Jeremiah 37

Chin (Mara Bible RV (BSI))

← Chapter 36 Jump to: Chapter 38 →

1Babylaw bei Nebukaneza ta bei châ awpa ta a raopa Zôsia sawchapawpa Zedekia cha, Zehôki sawchapawpa Kôniah vyuhpa ta Zudâh râh liata a vaw bei ta.

2Châhrasala ano nata a chakaotuhpazy nata râhsawzy ta Abeipa bie hrohsopa Zeremiah pakah ta a reipazy cha nathlie leipa ei ta.

3Bei Zedekia ta Selemiah sawchapawpa Zehukâ nata Mâsei sawchapawpa theihthaipa Zephania cha hrohsopa Zeremiah lâ tuah ta, a hnohta, “Ngiachhiepa ta Abeipa eima Khazohpa lâ thlah miah chhâpa mah y,” tahpa ta kei pachhosa ta.

4Zeremiah cha patâhna o liata ama khô leipa vâta, zawpi hry liata a ngia heih pua heih tah thei thlâh ha chy ta.

5Phiraoh pheisaihzy Izi râh tawhta kaw pua ha ei ta. Cha thâtih cha Zerusale a dôh haipa Kaldia mo ta ama thei nahta, Zerusale cha a sysai ei ta.

6Chatawhcha hrohsopa Zeremiah hnohta Abeipa bie vaw tlô ta:

7“ Abeipa, Izarei Khazohpa ta hetana heta a tah: Keima nâ saohiah awpa ta châ vaw tuahtuhpa Zudâh bei hnohna chata hetana heta kei chho muh vy, ‘Pachâ teh, nâma cha bao awpa ta â khypa Phiraoh pheisaihzy cha, âmo râh, Izi râh lâ amâ lie aw.

8Kaldia mo vaw kua aw ei ta, khihpi he amâ dyuh aw. Khihpi cha la aw ei ta, mei ta ama rao aw.

9Abeipa ta hetana heta a tah, “Kaldia mo cha miah ama siesai pyly aw,” tahpa ta nâmosasyh a dôvei khuh vy. Sie aw veih ei.

10Châ dyuhtuhpa Kaldia pheisaih zydua pahnie khai ha u la, hmahphaohpazy deita ama poh o chhôh liata ama ypa chhao ta, vaw thyu aw ei ta khihpi he mei ta ama rao pyly aw.’”

11Phiraoh pheisaihzy ama chipa vâta Kaldia pheisaihzy ta Zerusale amâ sysai nahta,

12Zeremiah cha Benzami chi hry liata a ryuto râh a la awpa ta, Zerusale puasaipa ta Benzami râh lâ sie ta.

13Benzami thokhy chhikao a tlô nahta, Hânaniah sawchapawpa Selemiah sawchapawpa a moh Iriza ama tahpa vaituhpazy hyutuhpa vaw y ta. Ano chata Zeremiah hnohta, “Kaldia mo lâ nâ râ,” tahpa ta hrohsopa Zeremiah cha patu ta.

14Zeremiah ta, “Haipa bie a châ, Kaldia mo lâ a râ va na,” tah ta. Châhrasala Iriza ta nathlie khoh leipa ta, Zeremiah cha patu ta, beimachâzy lâ a chhi ta.

15Beimachâzy cha Zeremiah chô liata ama hiehâh ngaita ta, tu ei ta, chârohtuhpa Zawnathâ o liata patâh ei ta. Zawnathâ o cha patâhna o châta hmâpa a châ.

16Zeremiah cha alei ry lâta patâhna o liata a ngia ta, cha liata noh hluhpi a y tawhta,

17Bei Zedekia ta ano cha paawsa ta. Abei ta a o liata arulâta bie hiahri ta, a hnohta, “ Abeipa tawhta bie miakha chhâ a y ma?” tah ta. Zeremiah ta, “A y,” tah ta. Abei hnohta, “Babylaw bei ku liata hlâpa na châ aw,” tah ta.

18Zeremiah ta Bei Zedekia hnohta, “Nâma chô liata tlyma, châ chakaotuhpazy chô liata tlyma, he zawpi chô liata tlyma, khâpa hmo ma parao na ta, eina patâh chi?

19Na hnohta, ‘Nâ nata he râh he a dyuh awpa ta, Babylaw bei a vy aw vei,’ tahpa ta hrohsona bie châ chhopazy kha, khataih liata ama y khai haw?

20Hy ei zibeipa abei y, tahmâ na nathlie awpa ta ei châ haw. Ei hawna nawhpa he na hmiakô liata rie vaw tlô sala, chârohtuhpa Zawnathâ o lâ rie na paphao pakhua khah y. Chataleipatala cha liata ei thi pathlei aw na,” tah ta.

21Chatanachata Bei Zedekia ta biepie ta, Zeremiah cha abei o vaituhpazy dôhpachhôh tlyhmia liata patâh ei ta. Khihpi liata viahchhâ a chhâ hlâlei cha, viahchhâ taotuhpazy lâpi liata ama taopa viahchhâ cha noh chareih ta tlâ kha lymâ pie ei ta. Cha hawhna chata Zeremiah cha vaituhpazy dôhpachhôh tlyhmia liana chata y thlâh ha ta.

← Chapter 36 Jump to: Chapter 38 →