Jeremiah 19

Chin (Mara Bible RV (BSI))

← Chapter 18 Jump to: Chapter 20 →

1Abeipa ta hetana heta a tah: “Sie la, beihvituhpa beihlei titheih kei chalei la, phopi machâ thokha nata theihthaipazy hry liata machâ thokha a chhi la,

2Hârâsi Chhikao angiana kiah liata Hinô Sawchapawpa Saikao lâ sie la, cha liata na hnohta bie ei cha chhopa he kei phuah mah y.

3Hetana heta na tah aw: ‘Hy Zudâh beizy nata Zerusale khihsawzy saih u, Abeipa bie he thei teh u. Pheisaihzy Abeipa, Izarei Khazohpa ta hetana heta a tah: Pachâ teh u, he su liata chhiena rarôh ypa vaw patlôsa aw na ta, a theipa maihta ama nah a khai aw.

4Kei na siesai ei ta, âmo nata âmo pathlatuhpazy nata Zudâh beizy ta ama pahno beih leipa khazoh hropazy lâta atheihnazy hlâ ei ta, he su he papuapalei ei ta, thaileina a hnei leipazy thisaih ta ama pabie haw.

5Bâlâ su sâhpazy tao ei ta, raopa hlânazy châta ama sawchapawzy mei liata rao ei ta, Bâlâ lâ ama hlâ tyh. Cha cha keima biepiepa châ leipa ta, ei hnawpa châ hra leipa ta, ei palôh liata chhao a lâ beih leipa a châ.

6Chavâta moh teh u, nohzy a vaw tlo hai, Abeipa ta a tah. Cha nohzy liata cha, he su he Tôphe tahpa châ khao leipa aw ta, Hinô Sawchapawpa Saikao tahpa châ khao hra aw vei. Thiena Saikao tahpa tlao a châ ha aw.

7He su liana heta Zudâh nata Zerusale hmochhuahpazy cha hraoleipa pachâsa aw na ta, âmo cha ama chariahpazy hmiakô liata nata ama hrona la a chhuahpazy ku liata zaozi ta ei papao aw ei. Ama rizy cha avâ pavawzy nata alei sahrâhpazy lao ta ei pie aw.

8He khihpi he roryhrapa ta paysa aw na ta, hmaotô chie awpa ta ei tao aw. A chapiapa maihta rarôh y tah aw ei ta, a hmah zydua vâta ama hmao ama tô chie aw.

9Ama sawchapawzy nata ama sawchanôzy sa paniesa aw ei na ta, ama chariahpazy nata ama hrona la a chhuahpazy ta dôh aw ei ta, nôpopa ta ama paysa tita, mo to ta ama vaihzy sa ama nie aw.’

10“Chatawhcha na sielâhpazy mohmô liata beihlei titheih cha pakei aw chi ta,

11ama hnohta hetana heta na tah aw, ‘Pheisaihzy Abeipa ta hetana heta a tah: Chyhsa ta beihvituhpa beihlei titheih pakei ta, taopathi thei awpa a châ khao leipa hawhta, he phopi nata he khihpi he pakei aw na ta, taopathi theipa châ khao aw vei. Athipa rizy cha su hro liata pabu nawpa su a y lei awpa vâta, Tôphe liata tlâ ama pabu khai aw.

12Cha tlu chata he su nata a chhôh liata a pahrâpazy chô liata tao aw na ta, he khihpi he Tôphe hawhta ei tao ha aw, Abeipa ta a tah.

13Zerusale ozy nata Zudâh beizy ozy, avâ liata hmozy lâta hmohlâpazy hlâna vâphuh to nata khazoh hropazy lâta dopa hlâna patlaina vâphuh to cha, Tôphe su hawhta papuapaleipa a châ aw.’”

14Chatawhcha Zeremiah cha Abeipa ta hrohsona bie phuah awpa ta a tuana su Tôphe tawhta a vy ta, Abeipa o dôhpachhôh tlyhmia liata a duah ta, zawpi zydua hnohta hetana heta tah ta:

15“Pheisaihzy Abeipa, Izarei Khazohpa ta hetana heta a tah, moh teh u, ama kuh a pachhasa ei ta, ei biezy ama nathlie khoh leipa vâta, he khihpi chô liata nata a khichapeih zydua chô liata chhiena patlôsa awpa ta ei phuahpa kha ei vaw patlôsa aw.”

← Chapter 18 Jump to: Chapter 20 →