Ezekiel 9

Chin (Mara Bible RV (BSI))

← Chapter 8 Jump to: Chapter 10 →

1Chatawhcha Abeipa ta ei nah theina liata, “Khihpi mohôhtuhpazy kha, paraona chhaichhi a chaba khaipa ta, a vaw hnia mawh ei sy,” tahpa ta a paro ngaitapa ta awh ta.

2Maw lâ a heihpa machhua thokhy chhikao lâ tawhta chyhsa pacharu a vypa hmô ei na ta. Adyuhna chaihrai a chaba chyu ei ta. Ama hry liata pala rih dipa chysia a tobipa ta, a chai liata châti ôh a vaopa a hlao ta. A vaw ngia ei ta, dawh maisâh kiapâh liata a vaw duah ei ta.

3Izarei Khazohpa rônahna cha, a yna cherubizy tawhta thyupa ta, Achhyna o chhikao thaby lâ khy ta. Pala rih dipa chysia a tobi ta, a chai liata châsôh byh a vaopa kha aw ta.

4Abeipa ta a hnohta, “Zerusale khihpi chahryh la, khihpi chhôh liata hmo pasichhihpa taopazy vâta a hrôpa nata a rôhpazy chyhsazy khi liata ngiana tao mah y,” tah ta.

5Mohropazy hnohta chhao ei nah theina liata, “Ano hnôh lâna hao ta khihpi chahryh u la, thie lymâ muh vy. Nama mo ta pahlôh leipa sala, ngiachhie khuh vy.

6Machâpazy, satliazy, laihsazy, hawtizy nata nôzy thie khai u la, ngiana a hneipazy deikua cha a hnia khuh vy. Ei supathaihpa tawhta a thao muh vy,” tah ta. Chatanachata Achhyna o hmia liata a ypa machâzy tawhta pathao ei ta.

7Abeipa ta ama hnohta, “Achhyna o kha papuapalei u la, a dôhpachhôh tlyhmiazy kha athihpa ri ta pabie ha muh vy. Thie awpa ta pua teh u,” tah ta. Chatanachata pua ei ta, khihpi chhôh liana cha thie lymâ ei ta.

8Zerusale khihsawzy ama thie hai nota, keima deita ta vaw y thlâh ha na ta. Â khu lâta pao na ta, “Âh, Abeipa Zehôvah! Na hiehâhna Zerusale chô liata na lei thlupa liana heta, Izarei laibâhpazy chhao na pahleipadia khai aw ei ma?” tahpa ta awh na ta.

9Abeipa ta ei hnohta, “Izarei nata Zudâh pathlazy moleina rarôh a y tu haw. Râh cha thisai ta bie ta, khihpi chhao avyuhna ta a bie. ‘ Abeipa ta râh siesai ha ta, Abeipa ta hmô vei,’ ama tah.

10Chavâta kei chhao ta pahlôh leipa aw ei na ta, ngiachhie aw veih ei na. Ama hmotaopazy ama luh chô liata ei vaw patlôsa aw,” tah ta.

11Chatawhcha moh teh u, pala rih dipa chysia a tobi ta, a chai liata châsôh byh a vaopa khata bie vaw tlôkhei ta, “Bie eina piepa hawh chi ta ei tao khai haw,” tah ta.

← Chapter 8 Jump to: Chapter 10 →