‍ନ୍‍କାର୍ ହିଲାମ୍‍ନ୍‍କେ ସୁନତ୍ ନ୍‍କେରୁକେ, ଯିହୁଦି ବିଶ୍‍ବାସିମ୍‌ନ୍‌କେ ନ୍‌ମାନୁକେ ସ୍‌ବୁ ରିତୀନିତୀ ବିଷୟେ ଶିକ୍ୟା ଦେମ୍‍ଲିସ୍।

22ତୁଇ ଇତିକେ ଆସି ଆଚ୍‌ସି ବ୍‌ଲି ସେମ୍‍ନ୍ ସ୍‌ତ୍‌କ୍‌ରି ଶୁଣ୍‍ତି, ତ୍‍ବେ ଅମି କ୍‌ନ୍‌କ୍‌ରୁନ୍ଦ୍।

23ତୁଇ ଗଟେକ୍ କାମ୍ କ୍‌ର୍‌ବ୍‍ଲି ଅମିମ୍‍ନ୍ କ୍‌ମ୍‌ଲୁ, ଇତିରିଲା ଚାରିଲକ୍ ଜୁଇରି ମାପ୍‌ରୁକେ ମାନ୍‍ତି କ୍‌ଲାଇ ଆତ୍‍ତି ସେ ତାକେ ଆଗାର୍ ଦିନ୍ ଇସ୍ରାଏଲ୍ ଲକ୍‌ମ୍‌ନ୍‌କାର୍‌ ନିୟମ୍ ରିଲି।

24ସେମ୍‍ନ୍‍କାର୍ ସ୍‍ଙ୍ଗ୍‍ ତୁଇ ଜା ଆର୍ ସେମ୍‍ନ୍‍କାର୍ ସ୍‍ଙ୍ଗ୍‍ ସୁତୁକ୍ ଅଉ, ଆର୍ ସେମ୍‍ନ୍‍କାର୍ ଜ୍‌ତେକ୍ କ୍‌ର୍‌ଚ ଅଇଦ୍ ସେରି ତୁଇ ଦେସ୍, ତ୍‍ବେ ସେମ୍‍ନ୍ ତାକାର୍ ନିଜାର୍ ନିଜାର୍ ମୁଣ୍ତାର୍ ବାଳ୍ କୁରାଉତି। ତ୍‍ବେ ଜାଣା ହ୍‌ଳେଦ୍ ଯେ ତର୍ ବିଷୟେ ସେମ୍‍ନ୍ ଜୁଇରି ସ୍‌ବୁ ସେମ୍‍ନ୍ ଶୁଣି ଆତ୍‍ତି ସେସ୍‍ବୁ ମିଚ୍‌, ତୁଇ ଯେ ମୋଶାର୍ ବିଦିବିଦାନ୍ ହର୍ କାମ୍ କ୍‍ରୁଲିସ୍, ଇରି ସ୍‌ବୁଲକ୍ ଜାଣ୍‌ତି।

25ମ୍‍ତର୍ ଜୁଇ ଯିହୁଦି ଚାଡି ବିନ୍‍ଜାତି ଲକ୍‍ମ୍‍ନ୍ ବିଶ୍‍ବାସ୍ କ୍‌ଲାଇ ଆତ୍‍ତି, ଅମାର୍ ଆଦେଶ୍ ହର୍ ସେମ୍‍ନ୍ ମୁର୍‌ତିଲ୍‌ଗେ ହୁଜା କ୍‌ରିରିଲା କାଦି ନ୍‍କାତି, ବ୍‌ନି ହେଁ ନ୍‍କାତି, ଗ୍‌ଳାହିଚି ମାରିରିଲା ମାସ୍ ନ୍‍କାତି ଆର୍ ଦାରିକାମ୍ ନ୍‌କେର୍‌ତି, ଇ ସ୍‌ବୁ ଚିଟିଲ୍‌ଗେ ସେମ୍‌ନ୍‌କେ ଆଦେଶ୍ ଦିଲୁ ଆଚୁ।

