Ezekiel 10

Chin (Mara Bible RV (BSI))

← Chapter 9 Jump to: Chapter 11 →

1Chatawhcha moh na ta, cherubizy luh chô vâphuh ahlôpa chô liata beidyuchhai a lyupa saphai lôsôhpa hmô na ta.

2Abeipa ta pala rih dipa chysia a tobipa hnohna khata, “Cherubizy ry liata tiaki a pahieh ngâpazy likawh liata a kei ngia la, cherubizy likawh ta meihei iapa hao na ku kârano biepa ta kei phâ la, khihpi chô liata hiezâh mah y,” tah ta. Ei mohmô lia tlai ta a ngia ha ta.

3Chyhsa ta Achhyna o chhô lâ â ngia nota, cherubizy cha Achhyna o chho lâ chhâh ta a duah thlâh ha ei ta, Achhyna o chhôh liata tlyhmia zydua cha meihdo ta bie khai ha ta.

4Abeipa rônahna cha cherubizy tawhta thyu ta, Achhyna o chhikao lâ a kaw pasie ta. Achhyna o cha meihdo ta bie ha ta, dôhpachhôh tlyhmia cha Abeipa rônahna khaihna ta a bie haw.

5Cherubizy mathlaw pyu cha, khôtho lâta dôhpachhôh tlyhmia tawh chhao ta thei theipa a châ. Khazohpa Atotaotheipa ta bie a rei nota a ao nata â lyu.

6Pala rih dipa chysia a tobipa hnohta, “Cherubizy likawh liata tiaki a pahieh ngâpazy tawhta mei kei la teh,” tahpa ta bie a pie no kha, a kei ngia ta, tiaki kiapâh liata a duah ta.

7Cherubi pakha ta cherubizy likawh tawhta a ku vaw pazawh ta, cherubizy likawh ta mei a ypa cha kei paza ta. Thokha la ta, pala rih dipa chysia a tobipa ku liata soh ta, ano ta la ta, pua ha ta.

8Cherubizy cha ama mathlawzy ry liata chyhsa ku hawhpa a hneipa lyu ei ta.

9Chatawhcha moh na ta, cherubizy kiapâh liata tiaki miapalih hmô na ta. Cherubi pakha kiapâh liata tiaki miakha lymâ y ta, tiakizy alânazie cha beri lôsôhpa hawhta a patliepa ama châ.

10Tiaki miapalihzy cha ama pizie a lyu khai ta, tiaki miakha chhôh liata tiaki hropa a ypa hawhta a châ.

11Ama sie tita, tiaki miapalihpazy aheina lâ maih sie ei ta, a palie byuh leipa ta ama sie lymâ. A hmia lâta a ypa tiaki aheina lâ maih sie ei ta, ahropazy ta a palie byuh leipa ta ama pazi lymâ.

12Cherubizy cha ama pôhpa zydua, ama kyzy, ama kuzy nata ama mathlawzy mokhaohzy ta bie ei ta, ama tiaki miapalihpazy chhao mokhaohzy ta a bie.

13Tiakizy cha ei nah theina lia tlai ta, “Tiaki a pahieh ngâpazy,” tahpa ta awpa a châ.

14Cherubizy cha hmia miapalih chyu hnei ei ta, hmia khana cha cherubi hmia châ ta, hmia nona cha chyhsapa hmia châ ta, hmia thôhna cha chakeibarôhneipa hmia châ ta, hmia palihna cha pahmôhpi hmia a châ.

15Chatawhcha cherubizy cha chalopa châ ha ei ta. Hezy he Khebâ chavah kiah liata ei hmôpa hmohrohneipazy kha ama châ.

16Cherubizy ama sie nahta, tiakizy chhao ama kiapâh liata ama sie lymâ hra. Cherubizy ta alei tawhta a zaw awpa ta ama mathlawzy ama pakai nahta, tiakizy ta ama kiapâh tawhta a liesai veih ei.

17Hmohrohneipazy thlahpa cha tiakizy chô liata a ypa vâta, cherubizy amâ dua nahta, âmo chhao a duah ei ta; cherubizy amâ zaw nahta, âmo chhao amâ zaw lymâ hra.

18Chatawhcha Abeipa rônahna cha Achhyna o chhikao tawhta pua ta, cherubizy chô liata a kei duah ta.

19Cherubizy cha ama mathlawzy pakai ei ta, ei mohmô lia tlai ta alei tawhta a zawpa ta pua ha ei ta. Tiakizy cha ama kiapâh liata y laih lymâ ei ta. Cherubizy cha Abeipa o lâ angiana nochhi thokhy chhikao kiapâh liata a duah ei ta, Izarei Khazohpa rônahna cha ama chô liata y ta.

20Hezy he Khebâ chavah kiah liata Izarei Khazohpa ry liata hmohrohneipa ei hmôpazy kha ama châ. Cherubizy ama châ tahpa ei pahno haw.

21Ama zydua ta hmia miapalih nata mathlaw miapalih hnei chyu ei ta, ama mathlawzy ry liata chyhsapa ku a lyupa ama hnei chyu.

22Ama hmia alânazie cha, Khebâ chavah kiah liata ei hmôpa hmiazy hawhna khata châ ta, ama hmia palihpazy hry liata kheihawhpa hmia aheina lâ maih ama sie thei.

← Chapter 9 Jump to: Chapter 11 →