2 Chronicles 1

Dagbani Bible (Naawuni Kundi Kasi)

Jump to: Chapter 2 →

1Dauda bia Sulemaana ni daa ʒin’ o nam ʒiishee, Yawɛ ŋun nyɛ o Naawuni ŋɔ daa be o sani ka chɛ ka o mali yiko pam.

2Ka Sulemaana daa boli Izraɛlnim’ zaa mini sapashinnim’ bɛn daa su tɔbbihi tuhilituhili mini bɛn su kɔbigakɔbiga fukumsi ni sariakaritiba ni Izraɛl toondaannim’ zaa ni daŋ kam ni kpamba zaa na.

3Ka Sulemaana mini niriba bɛn daa be o sani maa zaa daa chaŋ jɛmbu shee din daa be Gibiɔn la, dama Yawɛ dabili Musa ni daa mali Naawuni chirigibu shee suɣ’ shɛli tiŋgban’ nɛl’ ni la daa bela nimaani.

4(Amaa Naa Dauda daa pun chɛ ka bɛ zaŋ Naawuni Alikauli Adaka la Kiriatijiarim na ti zal’ o ni daa chɛ ka bɛ ti suɣ’ shɛl’ la puuni Jɛrusalɛm).

5Amaa Bɛzalɛl ŋun daa nyɛ Uri bia, ka nyɛ Hur yaaŋa la ni daa mali daanya sara maligu bimbini shɛl’ la din’ daa kpalim bela Gibiɔn Yawɛ biɛhigu shee la tooni, ka Naa Sulemaana mini zama maa zaa daa jɛm Naawuni nimaani.

6Ka Sulemaana daa chaŋ nimaani daanya sara maligu bimbini din daa be Yawɛ chirigibu shee suɣili la puuni Yawɛ tooni la gbini nti kɔri biŋkɔbiri tuhili m-mali sara shɛli bɛ ni zaŋdi nyɔri buɣim la di zuɣu.

7Dindali maa yuŋ ka Naawuni daa ka Naa Sulemaana sanna ti yɛl’ o, “Suhimi ma a ni bɔri ni n ti a shɛli.”

8Ka Sulemaana daa yɛli Naawuni, “A daa wuh’ a yurilim din galisi ka ka tariga ŋɔ ni nyɛ shɛm zaŋ chaŋ m ba Dauda sani, ka zaŋ ma leei naa zal’ o zaani.

9Yawɛ ŋun nyɛ Naawuni ŋɔ, chɛ ka a ni daa lo m ba Dauda alikauli shɛl’ la niŋ pali pumpɔŋɔ, dama a zaŋ ma leei naa ni n su ninvuɣ’ shɛb’ bɛn galisi ka taŋkpaɣu ŋɔ.

10Tim’ ma yɛm mini baŋsim shɛli n ni yɛn zaŋ gbib’ niriba ŋɔ, dama ŋuni n-lee ni tooi gbib’ a niriba bɛn galisi pam ŋɔ?”

11Ka Naawuni daa garigi yɛli Sulemaana, “Dimbɔŋɔ ni be a suhu ni ka a bi suhi ma buni bee azichi bee jilima bee ni n ku a dimnim’ ti a ka mi bi suhi ma nyɛvili wɔɣinli, amaa ka naɣ’ suhila yɛm mini baŋsim shɛli a ni yɛn zaŋ gbibi n ni zaŋ a leei naa ni a su ninvuɣ’ shɛb’ ŋɔ zuɣu,

12n ti a yɛm mini baŋsim. N ni lan ti a buni mini azichi ni jilima, ka di galisi gari na’ shɛb’ bɛn daa daŋ a tooni la zaa dini, ka na’ shɛb’ bɛn ti yɛn dol’ a nyaaŋa na mi so dini ti ku paai li.”

13Di saha ka Sulemaana daa yi jɛmbu shee din be Gibiɔn Yawɛ chirigibu shee suɣili la ni n-labi Jɛrusalɛm ti su Izraɛlnima.

14Ka Naa Sulemaana daa ti laɣim chɛchɛbunsi mini yuri n-nya chɛchɛbunsi tuhili ni kɔbisinahi, yuri mi tuhi’ pinaayi. Ka o daa zaŋ shɛb’ ti niŋ chɛchɛbunsi tinsi ni, ka chɛ ka shɛb’ mi be o sani Jɛrusalɛm.

15Ka Naa Sulemaana daa chɛ ka anzinfa mini salima galisi Jɛrusalɛm kaman kuɣa la, ka chɛ ka sida dari gba galisi kaman sinsabisi dari ni galisi shɛm Shɛfɛla la.

16Ka Naa Sulemaana daa dari yuri Ijipti mini Silisia tiŋgbana ni, ka naa kɔhigɔriba daa dari ba Silisia na kaman bɛ daa ni nyɛ shɛm.

17Bɛ daa yi darila chɛchɛbuŋ Ijipti tiŋgbɔŋ ni anzinfa laɣibaligu kɔbisiyɔbu, ka dari wɔhu mi anzinfa laɣibaligu kɔbiga ni pihinu. Lala ka bɛ gba daa kɔhiri ba tiri Hitinim’ mini Siria nanim’ zaa.

Jump to: Chapter 2 →