26ତାର୍‌ହ୍‌ଚେ ପାଉଲ୍ ସ୍‍ବୁଲକାର୍‌ ଲ୍‌ଗେ ଜାଇ ସ୍‌ବ୍‍କେ ସୁତୁକ୍ କ୍‍ଲା, ଆର୍ ଗଟେଦିନ୍ ସେମ୍‍ନ୍‍କାର୍ ସ୍‍ଙ୍ଗ୍‍ ନିଜ୍‍କେ ସୁତୁକ୍ କ୍‍ରେଦ୍ ଆର୍ ମନ୍ଦିର୍ ବିତ୍‌ରେ ହୁରେଦ୍, ଆର୍ କ୍‌ଡେବ୍‌ଳ୍ ତାକେ ବଳି ଦେମ୍‌କେ ହ୍‌ଳେଦ୍ ସେସ୍‍ବୁ ସେମ୍‍ନ୍ ତାକେ କଇଲାଇ।

27ସେ ସାତ୍‌ଦିନ୍ ହୁର୍‌ଲି ସ୍‌ଡେବ୍‌ଳ୍ ଆସିଆ ଦେଶେହ୍‌ଣି କ୍‍ତେକ୍ ଆସିରିଲା ଯିହୁଦିମ୍‍ନ୍ ପାଉଲ୍‌କେ ମନ୍ଦିରେ ଦ୍‍କ୍‍ଲାଇ, ସେମ୍‍ନ୍ ସେତିରିଲା ଲକ୍‌ମ୍‍ନ୍‌କେ କଇକ୍‌ରି ଦ୍‌ର୍‌ଲାଇ, ଆର୍ ସେମ୍‍ନ୍ ବେଲ୍‌କି ଅଇକ୍‌ରି କଇଲାଇ।

28ଏ ଇସ୍ରାଏଲ୍ ଲକ୍‍ମ୍‍ନ୍, ଅମୁକେ ସାଇଜ କ୍‍ରା। ଇମାନାଇ ସ୍‌ବୁ ଜାଗାଇ ଜାଇକ୍‍ରି ଇସ୍ରାଏଲ୍ ଲକ୍‌ମ୍‌ନ୍‌କାର୍‌ ବିରୁଦେ, ମୋଶାର୍ ବିଦିବିଦାନ୍ ବିରୁଦେ, ଆର୍ ଇମନ୍ଦିର୍ ବିରୁଦେ ଶିକ୍ୟା ଦେମ୍‍ଲା। ଆର୍ ସେ ଯିହୁଦି ଚାଡି ବିନ୍‌ଜାତିର୍ ଲକ୍‌ମ୍‍ନ୍‌କେ ମନ୍ଦିରେ ଆଣି ଇ ପବିତର୍‌ ଜାଗାକେ କ୍‍ରାପ୍ କ୍‌ରୁଲା।

29ସେମ୍‍ନ୍ ଇକ୍‍ତା କାଇତାକ୍ କଇଲାଇ ସେମ୍‍ନ୍ ସ୍‌ହର୍ ବିତ୍‌ରେ ପାଉଲାର୍ ସ୍‍ଙ୍ଗ୍‍ ଏଫିସୀ ସ୍‌ହରାର୍‌ ତ୍ରଫିମକେ ଦ୍‍କି ରିଲାଇ, ଆର୍ ସେମ୍‍ନ୍ ବାବ୍‌ଲାଇ ଯେ ପାଉଲ୍ ତାକେ ମନ୍ଦିରେ ଆଣି ରେଇଦ୍ ବ୍‌ଲି ଅନୁମାନ୍ କ୍‌ଲାଇ।

