Jeremiah 13

Chin (Mara Bible RV (BSI))

← Chapter 12 Jump to: Chapter 14 →

1Abeipa ta, “Sie la, pala rih dipa chaisaihna a kei chalei la, na chai liata a saih la, ti liata ny khah y,” na tah ta.

2Chatanachata Abeipa bie hawhta, poh rih dipa chaisaihna cha chalei na ta, ei chai liata ei saih.

3Chatawhcha Abeipa bie cha a ei nona ta ei hnohta vaw tlô heih ta,

4“Chaisaih na chaleipa, na chai liata nâ saihpa kha la la, thyu la, Ufrâti chavah pangai la, cha liata lôpanô khaoh liata nyu mah y,” na tah ta.

5Abeipa ta bie eina piepa hawhta, sie na ta, Ufrâti chavah kiah liana cha nyu na ta.

6Noh hluhpi tawhta Abeipa ta ei hnohta, “Thyu la, Ufrâti chavah pangai la, cha liata chaisaih ei cha panyusapa kha kei la teh,” na tah ta.

7Ufrâti chavah lâ cha sie na ta, chaisaih ei nyuna su chaopa ta, chaisaih cha thaoh na ta. Moh teh u, chaisaih cha rao ha ta, khâpa châta hmahta pahnai khao leipa ta.

8Abeipa bie ei hnohta vaw tlô ta:

9“ Abeipa ta hetana heta a tah: Kha hawhna khata Zudâh a palaikheipa nata Zerusale a palaikhei ngaitapa cha ei parao aw.

10Ei biezy nathlie khoh leipa ta, âmo palôh chhorupa zipa ta khazoh hropazy pazi ei ta, chazy cha a chakaopa nata a chhypa, he phopi moleipa he, khâpa châta hmahta a phahnai leipa chaisaih hawhna heta ama châ aw.

11Chaisaih ta â saihtuhpa chyhsa chai liata â baipa hawhta, Izarei pathla zydua nata Zudâh pathla zydua cha, keima châta phopi, moh phana, reithaina nata rônahna ama châ thei nawpa ta, keima liata a bai awpa ta tao ei na ta, châhrasala nathlie khoh veih ei,” Abeipa ta a tah.

12“He bie he ama hnohta na reih awpa a châ: ‘ Abeipa, Izarei Khazohpa ta, “Titheih zydua kresawhti ta pabie khaipa a châ aw,” a tah,’ tah aw chi ta, âmo ta na hnohta, ‘Titheih zydua kresawhti ta a bie khai aw, tahpa cha pahno ma pi ma?’ ama tah aw.

13Chatawhcha ama hnohta, ‘ Abeipa ta hetana heta a tah: Pachâ teh u, he râh liata a pahrâpa zydua, Dâvi beidyuchhai liata a tyuhpa beizy, theihthaipazy, hrohsopazy nata Zerusale khihsaw zydua parina ta ei pabie khai aw ei.

14Âmo nata âmo pasukhysa aw ei na ta, pawzy nata sawchapawzy amâ sukhy aw. Âmo pahleipadia lei awpa ta, ngiachhie leipa aw ei na ta, pahlôh hra leipa aw ei na ta, ei tha pasa aw veih ei,’” Abeipa ta a tah.

15Nathlie u la, nah pachôh teh u; A palai khuh vy, Abeipa ta a rei ha hih.

16Abeipa ta zohna vaw patlôsapa ta, Tlâhpizy chô liata a zoh chy ta nama phei â chapia hlâta, Khaihna na hnabeiseihpa cha zohmyhna lâta pachâsapa ta, Zoh kaluhna lâta a pachâsa hlâta, Abeipa nama Khazohpa cha palyupalih teh u.

17Nama nathlie vei khiahta deikua cha, Namâ palaina vâta arulâta cha aw na ta; Ei mothlih thata loh aw ta, Ei cha ngâ thlâh ha aw; Abeipa mietaku zaw cha, Seichâna lâ a chhipa ama châpa vâta.

18Bei nata a nô hnohta hetana heta tah teh: “Dyuchhai a hnaipa liata a tyuh teh u; Nama beilakhozy tla ha ta, Nama rônahna lakho a tla haw.”

19Neke khihpizy khawpa châ ei ta, A pahy awpa y veih ei; Zudâh pôhpalôhpa sei ta a chhipa châ ei ta, Ama siekhei khai haw.

20“Mohmia pasaih u la, Maw lâ tawhta â vypazy hao moh tua u. Na hnohta piepa mietaku zaw kha, Khataih liata a y haw? Na mietaku zaw khochhihpa kha, Khataih liata a y haw?

21Na viasa châ awpa ta Nâ ta na pachupazy cheingei cha, Na chô liata luhpa ta ama so tita, Kheihta ma na tah aw? Chanô sawzeih pasapa hawhpa Pasana ta cha patu aw vei ma?

22Na palôh liata, ‘Khâpa vâta ma, He hmozy he ei chô liata a vaw tlô tly?’ Na tah khiahta cha, Na moleina rarôh ypa vâta, Na hnorâh typa châ chi ta, Taochhiepa ta na ypa a châ.

23Kusi chyhsa ta a vo panano thei aw ma? Keichhoh ta a chei a panano thei aw ma? Cha hawhna hra chata, Nâmo, hmo chhiepa taopa liata nama tlai a châ hapazy chhao, Hmo phapa tao thei aw veih ei chi.

24Râhchawhpa tawhta thlih ta sâh sihpa a phaopa hawhta, Nâmo chhao ei cha papai aw ei.

25Kei na my chi ta, Haipa biezy na ngâpa vâta, He he na tovyuh châ ta, Na châta ei raopa tovyuh cha a châ.

26Keima tlai ta na hnorâh ty aw na ta, Na hmia khuna taihta ei ty aw; Chatanachata maophyuhpa ta na y aw.

27Na pasichhihnazy hmô na ta, Lyu tlâhzy liata nâ pheinazy ei hmô haw; Arâ paw khohpa hawhta na sâpa hmô na ta, Na sihryhna zakheichhihpa chhao ei hmô haw. Hy Zerusale, na hu a po kaw dia! Khati taih ma pathaih leipa ta na y chy aw?”

← Chapter 12 Jump to: Chapter 14 →