Jeremiah 7

Chin (Mara Bible RV (BSI))

← Chapter 6 Jump to: Chapter 8 →

1He he Abeipa tawhta Zeremiah hnohta bie a vaw tlôpa a châ:

2“ Abeipa o chhikao liata a duah la, ama hnohta he bie he phuah teh: Abeipa a chhy awpa ta, he chhikaozy liata a ngiapa, nâmo, Zudâh mo zydua saih u, Abeipa bie he thei teh u.

3Pheisaihzy Abeipa, Izarei Khazohpa ta hetana heta a tah: Nama hrozie nata nama hmotaopazy liata a taopathi u la, chatanachata he su liata ei cha pahrâsa aw ei.

4‘He he Abeipa Achhyna o a châ, Abeipa Achhyna o a châ, Abeipa Achhyna o a châ,’ tahpa haipa biezy nama zo awpa châ vei.

5“Nama hroziezy nata nama hmotaopazy liata a taopathi u la, adona ta a zaokhi raihriepa ta,

6mapaihpa nata paw hnei leipa nata nôhmei zy tlybai leipa u la, he su liana heta thaileina a hnei leipa thisaih palo leipa ta, châ pamoleisa awpa khazoh hropazy nama pazi leipa khiahta cha,

7he su liata pahrâ lymâ awpa ta cha pasai aw ei na ta, châ pathlatuhpazy hnohta hlâno tawhta ei vaw pie hapa râh liana he, chhâzaw nata tlyzaw ta nama pahrâ lymâ aw.

8“Pachâ teh u, phahnaina a hnei leipa haipa biezy tlao nama ngâ he zaw.

9Paru ei chi ta, liany cheih ei chi ta, a phei ei chi ta, haipa ta bie a taih ei chi ta, Bâlâ lâ atheihna hlâpa ta, nama pahno beih leipa khazoh hropa nama pazi.

10Cha khai tawhta keima moh tlai bipa, he o lâ he a vy ei chi ta, ei hmiakô liata namâ vaw duah heih tyh. Cha hawhpa hmo pasichhihpazy cha tao lymâ awpa ta ma, ‘Eimâ boh haw!’ nama tah tyh aw?

11He keima moh tlai ta bipa o he, parutuhpazy lôpu hawhta ma nama mo liata a y haw? Pachâ teh u, cha cha keima tlai ta ei hmô haw, Abeipa ta a tah.

12Ei moh ei vaw paysa tuana Silô liata keima su lâ vawh u la, ei phopi Izarei moleina vâta a chô liata hmo ei taopa kei moh teh u.

13Tahmâ, he hmo zydua he tao ei chi ta, bie khâ ei châ chhopa chhao ei ta nathlie khoh leipa ei chi ta, ei cha awpa chhao ei ta einâ chhy khoh leipa vâ ei chi ta,

14Silô chô liata ei taopa hawhna khata, ei moh ta bipa, he o chô liana chhao he tao aw na ta, nâmo nata châ pathlatuhpazy hnohta su ei cha piepa ei, namâ ngâchhâpa chô liata chhao ei tao aw.

15Nama unawhpa Epharai chipathla zydua ei thy khai hapa hawhna ei khata, ei mohmô tawhta ei cha thy pathlah aw ei,” Abeipa ta a tah.

16“Chavâta he phopi châna heta thlahchhâ khoh hlei khah y. Âmo châta awh leipa la, thlahchhâna ao papua hra leipa la, kei lâta hiana taopa hra khah y, cha nathlie aw va na.

17Zudâh khihpizy liata nata Zerusale khiliahzy liata ama hmotaopazy hmô va chi ma?

18Sawzy ta tho pakhy ei ta, pawzy ta mei patih ei ta, chanôzy ta Avâ Beinô châta viahchhâ tao nawpa viahdie neih ei ta, ei hie na pahâh awpa ta, khazoh hropazy lâta dopa hlânazy ama hlâ tyh.

