Jeremiah 16

Chin (Mara Bible RV (BSI))

← Chapter 15 Jump to: Chapter 17 →

1Abeipa bie ei hnohta vaw tlô ta:

2“Lapinô na hnei awpa châ leipa ta, he su liata sawchapawzy nata sawchanôzy na hnei awpa châ vei.

3He su liata a pihpa sawchapawzy nata sawchanôzy kyh nata âmo a phaohtuhpa nôzy nata âmo a satuhpa pawzy kyh liata, Abeipa ta hetana heta a tah:

4Hri chhiepa ta ama thi aw. Âmo châta mâchhiesapa châ leipa aw ta, pabupa châ aw veih ei. Alei liata ie hawhta ama y aw. Zaozi nata chakâhna ta thi aw ei ta, ama rizy cha avâ pavawzy nata alei sazy lao a châ aw.

5“ Abeipa ta hetana heta a tah: He phopi tawhna heta ei thlalôhna la ha na ta, ei kyhpachâna nata zawngiahna chhao ei la haw. Chavâta mâchhiesana o liata a ngia leipa la, âmo châta chaphôhtu awpa ta tlyma, taokhei awpa ta tlyma, vawh hra khah y, Abeipa ta a tah.

6Molaipa chhao mochyhpa chhao, he râh liata ama thi aw. Pabupa châ leipa aw ei ta, ahy hmahta âmo châta mâchhiesa leipa aw ei ta, a sapa â âpa tlyma, a luh â papôlôpa tlyma y aw veih ei.

7Mâchhiesapazy cha athipa amâ ngiahna thlapalôh awpa ta, ahy hmahta niedo pie leipa aw ei ta, ama paw tlyma, ama nô tlyma, athipa amâ ngiahna hnapangâhna nyu doh awpa chhao ahy hmahta pie aw veih ei.

8“Kyhchhina o liata a ngiapa ta, ama hnohta a tyuhpa ta, na nie na doh awpa châ vei.

9Abeipa Atotaotheipa, Izarei Khazohpa ta hetana heta a tah: Pachâ teh u, nama hro chhôh nama mohmô lia tlai ta, alyna pyu zy, thaphana pyu zy, myuhneituhpa ao nata myuh ao zy he su liata ei chalihsa khai aw.

10“He phopi hnohta, cha bie zydua cha na chho ti ei ta, âmo ta, ‘Khâpa vâta ma Abeipa ta cha hawhpa hmo chhiepa rarôh ypa cha eima chô liata patlôsa â chhuah tly? Khâpa hmo ma eima parao tly? Abeipa eima Khazohpa chô liata khâpa moleina ma eima tao tly?’ ama cha tah khiahta cha,

11hetana heta nâ chhy aw ei: ‘Châ pathlatuhpazy ta kei na siesaipa ta, khazoh hropazy pazi ei ta, cha khazohzy cha chakaopa ta, a chhy ei ta, kei na siesaipa ta, ei ryhpa ama zyh leipa vâta a châ.

12Nâmo tlai chhao, châ pathlatuhpazy hlâta paru via ei chi ta, pachâ tua u, chyhsa to nama palôh chhorupa moleina lâpi a chhih ei chi ta, kei na nathlie khoh veih ei chi.

13Chavâta he râh tawhna heta cha papua aw ei na ta, nâmo nata châ pathlatuhpazy ta nama pahno beih leipa râh lâ ei cha pazaw ha aw ei. Cha liata chhô nah zâ ta khazoh hropazy nama chakao aw, cha ngiachhie khao aw veih ei na,’” Abeipa ta a tah.

14“Chavâta pachâ teh u, nohzy a vaw tlô hai, Abeipa ta a tah. Cha tita cha ‘Izarei sawzy Izi râh tawhta a kaw chhi papuatuhpa Abeipa hrona reipa ta ei reih,’ tah khao leipa aw ei ta,

15Izarei sawzy cha âmo pathlatuhpazy hnohta ei piepa âmo râh lâ ei chhi pakhua heih awpa vâ ei ta, ‘Izarei sawzy Maw lâ râh tawhta nata âmo a chadai paina râh zydua tawhta a vaw chhi papuatuhpa Abeipa hrona reipa ta ei reih,’ ama tah tyh bâ aw.

16“Moh teh u, nga patutuhpa hluhpi tuah aw na ta, âmo ta Izarei sawzy cha ama patu aw. Cha khai tawhta sakathaipa hluhpi tuah heih aw na ta, âmo ta tlâhpi to nata tlâhthlôh to liata Izarei sawzy cha tlua aw ei ta, lôpanô khaoh to liata ama tlua aw.

17Ama hrozie zydua ei hmô khai. Kei tawhta a nyu thei leipa ei ta, ama paraona chhao ei mo tawhta a nyu thei vei.

18Ama khazoh nothlahpa pasichhihpa rizy ta ei râh papuapalei ei ta, ama pasichhihnazy ta ei ryuto râh ama pabiepa vâta, cha ama paraona nata ama moleina cha, a lie no ta ei thô tua chai aw ei,” Abeipa ta a tah.

19Hy Abeipa, ei thatlôna nata ei thokhy, Nôpona noh liata ei chhai tyhpa y, Phopizy khizaw kaokih tawhta nâ lâ a vy aw ei ta, Hetana heta ama tah aw: “Haipa biezy tah leipa ta cha, Miah pathlatuhpazy ta khâpa ryu hmah to leipa ei ta; Athôhna a hnei leipa hmo phahnai leipazy tah leipa ta cha, Khâpa ryu hmah to veih ei.

20Chyhsapa ta anosasyh ta a khazohzy â tao thei ma? Chazy cha khazoh châ veih ei.”

21“Chavâta pachâ teh u, Ei thatlôna nata ei hmotaotheina pahnosa aw ei na ta, Ei kha ta chhâzaw a daih awpa ta ei pahnosa aw ei. Chatanachata ei moh cha Abeipa a châ tahpa ama pahno aw,” Abeipa ta a tah.

← Chapter 15 Jump to: Chapter 17 →