30ପାଉଲ୍ ମନ୍ଦିରେ ସେ କ୍‍ଲା କାମାର୍ ବିଷୟ୍ ଗୁଳା ସ୍‌ହର୍ ଆଉଜି ଅଇଲି, ଲକ୍‍ମ୍‍ନ୍ ଗଟେତ୍ଇ ରୁଣ୍ତଲାଇ, ଆର୍ ସେମ୍‍ନ୍ ପାଉଲ୍‌କେ ଦ୍‍ରି ମନ୍ଦିର୍ ବିତ୍‌ରେହ୍‌ଣି ହ୍‌ଦାଇ ଜିକି ଆନ୍‍ଲାଇ। ଆର୍ ସେମାଡେ କାହାଟ୍ ବ୍‌ନ୍ଦ୍ କ୍‌ଲାଇ।

31ଆରେକ୍‌ ରିସା ଅଇରିଲା ଲକ୍‍ମ୍‍ନ୍ ପାଉଲ୍‌କେ ମ୍‌ର୍‌ନେ ମାରୁକେ ଚେଷ୍ଟା କ୍‌ଲାଇ, ସ୍‌ଡେବ୍‌ଳ୍ ଯିରୁଶାଲମ୍‌ ସ୍‌ହରେ ମାଡ୍‌ଗଳ୍ ଅମ୍‌ଲାଇ ବ୍‌ଲି ଶୁଣି ହ୍‌ଜାର୍ ସେନାର୍ ମୁକିଆ ମ୍‌ନ୍‌କେ କ୍‌ବର୍ ଆଇଲି।

32ସେମାଡେ ଶଇନ୍‌ମ୍‌ନ୍ ଆର୍ ଶଏ ସେନାର୍ ଅଦିକାରି କୁଦିକ୍‍ରି ସେମ୍‍ନ୍‍କାର୍ ଲ୍‌ଗେ ଦ୍‍ବ୍‍ଳି ଗ୍‍ଲା, ମାର୍‍ତି ରିଲା ଲକ୍‍ମ୍‍ନ୍ ହ୍‌ଜାର୍ ସେନାର୍ ମୁକିଆ ଆର୍ ଶଇନ୍‌ମ୍‌ନ୍‌କେ ଦ୍‌ରିକ୍‌ରି ପାଉଲ୍‌କେ ମାରୁକେ ବ୍‌ନ୍ଦ୍‌ କ୍‌ଲାଇ।

33ସ୍‌ଡେବ୍‌ଳ୍ ହ୍‌ଜାର୍ ସେନାର୍ ମୁକିଆ ଆସି ଜଳେକ୍ ଲ୍ଉଆର୍ ସିକ୍‍ଳି ସ୍‍ଙ୍ଗ୍‍ ପାଉଲ୍‌କେ ବାନ୍ଦୁକେ ଆଦେଶ୍ ଦିଲା, ତାର୍‌ହ୍‌ଚେ ସେ ହ୍‌ଚାର୍‌ଲା ସେ କେ, ଆର୍ ସେ କାଇକାମ୍ କ୍‌ରୁଲା ବ୍‌ଲି ହ୍‌ଚାର୍‌ଲା।

34ସେତି ଲକ୍‌ମ୍‌ନ୍‌କାର୍‌ ବିତ୍‌ରେ ଲକ୍‍ମ୍‍ନ୍ ବିନ୍‌ବିନ୍ ରକମାର୍ କ୍‌ତା କଇକ୍‌ରି ବେଲ୍‌କି ଅଇଲାଇ। ଆର୍ କ୍‍ନ୍‍କ୍‍ରି ଗଣ୍ତ୍‌ଗଳ୍ ଅଇଲି ଯେ ହ୍‌ଜାର୍ ସେନାର୍ ମୁକିଆ ସ୍‌ତ୍ ଗଟ୍‍ଣା ଜାଣୁ ନ୍‌ହାର୍‌ଲା। ସେତାର୍‍ଗିନେ ସେ ପାଉଲ୍‌କେ ଶଇନ୍‌ମ୍‌ନ୍ ରେତା ବିତ୍‌ରେ ଦ୍‍ରିନିଆ ବ୍‌ଲି ଶଇନ୍‌ମ୍‌ନ୍‌କେ କଇଲା।