19Keima hie pahâhpa hawhta ma ama pachâ? Âmosasyh ta ama no amâ pazapa tlao châ vei ma? Abeipa ta a tah.

20Chavâta Abeipa Zehôvâh ta hetana heta a tah: He su chô liata ei hiehâhna nata ei pathiiana patlai thlu aw na ta, chyhsapa, râhsa, lyurâhpa thozy nata chhaohlei theizy kâ khai aw ta, pachhai theipa châ aw vei.”

21Pheisaihzy Abeipa, Izarei Khazohpa ta hetana heta a tah: “Nama atheihnazy liata raopa hlânazy pahlao u la, sa nie teh u.

22Châ pathlatuhpazy Izi râh tawhta ei chhi papua nona ei kha, raopa hlânazy nata atheihnazy kyh chho leipa ei na ta, biepie hra veih ei na.

23‘Ei ao nathlie u la, nama Khazohpa châ aw na ta, ei phopi nama châ aw. Bie ei cha piepa zydua zyh u la, nama châta a pha aw,’ tahpa ta bie tlao ei pie ei.

24Châhrasala zyh khoh leipa ei ta, nah pachôh khoh hra veih ei. Âmo ryhraona nata ama palôh molei kuhchhana liata sie ei ta, hmia tôh leipa ta hnôh tlao amâ sy.

25Châ pathlatuhpazy Izi râh tawhta ama pua noh tawhta tanoh taihta, nâ chakaotuhpa hrohsopa zydua noh chareih ta âmo lâ tuah na ta.

26Châhrasala na nathlie khoh leipa ei ta, ama nah pachôh hra leipa ei ta, ama kuh tlao amâ pachhasa. Âmo a pathlatuhpazy hlâ chhao ta ama paru via.

27“He bie zydua he ama hnohta na reih awpa a châ. Châhrasala cha nathlie pyly aw veih ei. Âmo cha aw aw chi ta, châ chhy pyly aw veih ei.

28Chatanachata ama hnohta, ‘He phopi he Abeipa ama Khazohpa ao a nathlie leipa nata a chhoreina a ngiah leipa phopi ama châ hih. Ngâchhihna lei ha ta, ama pakah tawhta chhawh pathlah hapa a châ,’ na tah aw ei.

29“Hy Zerusale y, na sâ a ngyupa ta thy la, Awphy tlâh lakizy liata chaphôhtu teh; Abeipa hie a pahâhtuhpa chhâ moleipa he, Abeipa ta dytha ta a siesai haw.”

30“Zudâh pathlazy ta ei mohmô liata hmo pha leipa taopa ta, ei moh pachyuhpa o liata hmo pasichhihpazy soh ei ta, o cha ama papuapalei haw.

31Ama sawchapawzy nata ama sawchanôzy mei liata rao nawpa ta, Hinô Sawchapawpa Saikao liata Tôphe su sâhpazy ama padua. Chazy cha keima biepiepa châ leipa ta, ei palôh liata chhao a ngia beih vei,” Abeipa ta a tah.

32“Chavâta a hrohrua teh u, nohzy a vaw tlô hai. Saikao cha Tôphe tahpa châ khao leipa aw ta, Hinô Sawchapawpa Saikao tahpa châ khao hra leipa aw ta, Thiena Saikao tahpa a châ aw. Pabu nawpa su hropa y khao leina taihta, Tôphe liana cha athihpazy pabupa a châ aw.

33He phopi rizy cha avâ pavawzy nata alei sahrâhpazy châta pati châ aw ta, ahy hmahta a laih aw veih ei.

34Zudâh khihpizy liata nata Zerusale khiliahzy liata palaona pyu, thaphana pyu, myuhneituhpa ao nata myuhthieh ao zy chalihsa khai ha aw na ta, râh cha roryhrapa ta a y aw.

← Chapter 6 Jump to: Chapter 8 →