Jeremiah 39

Chin (Mara Bible RV (BSI))

← Chapter 38 Jump to: Chapter 40 →

1Zudâh bei Zedekia abeina kô chakina, thla hrawhna liata, Babylaw bei Nebukaneza nata a pheisaih zydua ta Zerusale za siehnao ei ta, khihpi cha dôh ei ta.

2Zedekia abeina kô hrawh hleikhana, thla palihna, cha thla noh chakina noh ta, khihpi thokhy cha su kha liata pacho thei ha ei ta.

3Babylaw bei beimachâ zydua a vy ei ta, a liah thokhy chhikao liata a tyuh ei ta. Nekâsareze, Samkânebô, beimachâ hyutuh chaipa Sâseki nata pheisaih hyutuhpa Nekâsareze nata Babylaw bei beimachâ hropa zydua a hlao khai ei ta.

4Zudâh bei Zedekia nata pheisaih zydua ta âmo cha ama hmô nahta, a râ ei ta. Thokhy â pathopa mianozy likawh liata a ypa chhikao lâ tawhta a zo ta khihpi cha puasaipa ta, Arabâ lâ pangai ei ta.

5Châhrasala Kaldia pheisaihzy ta a chadai ei ta, Zerikô bypi liata Zedekia cha pha ha ei ta. Patu ei ta, Hâmathi râh Riblâ liata a ypa Babylaw bei Nebukaneza lâ a chhi ei ta. Cha liata Nebukaneza ta a thâtih pachia ta.

6Babylaw bei ta Zedekia sawchapawzy cha, ama paw mohmô lia tlai ta Riblâ liata thie ta. Babylaw bei ta Zudâh beimachâ zydua chhao thie khai ta.

7Zedekia cha a mozy thaoh ta, Babylaw lâ a chhi awpa ta bâliazy ta chahry ta.

8Kaldia mo ta abei o nata khihsaw o zydua mei ta rao ei ta, Zerusale thokhyzy cha parao ei ta.

9Pheisaih hyutuhpa Nebuzarâdâ ta khihpi liata chyhsa a nguapazy, ano lâ a râpazy nata chyhsa hropa zydua cha Babylaw lâ sei ta â chhi khai ha ei.

10Pheisaih hyutuhpa Nebuzarâdâ ta khâpa hmah a hnei leipa chyhsa sipasapa thokhazy cha, Zudâh râh liata siesai ta, kre sadôzy nata lyuzy a pie ei.

11Babylaw bei Nebukaneza ta Zeremiah kyh liata pheisaih hyutuhpa Nebuzarâdâ hnohta,

12“Zeremiah cha kei la la, a phapa ta mohôh mah y. Pasasa leipa la, a cha chhopa hawhta a chô liata tao mah y,” tahpa ta biepie ta.

13Chatanachata pheisaih hyutuhpa Nebuzarâdâ, beimachâ hyutuh chaipa Nebusabâ, bei ryhraokheituhpa Nekâsareze nata Babylaw beimachâ hropa zydua ta

14chyhsa tuah ei ta, Zeremiah cha vaituhpazy dôhpachhôh tlyhmia tawhta a vaw chhi ei ta. Sâphâ sawchapawpa Ahikâ sawchapawpa Kedaliah cha, a o la Zeremiah a chhi awpa ta maophaohna pie ei ta. Chatanachata Zeremiah cha râhsawzy hry liata pahrâ ha ta.

15Vaituhpazy dôhpachhôh tlyhmia liata patâhpa ta a y nona kha, Zeremiah hnohta Abeipa bie vaw tlô ta:

16“Vawh la, Kusi chyhsa Ebemele hnohta, ‘Pheisaihzy Abeipa, Izarei Khazohpa ta hetana heta a tah: Pachâ teh, he khihpi kyh ei reipazy kha, phana lâ châ leipa ta, chhiena lâta vaw patlôsa aw na ta, cha noh liata nâma hmiakô liata tlai ta patlôsapa a châ aw.

17Nâ deikua cha, cha noh liata cha pachha aw na ta, na chi kawpa chyhsazy ku liata hlâpa châ aw va chi, Abeipa ta a tah.

18Cha pachha tlai aw na ta, zaozi ta pao leipa aw chi ta, kei eina ngâpa vâ chi ta, na hrona na paboh aw, Abeipa ta a tah,’ tahpa ta kei chho mah y,” tah ta.

← Chapter 38 Jump to: Chapter 40 →