35ଆରେକ୍‌ ଜ୍‌ଡେବ୍‌ଳ୍ ସେମ୍‍ନ୍ ତାକେ ଦ୍‌ରିକ୍‌ରି ମନ୍ଦିରାର୍ ହାଉଜ୍ ଉହ୍‍ରେ ନିଲାଇ, ସ୍‌ଡେବ୍‌ଳ୍ ତାକେ ମାଡ୍‌ଗଳ୍ କ୍‌ର୍‌ତିରିଲା ଲକ୍‍ମ୍‍ନ୍ ବେସି କାଲାହୁଲି ଅଇଲାଇ ସେତାର୍‍ଗିନେ ଶଇନ୍‌ମ୍‌ନ୍ ପାଉଲ୍‌କେ ବୟ୍‌କ୍‌ରି ନିଲାଇ।

36କାଇତାକ୍ ଲକ୍‍ମ୍‍ନ୍ ତାର୍ ହ୍‌ଚହ୍‌ଚ୍ ଆସିକ୍‍ରି କ୍‌ଉତିରିଲାଇ, “ତାକେ ମ୍‌ର୍‌ନେ ମାରା।”

37ଶଇନ୍‌ମ୍‌ନ୍ ପାଉଲ୍‌କେ ସେନାର୍ ଗ୍‍ରେ ନିଲାବ୍‌ଳ୍ ପାଉଲ୍ କଇଲା, “ମୁଇ ତକେ କାଇରି କ୍‌ତା ଅମ୍‌ହାରି କି?” ହ୍‌ଜାର୍ ସେନାର୍ ମୁକିଆ ପାଉଲ୍‌କେ କଇଲା, “ତୁଇ ତ ଗ୍ରୀକ୍ ବାଷା ଜାଣ୍‌ସି?

38ତ୍‍ବେ ଅଳକ୍ ଦିନ୍ ଆଗେ ଜୁଇ ମିସର ଦେଶାର୍ ବିରଦ୍ କ୍‌ର୍‌ତା ଲକ୍‍ମ୍‍ନ୍ ମାଡ୍‌ଗଳ୍ କ୍‍ରି ଚାରିହ୍‌ଜାର୍ ଡାକୁ ମ୍‌ନ୍‌କେ ଦ୍‍ରି ହ୍‌ଟାଇରିଲା ଶୁନ୍‌ସାନ୍ ଜାଗାଇ ରୁଣ୍ତିରିଲାଇ, ତୁଇ ସେ ଲକ୍ ନଇକି?”

39ପାଉଲ୍ କଇଲା, “ମୁଇ ଗଟେକ୍ ଯିହୁଦିଲକ୍, କିଲିକିଆର୍ ବ୍‌ଡ୍ ସ୍‌ହର୍ ତାର୍ଷ ସ୍‌ହରେ ବାସାକ୍‌ଲା ଲକ୍, ଇ ଲକ୍‌ମ୍‍ନ୍‌କେ କ୍‌ତା କ୍‍ମ୍‍କେ ମକେ ଆଦେଶ୍ ଦେ।”

40ସେ କ୍‍ମ୍‍କେ ଆଦେଶ୍ ଦିଲାକେ ପାଉଲ୍ ମନ୍ଦିରାର୍ ହାଉଜ୍ ଉହ୍‍ରେ ଟିଆଅଇ ଆତ୍ ଦ୍‌କାଇକ୍‌ରି କଇଲା, ଆରେକ୍‌ ସେମ୍‍ନ୍ ଚୁପ୍ ଅଇଲାକେ, ଏବ୍ରୀ ବାଷାଇ ସେମ୍‌ନ୍‌କେ କ୍‌ତା ଅଇଲା,

← Chapter 20 Jump to: Chapter 22 →