Acts 6

Bodo BDVNT (ବ୍‌ଡ଼୍ ହ୍‌ର୍‌ଜା ବାଇବଲ)

← Chapter 5 Jump to: Chapter 7 →

1ଜ୍‌ଡେବ୍‌ଳ୍ ଚେଲାମ୍‌ନ୍ ବାଡୁକେ ଲାଗ୍‌ଲାଇ, ସ୍‌ଡେବ୍‌ଳ୍ ଗ୍ରୀକ୍ ବାଷା କ୍‌ଉତିରିଲା ଯିହୁଦି ବିଶ୍‍ବାସିମ୍‌ନ୍‌, ସେତି ବାସା କ୍‌ର୍‌ତିରିଲା ଗ୍ରୀକ୍ ବାଷା କ୍ଉତା ଯିହୁଦି ଆର୍ ଏବ୍ରୀ ବାଷା କ୍ଉତା ଯିହୁଦିମ୍‌ନ୍‌କାର୍ ମାଡ୍‌ଗଳ୍ ଆରମ୍ ଅଇଲି, ଦିନ୍‌କେ ଦିନ୍ ଜୁଇକାଦି ବାଟା କ୍‍ର୍‍ତିରିଲାଇ ସେ କାଦି ତାକାର୍ ରାଣ୍ତି ମାଇଜି ମ୍‌ନ୍‌କେ ନ୍‌ଦେମ୍‌ଲାଇ ବ୍‌ଲି ଗ୍ରୀକ୍ ବାଷା କ୍‌ଉତି ରିଲାର୍ ଲକ୍‍ମ୍‍ନ୍ ବିରଦ୍ କ୍‌ଲାଇ।

2ସେତାର୍‍ଗିନେ ସେ ବାରଗଟ୍ ହ୍‌ଟାଇଲା ଚେଲାମ୍‌ନ୍ ମ୍‌ଣ୍ଡଳିର୍ ସ୍‌ବୁ ବିଶ୍‍ବାସିମ୍‌ନ୍‌କେ କୁଦିକ୍‍ରି କଇଲାଇ, କାଦି ବାଟାକ୍‌ର୍‌ତା କାମେ ମାତି ରିଲେକ୍ ନୟ୍, ମ୍‍ତର୍ ଇଶ୍ଵରାର୍ ବାକ୍ୟ ପର୍‍ଚାର୍ କ୍‌ରୁକେ ଚାଡ୍‍ତାର୍ ଅମାର୍ ଗିନେ ଟିକ୍‌ନାଇ।

3ସେତାର୍‍ଗିନେ ଏ ବାଇମ୍‌ନ୍ ତୁମାର୍ ବିତ୍‌ରେହ୍‌ଣି ପବିତର୍ ଆତ୍ମା ହାଇରିଲା ଆର୍ ଗ୍ଯାନ୍ ରିଲା ସାତ୍ ଲକ୍‌କେ ବାଚା, ସେ ସାତ୍ ଲକ୍ ଇ ରାଣ୍ତି ମାଇଜି ମ୍‌ନ୍‌କେ ଦ୍‌କାଦ୍‌କି କ୍‌ରତ୍।

4ମ୍‍ତର୍ ଅମିମ୍‍ନ୍ ଦିନ୍‍ସାରା ପାର୍‌ତେନା ଆର୍ ପର୍‍ଚାର୍ ବ୍‌ଲ୍‌ବାବେ କ୍‌ରୁହାରୁନ୍ଦ୍‌।

5ତ୍‍ବେ ମ୍‌ଣ୍ଡଳିର୍ ବିଶ୍‍ବାସିମ୍‌ନ୍‌ ହ୍‌ଟାଇଲା ଚେଲାମ୍‌ନ୍‌କାର୍ କ୍‌ତାଇ ରାଜି ଅଇଲାଇ, ବିଶ୍‍ବାସ୍ ଆର୍ ପବିତର୍ ଆତ୍ମାଇ ବର୍‌ତି ଅଇରିଲାର୍ ସ୍ତିଫାନ୍ ନାଉଁର୍ ଗଟେକ୍ ମାନାଇ, ଫିଲିପ୍ପ, ପ୍ରଖରେ, ନୀକାନୋର୍, ତୀମୋନ୍, ପାମନା ଆର୍ ଅନ୍ତିୟଖିଆର୍ ଯିହୁଦି ଅଇରିଲାର୍ ନୀକଲାୟକେ ସେମ୍‍ନ୍ ବାଚ୍‌ଲାଇ,

