Ezekiel 29

Chin (Mara Bible RV (BSI))

← Chapter 28 Jump to: Chapter 30 →

1Kô hrawhna, thla hrawhna, noh hrawh hleinona noh liata, Abeipa bie ei hnohta vaw tlô ta:

2“Chyhsa sawchapawpa y, Izi bei Phiraoh lâ a heih la, ano nata Izi mo zydua hnohta hrohsona bie phuah la,

3‘Abeipa Zehôvâh ta hetana heta a tah,’ tah teh: “Nâ, Izi bei Phiraoh, Chavahzy liah liata tisadâh rarôh ypa, ‘Nile chavah he kei eih châ ta, Keima châ tlai ta ei taopa a châ,’ a tahtuhpa y, Moh teh, ei châ dyuh hih.

4Na kâh ruzy liata keipa ta cha paao aw na ta, Na vo liata chavah ngazy ei pabaisa aw; Na chavahzy tawhta châ daophi aw na ta, Na vo liata a baipa, Na chavah nga zydua chhaota ei châ daophi aw.

5Râhchawhpa liata cha thy aw na ta, Na chavah nga zydua chhaota ei cha thy aw. Lyurâhpa liata tla aw chi ta, Na ri lapa châ leipa aw ta, Pabupa châ hra aw va chi. Nama rizy cha, Lei sahrâhpa nata vâ pavawzy hnohta, Nie awpa ta ei pie aw ei.”

6“Chatanachata Izi chyhsa zydua ta Abeipa ei châ tahpa ama pahno aw. Izarei pathlazy châta lohthi chôchahrei hawhta châ chi ta,

7ama ku ta ama cha patu nahta, tlie chi ta, ama ngiatlâh zydua na chhô tyh. Ama châ hnieh nahta chhao, tlie chi ta, ama chaizy na chalyusa tyh.

8“Chavâta Abeipa Zehôvâh ta hetana heta a tah: Pachâ teh, na chô liata zaozi vaw patlôsa aw na ta, chyhsapa nata sa zy nâ tawhta ei chhawh pathlah khai aw ei.

9Chatanachata Izi râh cha roryhrapa nata râh rypa vaw châ aw ta, kei he Abeipa ei châ tahpa ama pahno aw. “‘Nile he keima eih châ ta, kei ta ei taopa a châ,’ na tahpa vâta,

10pachâ teh, châ dyuh na ta, na chavahzy ei dyuh hih. Izi râh cha, Mikadô tawhta Syne taihta nata Kusi râhri tlôna taihta, râh rypa nata roryhrapa râh ta ei tao aw.

11Chyhsapa phei ta tly beih khao leipa aw ta, sazy phei ta chapia beih khao aw vei. Kô sypalih chhôh chyhsapa pahrâ leina râh a châ aw.

12Izi râh cha roryhrapa râhzy hry liata roryhrapa râh miakha ta tao hra aw na ta, a khihpizy cha khihpi rypazy hry liata kô sypalih chhôh a rypa ta a y aw. Izi mo cha phopizy hry liata hiepatla aw ei na ta, râhzy liata ei papai aw ei.

13“Abeipa Zehôvâh ta hetana heta a tah: Kô sypalih a tloh nahta, Izi mo cha hiepatlapa ta ama yna phopizy tawhta ei pakhy aw ei.

14Izi mo cha vânoh patosa heihpa ta, ama thyutôna râh, Pâtharô râh lâ a chhi pakhua heih aw ei na ta, cha liata khinarâh nawraihpa ama châ aw.

15Khinarâh zydua liata nawraih chaipa châ aw ta, râhzy chô lâta anosasyh ta a cheihchalo beih khao aw vei. Thata panawhsa aw ei na ta, râhzy chô liata ryureih beih khao aw veih ei.

16Izarei pathlazy ta baona ama hia tita, Izi moleina amâ thei ha tyhpa vâta, amâ ngâchhâpa châ khao aw veih ei. Chatanachata Abeipa Zehôvâh ei châ tahpa ama pahno aw.”

17Kô kih nata kô sarina, thla khana, noh khana noh liata, Abeipa bie ei hnohta vaw tlô ta:

18“Chyhsa sawchapawpa y, Babylaw bei Nebukaneza ta a pheisaihzy Tyre chô liata rai thata pahriasa ta, chyhsa to luh tlyh khai ha ta, ama ngiatlâh â hlia khai haw. Chatanachôta ano nata a pheisaihzy ta ama hriapasana vâta Tyre tawhta athôhna khâpa hmah hmô hlei veih ei.

19Chavâta Abeipa Zehôvâh ta hetana heta a tah: Pachâ teh u, Izi râh cha Babylaw bei Nebukaneza pie aw na ta, a hneirônazy siekhei khai aw ta, râh hneirônazy la khai aw ta, a hrao khai aw. Cha hraona sôh cha a pheisaihzy hlao châta a châ aw.

20Babylaw bei cha keima châta a hriatuhpa a châpa vâta, Izi râh cha a hriapasana hlao châta ano ei pie aw, Abeipa Zehôvâh ta a tah.

21“Cha noh liata, Izarei pathlazy tawhta ki pathaosa aw na ta, âmo hry liata na pakah ei cha paâsa aw. Chatanachata Abeipa ei châ tahpa ama pahno aw.”

← Chapter 28 Jump to: Chapter 30 →