Ezekiel 19

Chin (Mara Bible RV (BSI))

← Chapter 18 Jump to: Chapter 20 →

1Nâ deikua cha, Izarei beimachâzy châta chaphôh tu la,

2hetana heta tu mah y: Na nô cha khâpa ma a châ tly? Chakeibarôhneipa panô a châ! Chakeibarôhneipa tôhpazy hry liata a byu ta, Chakeibarôhneipa lochopazy hry liata a tawzy a khâsia.

3A taw pô kha cha khâsia via ta, Chakeibarôhneipa lochopa a vaw châ haw; Sa tai a chu ta, Chyhsazy a sie lymâ ei.

4Phopizy ta a thâtih thei ei ta, Ama khaohtlô chaopa liata ama patu haw; Keipa ta thua ei ta, Izi râh lâ ama siekhei haw.

5Hraoleipa ta a mokhâhpa a hmô nahta, A hnabeidy ta; A taw hropa la heih ta, Chakeibarôhneipa lochopa ta a tao heih.

6Chakeibarôhneipazy hry liata tlaih ta, Chakeibarôhneipa lochopa a vaw châ; Sa tai a chu ta, Chyhsazy a sie lymâ ei.

7Ama nôhmeizy patu ta, Ama khihpizy roryhrapa ta a paysa; Â rôhpa pyu vâta, Râh nata a chhôh liata a ypa zydua thlazohpa ta ama y.

8Chatawhcha phopizy ta siehnao ei ta, Su to râh to tawhta ama siehnao; Ama sao ta khu ei ta, Ama khaohtlô chaopa liata ama patu haw.

9Keipa ta thuapa ta a byh liata khô ei ta, Babylaw bei lâ ama siekhei; Izarei tlâhpizy liata a ao theipa a châ khao lei nawpa ta, Patâh awpa ta ama siekhei haw.

10Na nô cha kre sadô liata kre zôh lyu ta, Ti kiah liata lopa a lyu; Ti a hmô hluhpa vâta, Pathei hluh ta a chiahzy chhao a paka hluh kaw.

11A chiahzy châ kaw ei ta, Abei chôchahrei châta hmâ tlâhpa a châ. Chhobuh rôhpazy chô lâta A sâh patluapa ta y ta, Â sâhna nata a chiah hluhna zy vâta Â lâ patlua.

12Châhrasala kre zôh cha hiehâhpa ta phia ei ta, Alei liata ama thy haw; Nochhi thlih ta a thei pachawh ta, A theizy zô ta a uah haw. A chiah châpa chhao, Mei ta a kâ haw.

13Tahmâ cha râhchawhpa liata lopa châ ta, Râh raohpa nata râh dâhphipa liata lopa a châ.

14A chiah chhyh tawhta mei vaw pua ta, A thei a kâ haw; Chavâta a chiah châpa y khao leipa ta, Abei chôchahrei awpa y khao vei. He he chaphôhtuna hla châ ta, chaphôhtuna châta hmâ awpa a châ.

← Chapter 18 Jump to: Chapter 20 →