6ହ୍‌ଟାଇଲା ଚେଲାମ୍‌ନ୍ ଇ ସାତ୍‍ଗଟ୍ ପାରାଚିନ୍‌ମ୍‌ନ୍‌କାର୍ ଉହ୍‍ରେ ଆତ୍ ସ୍‌ଙ୍ଗାଇ କ୍‍ରି ପାର୍‌ତେନା କ୍‌ଲାଇ।

7ଅନ୍‌କ୍‌ରି ଇଶ୍ଵରାର୍ ବାକ୍ୟ ଯିରୁଶାଲମ୍‌ ସ୍‌ହରେ ବାଡୁକେ ଲାଗ୍‌ଲି ଆର୍ ଚେଲାମ୍‌ନ୍ ହେଁ ବାଡୁକେ ଲାଗ୍‌ଲାଇ, ଗାଦି ଜାଜକ୍‍‍ମ୍‌ନ୍ ସ୍‌ବୁ ଯୀଶୁକେ ବିଶ୍‍ବାସ୍ କ୍‌ଲାଇ।

8ସ୍ତିଫାନ୍ ଇଶ୍ଵରାର୍ ତ୍‌ଇହ୍‌ଣି ବେସି ଆଶିର୍‌ବାଦ୍‌ ଆର୍ ଶ୍‌କ୍‌ତି ହାଇରିଲା, ଲକ୍‌ମ୍‌ନ୍‌କାର୍‌ ବିତ୍‌ରେ ସେ ବ୍‍ଡ୍ ବ୍‍ଡ୍ କାବାକାମ୍ ଆର୍ ଚାନିଆକାମ୍‍ ସ୍‍ବୁ କ୍‌ଲାଆଚେ।

9ମ୍‍ତର୍ ଲିବତ୍ତୀନ୍, କୂରୀଣୀୟ ଆର୍ ଆଲେକ୍‌ଜାଣ୍ତାର୍ ତ୍‌ଇହ୍‌ଣି ମୁକ୍‌ଳିରିଲା, ଯିହୁଦିମ୍‌ନ୍‌କାର୍ ଗିନେ ତିଆର୍ ଅଇରିଲା ପାର୍‌ତେନା ଗ୍‍ରେ କ୍‌ତିଲକ୍‌ମ୍‌ନ୍ ସ୍ତିଫାନ୍‌କେ ବିରଦ୍ କ୍‌ଲାଇ, ସେମ୍‍ନ୍ ଅଇଲାଇ କିଲିକିଆ ସ୍‌ହରାର୍ ଆର୍ ଆସିଆ ଦେଶାର୍ ବିନ୍‌ସ୍‌ବୁ ଯିହୁଦି ଲକ୍‍ମ୍‍ନ୍, ସେମ୍‍ନ୍ ସ୍ତିଫାନାର୍ ସ୍‍ଙ୍ଗ୍‍ ଟେକାଟେକି ଅମ୍‍କେ ଲାଗ୍‌ଲାଇ,

10ମ୍‍ତର୍ ଇଶ୍ୱର୍‌ ସ୍ତିଫାନ୍‌କେ ଅନ୍‌କ୍‌ରି ଗିଆନ୍ ଦିଲାଯେ, କେ ହେଁ ତାର୍‌ସ୍‍ଙ୍ଗ୍‍ ଟେକାଟେକି ଅମ୍ ନ୍‌ହାର୍‍ଲାଇ।

