Ezekiel 6

Chin (Mara Bible RV (BSI))

← Chapter 5 Jump to: Chapter 7 →

1Abeipa bie ei hnohta vaw tlô ta:

2“Chyhsa sawchapawpa y, Izarei tlâhpizy lâ a heih la, ama hnohta hrohsona bie phuah teh.

3Ama hnoh ta, ‘Nâmo, Izarei tlâhpizy saih u, Abeipa Zehôvâh bie he nathlie teh u! Abeipa Zehôvâh ta tlâhpizy nata tlâhthlôhzy, chavah kaozy nata saikaozy hnohta hetana heta a tah: Nathlie teh u, kei, keima tlai ta nama chô liata zaozi vaw patlôsa aw na ta, nama su sâhpazy ei parao khai aw.

4Nama maisâhzy roryhrapa ta y aw ta, ropahâhpa nama raona maisâhzy pakeipa châ aw ta, nama khazoh nothlahpazy hmiakô liata nama athihpa rizy ei thy aw.

5Izarei pathlazy ri cha ama khazoh nothlahpazy hmiakô liata pazia aw ei na ta, nama rupazy cha nama maisâhzy chheipâh liata ei hiezâh aw.

6Nama pahrâna su zydua liata, khihpizy rao khai aw ta, su sâhpazy roryhrapa ta a y aw. Chatanachata nama maisâhzy cha paraopa châ aw ta, roryhrapa ta a y aw. Nama khazoh nothlahpazy pakeipa châ aw ta, pahleipadiapa a châ aw. Nama ropahâhpa raona maisâhzy chhawh pachhôpa châ aw ta, nama hmotaopazy pahleipadia khaipa a châ aw.

7Ama thiepazy nama hry liata pao aw ei ta, Abeipa ei châ tahpa nama pahno aw.

8“‘Chatahrasala laibâhpazy ei cha pahlôh aw ei. Râhzy nata phopizy hry liata hiepatlapa ta nama y tita, thokha cha zaozi nama khôkhâh aw.

9Zaozi a khôkhâhpazy chata sei ta amâ chhina phopizy hry tawhta einâ thei aw ei. Amâ phei khohna palôh vâta nâ heihsai ei ta ei palôh pasana nata ama khazoh nothlahpazy liata ama aohraohna mokhaohzy vâta ei palôh pasana zy a thei aw ei ta, hmo pha leipa ama taopazy nata ama pasichhihna zydua vâta, âmosasyh ta amâ pasi aw.

10Chatawhcha Abeipa ei châ tahpa pahno aw ei ta, he hmo pha leipazy ama chô liata ei tao awpa kyh he, reih chakhyh va na tahpa ama pahno aw,’” tah ta.

11Abeipa Zehôvâh ta hetana heta a tah: “Na ku chabaihpa ta, na phei a tlai la, ‘Cha rimâ cha, Izarei pathlazy moleina pasichhihpazy vâta, zaozi ta pao aw ei ta, chakâhna ta paopa ta, potlana ta ama pao aw he zaw,’ tah mah y.

12Lâhlapi ta a ypa cha potlana ta thi aw ta, lâhnia liata a ypa zaozi ta paopa ta, ahrohpa ta pahlôhpa cha chakâhna ta a thi aw. Cha hawhta taopa ta, ama chô liata ei hiehâhna cha ei padia aw.

13Tlâh sâhpa to liata zy, tlâh laki to liata zy, tho hrohpa ry to liata nata ôkâ tho buh rôhpa ry to liata zy, ama khazoh nothlahpazy lâta ropahâhpa ama hlâ tyh. Ropahâhpa ama hlâ tyhna su to liata ama maisâh chheipâh ta ama khazoh nothlahpazy hry liata ama ri a zawhpazy ama hmô tita, kei he Abeipa ei châ tahpa ama pahno aw.

14Ama chô liata ei ku pazawh aw na ta, ama pahrâna su zydua, râhchawhpa tawhta Riblâ taihta, râh cha roryhrapa nata arypa ta ei tao aw. Chatanachata kei he Abeipa ei châ tahpa ama pahno aw.”

← Chapter 5 Jump to: Chapter 7 →