Ezekiel 25

Chin (Mara Bible RV (BSI))

← Chapter 24 Jump to: Chapter 26 →

1Abeipa bie ei hnohta vaw tlô ta:

2“Chyhsa sawchapawpa y, Amawna mo a heihnao la, âmo chakhiana hrohsona bie phuah teh.

3Amawna mo hnohta, ‘Abeipa Zehôvâh bie nathlie teh u,’ tah mah y. Abeipa Zehôvâh ta hetana heta a tah: Ei supathaihpa papuapaleipa ta y ta, Izarei râh roryhrapa ta ypa ta, Zudâh pathlazy seichâna lâ ama sie nota, ‘A zi!’ na tahpa vâta,

4nathlie teh, nochhi chyhsazy ta ama cha hnei awpa ta, ama hnohta ei cha hlâ aw. Na râh liata riehmo paryh aw ei ta, na râh liah khophie liata pahrâna su ama tao aw. Na theilâpazy nie aw ei ta, na sâhpitizy ama doh aw.

5Râbâ khih cha râraoseihpa tlaihna ta tao aw na ta, Amawna râh cha, sahroh abyuna su ta ei tao aw. Chatanachata Abeipa ei châ tahpa nama pahno aw.

6Abeipa Zehôvâh ta hetana heta a tah: Izarei râh na ku chabaih chie chi ta, na phei a tlai chiepa ta, reipachhiena to ta na reipachhiena liata na palôh â ly kawpa vâta,

7pachâ teh, na chô liata ei ku hy na ta, phopizy hnohta hraona sôh ta ei cha hlâ aw. Phopizy tawhta cha chhawh pathlah aw na ta, râh to tawhta ei cha pahleipadia aw. Cha parao aw na ta, chatanachata Abeipa ei châ tahpa na pahno aw.”

8“Abeipa Zehôvâh ta hetana heta a tah: Môabâ nata Seirâ ta, ‘Zudâh pathlazy cha phopi hropazy nata amâ nanona y vei,’ ama tahpa vâta,

9Môabâ baikhaihpa cha, khih tytuapazy tawhta pathaopa ta, a zyu palâ aw na ta, râh rônahna Bezesimô khihpi, Bâlâmeô khihpi nata Kiriathai khihpizy ama zyu ei palâ khai aw.

10Môabâ nata Amawna râhzy cha, nochhi chyhsazy ta ama hnei awpa ta ei hlâ aw ei. Chatanachata Amawna mo cha phopizy hry liata a theipa châ khao aw veih ei.

11Môabâ cha hrie aw na ta, chatanachata Abeipa ei châ tahpa ama pahno aw.”

12“Abeipa Zehôvâh ta hetana heta a tah: Edômâ cha phuh lanazie ta a pielyu ta, Zudâh pathlazy chô liata phuh lapa ta, thata hmo a paraopa vâta,

13Abeipa Zehôvâh ta hetana heta a tah: Edômâ chô liata ei ku hy aw na ta, chyhsapa nata sazy a râh tawhta ei pahleipadia khai ha aw. Roryhrapa ta tao aw na ta, Temâ tawhta Dedâ taihta zaozi ta ama pao aw.

14Ei phopi Izarei ku ta Edômâ chô liata ei phuh la aw na ta, ei hiehâhna nata ei pathiiana lymâ hawhta Edômâ chô liata tao aw ei ta, chatanachata kei ta phuh ei lapa a châzie ama pahno aw, Abeipa Zehôvâh ta a tah.

15“Abeipa Zehôvâh ta hetana heta a tah: Philistinâ mo cha phuh lanazie ta a pielyu ei ta, palôh chhiepa phaopa ta, akhakhaina chhâ thai khao leipa ta Zudâh a khakhai ei ta, Zudâh cha pahleipadia amâ chhuahpa vâta,

16Abeipa Zehôvâh ta hetana heta a tah: Moh teh u, Philistinâ mo chô liata ei ku hy aw na ta, Kirethi khihsawzy chhawh pathlah aw ei na ta, tilaipi kiah liata a ypazy chhao ei pahleipadia aw ei.

17Hiehâh ngaitapa ta chhoreipa ta ama chô liata phuh ei la aw. Cha hawhta ama chô liata phuh ei la tita, Abeipa ei châ tahpa ama pahno aw,” tah ta.

← Chapter 24 Jump to: Chapter 26 →