11ସେତାକ୍ ସେମ୍‍ନ୍ ଲକ୍‌ମ୍‍ନ୍‌କେ ଲାଚ୍ ଦ୍‌ଇକ୍‌ରି ମିଚ୍ ସାକି ଦେମ୍‌କେ ଟିଆ କ୍‌ଲାଇ, ଆର୍ ସେମ୍‌ନ୍‌କେ ଶିକାଇଲାଇ, ଇ ମାନାଇ ମୋଶାର୍‌ ବିଦିବିଦାନାର୍‌ କ୍‌ତା କ୍‌ଉତା ଲକାର୍‌ ବିରୁଦେ ଆର୍ ଇଶ୍ଵରାର୍ ବିରୁଦେ ଲିନ୍ଦାକ୍‍ତା କ୍‌ଉତି ରିଲାର୍ ଅମିମ୍‍ନ୍ ଶୁଣିଆଚୁ।

12ଆର୍ ସେମ୍‍ନ୍ ଲକ୍‌ମ୍‍ନ୍‌କେ ଅନ୍‌କ୍‌ରି କଇକ୍‌ରି, ପାରାଚିନ୍‌ମ୍‌ନ୍‌କେ, ଆର୍ ନିଆଇ ଶିକାଉତା ଲକ୍‌ମ୍‍ନ୍‌କେ ରିସା କ୍‌ରାଇଲାଇ, ଆର୍ କୁଟୁମ୍ ବ୍‌ସ୍‌ଲା ତ୍‌ଇହ୍‌ଣି ସ୍ତିଫାନ୍‌କେ ଦ୍‍ରି ନିଲାଇ।

13ଆର୍ ତାର୍‌ହ୍‌ଚେ ସେମ୍‍ନ୍ ମିଚ୍‌ ସାକି ଦେତାର୍ ଗିନେ କ୍‍ତେକ୍ ଲକ୍‌ମ୍‍ନ୍‌କେ ବିତ୍‌ରେ ଆନ୍‍ଲାଇ। ସେମ୍‍ନ୍ କଇଲାଇ, ଇ ମାନାଇ ସ୍‌ବୁବ୍‌ଳ୍ ଅମାର୍ ମନ୍ଦିର୍ ବିତ୍‌ରେ, ମୋଶା ବବିଶତ୍ କ୍‌ତା କ୍‌ଉତା ଲକାର୍ ବିଦିବିଦାନ୍ ବିରୁଦେ ଲିନ୍ଦା କ୍‌ଲାର୍ ଅମିମ୍‍ନ୍ ଶୁଣିଆଚୁ।

14କାଇତାକ୍ ସେ କ୍‌ଉତିରିଲା ଯେ ନାଜରିତୀୟ ଯୀଶୁ ଇ ମନ୍ଦିର୍‍କେ ବାଙ୍ଗି ଦ୍‌ଇଦ୍, ଆର୍ ମୋଶା ବବିଶତ୍ କ୍‌ତା କ୍‌ଉତା ଲକାର୍ ତ୍‌ଇହ୍‌ଣି ହାଇରିଲା ବିଦିବିଦାନ୍ ସ୍‌ବୁ ବାଦ୍‌ଲାଇଦ୍ ବ୍‌ଲି କ୍‌ଉତିରିଲାର୍ ଅମିମ୍‍ନ୍ ଶୁଣିଆଚୁ।

15ସ୍‌ଡେବ୍‌ଳ୍ ସେତି ବ୍‍ଡ୍ ମିଟିଙ୍ଗେ ବ୍‍ସିରିଲା ସ୍‌ବୁ ଲକ୍‍ମ୍‍ନ୍ ଆକିର୍ ହାଣି ମ୍‌ରାଇ କ୍‍ରି ସ୍ତିଫାନ୍‌କେ ଦ୍‍କ୍‍ଲାଇ, ମ୍‍ତର୍ ତାର୍ ମୁଉଁ ସ୍‌ର୍‌ଗ୍‌ ଦୂତ୍ ତାର୍ ମୁଉଁ ହର୍ ଡିସ୍‌ତିରିଲି।

← Chapter 5 Jump to: Chapter 7 →