Ezekiel 33

Chin (Mara Bible RV (BSI))

← Chapter 32 Jump to: Chapter 34 →

1Abeipa bie ei hnohta vaw tlô ta:

2“Chyhsa sawchapawpa y, na phopi chho la, ama hnohta hetana heta reih teh: Râh chô liata zaozi ei vaw patlôsa tita, râhsawzy ta ama hry tawhta chyhsa pakha a tlyhpa ta, âmo riahvaituhpa ta tao ei sala,

3cha chyhsa chata râh chô liata zaozi a vaw tlôpa hmô ta, chiahmie tôpa ta phopi cha zikyu a râ ta,

4châhrasala chiahmie pyu a theipa ta zikyurâna cha papeisa leipa sala, zaozi a vaw tlôpa chata a thie khiahta cha, a thisaih maoh cha zikyurâna a papeisa leipa luh liata a y aw.

5Chiahmie pyu thei ta, châhrasala zikyurâna a papeisa leipa vâta, a thisaih cha ano chô liata a y aw. Zikyurâna a papeisa khiahta deikua cha, a hro a pabohsa aw.

6Riahvaituhpa ta zaozi a vaw tlôpa cha hmô ta, châhrasala chiahmie a tô leipa vâta, phopi cha zikyu a râpa châ leipa ei ta, chavâta zaozi a vaw tlô tita ama hry liata chyhsa ahy rai a leidia khiahta deikua cha, cha chyhsa cha a paraona vâta a leidiapa châ ta, a thisaih maoh deikua cha riahvaituhpa ku liata ei hnaw aw.

7“Chavâta nâ, chyhsa sawchapawpa y, Izarei pathlazy vaituhpa ta ei cha tao. Ei pakah tawhta bie na theina maihta, kei tawhta zikyurâna bie na chho lymâ aw ei.

8Moleipa hnohta, ‘Hy moleipa, na thi tlai awpa a châ,’ ei tah nota, moleipa cha a hrozie siesai awpa ta zikyu nâ râ leipa khiahta cha, moleipa cha a paraona liata thi aw ta, a thisaih maoh na phaoh aw.

9Moleipa cha a hrozie siesai awpa ta zikyu a râ ha la, a hrozie a siesai leipa khiahta deikua cha, cha chyhsa cha a paraona liata thi aw ta, nâ deikua cha na hro na pabohsa aw.

10“Chavâta chyhsa sawchapawpa y, Izarei pathlazy chho la, ama hnohta, ‘Eima paraona nata eima moleinazy ta miah vi ta, chazy vâna chata eima thuzao hai. Kheihta eima hro thei rai aw?’ a tahpazy nama châ, tah mah y.

11Ama hnohta hetana heta reih teh: ‘Ei hrona reipa ta ei reih. Moleipa thina liata alyna rai hnei leipa na ta, moleipa ta a hrozie siesaipa ta a hroh awpa cha ei lyna tlao a châ. Nama hrozie pha leipa tawhta kua u la, kua ha teh u. Hy Izarei pathlazy saih u, khazia nama thi aw tly?’ Abeipa Zehôvâh ta a tah.

12“Chavâta chyhsa sawchapawpa y, na phopi hnohta hetana heta reih teh: Mosiapa cha hmo a paraona noh liata, a siana ta pachha leipa aw ta, moleipa chhao a moleina a siesai noh liata, a moleina vâta pao aw vei. Mosiapa cha a moleina noh liata, a siana vâta hroh thei hlei aw vei.

13Mosiapa hnohta, ‘Na hroh tlai aw,’ tah hraw sah la, ano siana a ngâchhâpa ta hmo a parao khiahta cha, siana hmo a taopa miakha hmah a theipa châ khao leipa aw ta, a paraona liata a thi aw.

14Moleipa hnohta, ‘Na thi tlai aw,’ tah hraw sah la, a moleina siesaipa ta, siana nata adona tao sala,

15moleipa ta sôhkâ a lapazy pakuapa ta, hmo a parupazy pie pakhua sala, hrona bieraopazy a chhihpa ta, hmo pha leipa a tao leipa khiahta cha, a hroh tlai aw, thi aw vei.

16Moleina a vaw tao hapa khâpa hmah a theipa châ khao aw vei. Siana nata adona ta tao ha ta, a hroh tlai aw.

