Jeremiah 8

Chin (Mara Bible RV (BSI))

← Chapter 7 Jump to: Chapter 9 →

1“Cha daihti liata, Zudâh bei sahlao ruzy, a beimachâ sahlao ruzy, theihthaipa sahlao ruzy, hrohsopa sahlao ruzy nata Zerusale khihsaw rupazy cha ama thlâ tawhta thaopa châ aw ei ta,

2kyh ama pachâpa, ama chakaopa, ama pazipa, ama tluapa nata amâ chhypa noh, thlâpâ nata awhsi zydua hmiakô liata zawpa ama châ aw. Pakhypa châ khao leipa aw ei ta, pabupa châ hra aw veih ei. Ie hawhta alei chô liata pasichhihpa ta ama y aw,” Abeipa ta a tah.

3“Ei papaipatla hapa phopi moleipa laibâhpazy cha, ama pahrâna su lia maihta, hro awpa hlâta thi awpa tlao amâ tlyh via aw,” Pheisaihzy Abeipa ta a tah.

4“Ama hnohta hetana heta reih teh, Abeipa ta hetana heta a tah: Chyhsapa cha ama pao nahta, Thyu heih tyh veih ei ma? Lâpi ama tlei nahta, Kua heih tyh veih ei ma?

5Cha hawhta a châpa tlai ta, Khazia ma he phopi heta lâpi tlei ei ta, Hnôh amâ sy pathlah ha tly i? Dôveina khâchâ patu ei ta, Kua khoh khao veih ei.

6A phapa ta nathlie na ta, Ama biereipa ei thei; Biedopa reih leipa ei ta, Ahy hmahta, ‘Khâpa ma ei vaw tao ha tly?’ Tahpa ta ama paraona ro a chhuah veih ei. Chyhsa to ta âmo lâpi lâ sai a heih ei ta, Adyuhna su liata arâ a thluah ngâpa ama lyu.

7Avâ liata riasi hmahta â pasie nawpa daihti pahno ta, Vachhuh nata siviah nata vawpô zy chhao, A daihtita liata ama vaw tlô tyh. Ei phopi deikua cha, Abeipa bieraopa pahno veih ei.

8“Kheihta ma, ‘Asopa châ pi ta, Abeipa ryhpa eima hnohta a y,’ Nama tah thei tly? Pachâ teh u, chârohtuhpazy châsôh haih thaipa ta, Ryhpa cha haipa ta a panano ha hih.

9Chyhsa sopazy maophyuh aw ei ta, Chihuhpa ta ypa ta patupa ama châ aw. Pachâ teh u, Abeipa bie ama thy ha tawhta cha, Âmo liata khâpa sona cha ma a y khao aw?

10“Chavâta ama lapinôzy cha mohropazy pie aw na ta, Ama lyuzy chhao âmo a pahnietuhpazy ei pie aw ei. Chyhsa to, a chyh chaipa tawhta a lai chaipa taihta, Athôhna doleipa liata karâypazy châ ei ta, Hrohsopa nata theihthaipa zy taihta Chyhsa ama dôveipa vâta, Cha hmozy cha ama chô liata ei tao aw.

11Ei phopi hmah cha, Naosiata ta patlâh a chhuahpa ta, Thlalôhna rai y leina daihti lia chhao ta, ‘Thlalôhna, thlalôhna,’ ama tah tyh.

12Hmo pasichhihpa ama tao no khata, Nozana châh zy ama pahno tlyma i? Khâpa nozana châh cha ma ama pahno bao aw! Ama noza tiarâh leipa ta, Hmiachhie nawpa châh chhao pahno veih ei. Chavâta a paopazy hry liata pao hra aw ei ta, Âmo ei hriena daihti liata, Thy pathlahpa ama châ aw,” Abeipa ta a tah.

13“Ama kôveizy lapa khai aw ei na ta, Kre zôh liata a theizy y khao aw vei. Theiku kôzy liata chhao theikuzy y khao leipa aw ta, Ama hnazy a uah khai aw. Âmo ei piepazy ei kha, Âmo tawhta la pakhuapa a châ aw,” Abeipa ta a tah.

14Khazia eimâ tyuh ngâ thlâh ha tly i? A awpakhypa ta thokhy khihpizy liata a ngia sih la, Cha liata kei leidia ei suh u. Abeipa chô liata eima molei hapa vâta, Abeipa eima Khazohpa ta leidia awpa ta miah soh ha ta, Châmaih ti do awpa miah a pie ha hih.

15Thlalôhna mokhâh pi ta, Châhrasala hmo phapa vaw tlô hlei vei; Tlâhna daihti mokhâh pi ta, Châhrasala moh teh u, chichhihna dei a châ hih.

16“Ama arâzy hnaphipa pyu cha, Dânâ tawhta theipa châ ta; Ama arâ tôhpazy sâpa pyu vâta, Râh pôhpalôhpa â chalyu. Vaw tlô ei ta, Râh nata a chhôh liata a ypa zydua nie khai ei ta; Khihpi nata a chhôh liata a pahrâpazy ama nie khai haw.

17“Pachâ teh u, vâzizy nama hry liata vaw tuah aw na ta, Chyuphao pangâh thei leipazy ei vaw tuah aw; Chazy chata ama cha pachu aw,” Abeipa ta a tah.

18Ei lyna lei ha ta, Pachârôhna na vaw tlô thlupa ta, Palôh pasana sai ta ei bie haw.

19Râh do nata hâ liata, Ei phopi zuah chana ao he nathlie tua u: “Zaio liata Abeipa y vei ma? A chhôh liata ano Bei y vei ma?” “Khazia ama nothlahpa taopazy ta ei hie na pahâh ei ta, Chihropa khazoh nothlahpazy ta ei hie eina pahâh ei?”

20“Sâh hria daihti khô ha ta, Nopi daihti a chhâ haw; Châhrasala pachhapa châ to ma pi,” Ei phopi zuah ta a tah.

21Ei phopi zuah hmahphaona liata Keima palôh chhao hmahphaopa ta a y; Mâchhiesapa ta y na ta, Thlazohna ta eina patu haw.

22Kilia liata tlâhna thohna y vei ma? Cha liata dawhty y veih ei ma? Khazia ei phopi zuah a tlâh thei vei tly?

← Chapter 7 Jump to: Chapter 9 →