Jeremiah 41

Chin (Mara Bible RV (BSI))

← Chapter 40 Jump to: Chapter 42 →

1Thla sarina liata, Elisâmâ sawchapawpa Nethaniah sawchapawpa Ismela, abei chi nata beimachâzy hry liata pakha cha, chyhsa pahrawh a chhipa ta, Mizpâ liata Ahikâ sawchapawpa Kedaliah lâ a vy ta. Mizpâ liata hmaohkha ta pati ama nie hai nota,

2Nethaniah sawchapawpa Ismela cha a chyhsa a chhipa pahrawhzy chhaota thyu ei ta, Sâphâ sawchapawpa Ahikâ sawchapawpa, Babylaw bei ta râhvaotuhpa ta a taopa Kedaliah cha zaozi ta thie ha ei ta.

3Kedaliah hnohta Mizpâ liata Zu chyhsa a ypa zydua nata cha liata Kaldia pheisaih a ypazy chhao, Ismela ta a thie pâ ha hra ei.

4Kedaliah thiepa a châ tawhta a noh nona liata, ahy hmahta ama pahno hlâta,

5Sekhe, Silô nata Samâri khihpizy tawhta chyhsa sychariezy cha, ama kâhhmizy ngyupa ta, ama chysiazy hriepa ta nata ama pôhpazy âpa ta vaw tlô ei ta. Abeipa Achhyna o liata hlâ awpa niepa hlânazy nata ropahâhpazy vaw phaoh ei ta.

6Nethaniah sawchapawpa Ismela cha âmo dy awpa ta Mizpâ tawhta pua ta, lâpi tlykha cha laih ta. Â tyh nah ei ta, ama hnohta, “Ahikâ sawchapawpa Kedaliah lâ a vy teh u,” tah ta.

7Khihpi amâ vaw ngia nahta, Nethaniah sawchapawpa Ismela nata â chhipa chyhsazy ta âmo cha thie ei ta, ama ri cha khaohtlô liata thy ei ta.

8Ama hry liata chyhsa pahrawhzy deikua ta Ismela hnohta, “Miah thie khah y. Lyuzy liata âtâ sâh, bâli sâh, sathaw nata kheihti hluhpi nyupa eima hnei,” tah ei ta. Chavâta âmo cha ama vaw sielâhpazy a thiena liata thie hra leipa ta a pahlôh ha ei.

9Kedaliah a thiena liata Ismela ta a thie pâpazy ri a thyna cha, Bei Âsâ ta Izarei bei Bâsâ tawhta a vaih nawpa ta a chaopa khaohtlô châ ta, khaohtlô lai ngaitapa a châ. Nethaniah sawchapawpa Ismela ta khaohtlô cha athipa rizy ta a pabie haw.

10Pheisaih hyutuhpa Nebuzarâdâ ta Ahikâ sawchapawpa Kedaliah ryureina ry liata y awpa ta Mizpâ liata a siesaipa mohropa zydua cha, abei sawchanôzy chhaota, Ismela ta sei ta â chhi ha ei. Nethaniah sawchapawpa Ismela ta âmo cha sei ta patu ta, Amawna râh lâ a siekhei ha ei.

11Nethaniah sawchapawpa Ismela ta hmo pha leipa a taopa thâtih zydua cha, Kariah sawchapawpa Zôhanâ nata a hnohta a ypa pheisaih hyutuhpa zydua ta ama thei nahta,

12ama pheisaih zydua a chhipa ta, Nethaniah sawchapawpa Ismela a dyuh awpa ta sie ei ta. Kibiô tipo laipa liata kei pha ei ta.

13Kariah sawchapawpa Zôhanâ nata pheisaih hyutuhpa zydua cha, Ismela ta â chhipa chyhsa zydua ta ama vaw hmô nahta, a ly ngaita ei ta.

14Ismela ta Mizpâ tawhta sei ta â chhipa zydua cha, ama hnôh lâ a paliepa ta vaw kua ei ta, Kariah sawchapawpa Zôhanâ lâ a vy ha ei ta.

15Nethaniah sawchapawpa Ismela nata chyhsa pachariezy deikua cha, Zôhanâ tawhta a râ ei ta, Amawna râh lâ ama sie haw.

16Chatanachata Nethaniah sawchapawpa Ismela ta Ahikâ sawchapawpa Kedaliah a thie tawhta, a hrohpa ta Mizpâ tawhta â chhipa zydua cha, Kariah sawchapawpa Zôhanâ nata a hnohta a ypa pheisaih hyutuhpa zydua ta kei pachha ei ta. Pheisaihzy, chanôzy, hawtizy nata hrilyupazy cha, Zôhanâ ta Kibiô tawhta â vaw chhi pakhua ha ei.

17Sie ei ta, Izi râh lâ pangai a chhuahpa ta, Bethlehe kiapâh Keru Kihâ liata a chhâh ei ta.

18Nethaniah sawchapawpa Ismela ta Babylaw bei ta râhvaotuhpa ta a taopa Ahika sawchapawpa Kedaliah a thie hapa vâta, Kaldia mo chi ei ta, Izi râh lâ sie amâ chhuahpa a châ.

← Chapter 40 Jump to: Chapter 42 →