17“Chatanachôta na phopi ta, ‘Abeipa lâpi he a do vei,’ ama tah pyly. Adoleipa cha âmo lâpi tlao a châ.

18Mosiapa ta a siana siesaipa ta, hmo doleipa a tao khiahta cha, hmo doleipa a taopa vâta a thi aw.

19Moleipa ta a moleina siesaipa ta, siana nata adona a tao khiahta cha, cha vâna chata a hroh aw.

20Chatanachôta, ‘Abeipa lâpi he a do vei,’ nama tah pyly. Hy Izarei pathlazy saih u, chyhsa to nama hrozie hawhta ei cha pachia aw ei.”

21Seichâna lâ eima siena kô hrawh hleinona, thla hrawhna, noh pangawhna noh liata, Zerusale tawhta a râpa chyhsa pakha kei lâ a vy ta, “Khihpi a rao haw,” tahpa ta na chho ta.

22Cha a râpa chyhsa â vy hlâ zâlâ ta, Abeipa ta ei chô liata a ku pahnieh ta, my ta kei lâ a vaw tlôna daihti liata ei pakah na pahy ta, ei pakah â na ta, reih pathlie thei leipa châ khao leipa na ta.

23Chatawhcha Abeipa bie ei hnohta vaw tlô ta:

24“Chyhsa sawchapawpa y, Izarei râh su rypazy liata a ypazy ta, ‘Abarahâ kha ano pakha dei châ ta, chatanachôta râh hnei thei ta, keimo cha a hluhpi châ pi ta, râh cha eima ryuto châta piepa eima châ haw,’ tah ei ta.

25Chavâta ama hnohta reih teh, Abeipa Zehôvâh ta hetana heta a tah: A thisaih chhaota sa nie ei chi ta, nama khazoh nothlahpazy lâ nama mozy uahnaohpa ta, thisaih nama palo tyh. Kheihta ma ei râh cha nama hnei thei aw?

26Zaozi a ngâchhâ ei chi ta, hmo pasichhihpazy taopa ta, chyhsa to ta nama vaih lapinô nama papuapalei. Kheihta râh cha nama hnei thei aw?

27Ama hnohta reih teh, Abeipa Zehôvâh ta hetana heta a tah: Ei hrona reipa ta ei reih. Su rypa liata a ypazy cha zaozi ta pao tlai aw ei ta, lyurâhpa liata a ypazy cha sahrâhpazy hnohta ama nie awpa ta pie aw na ta, thokhy nata lôpu chhôh liata a ypazy cha potlana ta ama thi aw.

28Râh cha roryhrapa nata a rypa ta tao aw na ta, â palaikhei kawpa a thatlôna chhao ei pachhâsa ha aw. Izarei tlâhpizy cha roryhrapa ta ama y awpa vâta, ahy hmahta chapia khao aw veih ei.

29Hmo pasichhihpa ama taopa vâta, râh cha roryhrapa nata a rypa ta ei tao tita, Abeipa ei cha tahpa ama pahno aw.

30“Nâma kyh liata cha, chyhsa sawchapawpa y, thokhy kiapâh nata ochhizy liata na thâtih a reih khoh kaw tyhpazy ta a chho raihrie ei ta, chyhsa to ta ama unawhzy hnohta, ‘A vy u la, Abeipa tawhta bie a puapa nathlie tua u,’ ama tah awh.

31Phopi hawhta nâ lâ a vy aw ei ta, ei phopi haw tlai ta na hmiakô liata a tyuhpa ta, na bie reipa thei aw ei ta, châhrasala zyh hlei aw veih ei. Ama pakah ta aohraohna bie sai reih ei ta, ama palôh cha athôhna sai a pachâ tyh.

32Pachâ teh, âmo châta la, nâ cha ao ngia ngaitapa ta aohraohna hla a sapa nata pyu ngiapa a tô thaipa hawhta na châ. Na bie thei aw ei ta, châhrasala zyh hlei aw veih ei.

33Cha hmo cha vaw tlô tlai aw ta, a vaw tlô tita, ama hry liata hrohsopa a y tahpa ama pahno aw.”

← Chapter 32 Jump to: Chapter 34 →