2 Chronicles 2

Dagbani Bible (Naawuni Kundi Kasi)

← Chapter 1 Jump to: Chapter 3 →

1Ka Naa Sulemaana daa niŋ nia ni o me jɛmbu duu ti Yawɛ yuli jilima, ka me omaŋmaŋ’ nam yili.

2O daa piila tumtumdiba tuhi’ pisopɔin mini kuɣ’ kpɛriba bɛn be zoya ni tuhi’ pihinii, ka pii niriba tusaata ni kɔbisiyɔbu ni bɛ lihiri tumtumdiba maa ka bɛ tumda.

3Ka Naa Sulemaana daa tim ti yɛli Taai Naa Hiram, “A ni daa ti m ba Dauda sida dari ka o me o yil’ la, niŋmi n gba lala.

4Pumpɔŋɔ, n yɛn mɛla Yawɛ ŋun nyɛ n Naawuni ŋɔ jɛmbu duu, ka zaŋ li ti o ka bɛ tuɣindi tulaale zim din nyom viɛl’ o tooni; ka zaŋdi bɔrɔbɔro parilambihi piɛri tab’ maani sara tir’ o, ka lan maani bɛ ni zaŋdi sara shɛli nyɔri buɣim la asiba mini zaawuni kam ni vuhim dabisa dali ni gol’ palli churi ni ni Yawɛ ŋun nyɛ ti Naawuni ŋɔ ni lan zali chu’ shɛŋa ti Izraɛlnim’ ʒiɛmani kam ni la dali.

5N ni yɛn me du’ shɛli maa ni galisi, dama ti Naawuni maa galisiya gari wuni kam.

6Amaa ka ŋuni n-lee ni tooi me duu ti o, dama alizanda mini di galisim zaa ku saɣ’ o? Ka m mi lee nyɛ ŋuni nti mɛri duu tir’ o? N kul yɛn mɛla luɣ’ shɛli n ni yɛn tuɣindi tulaale zim o tooni.

7Dinzuɣu pumpɔŋɔ bom’ ninvuɣ’ so ŋun mali baŋsim din ni tooi zaŋ salima mini anzinfa ni daanya ni kuriti tum tuma, ka lan mi gali zaŋ wuɣi ago ʒiɛkpain mini ago sabilifaa ni ago ʒiɛkpeein, ka lan mi binyɛra kpɛbu n-ti ma, ka o kana ti pahi m ba Dauda ni daa pun bo tuumbaŋdiba shɛb’ zali ka bɛ be n sani Juda mini Jɛrusalɛm ŋɔ zuɣu.

8Chɛ ka bɛ ŋma Lɛbanɔn sida mini sipirɛs ni ɛligum dakuɣiri ti ma na. N ni chɛ ka n niriba kana ti pah’ a niriba zuɣu, dama m mi ni a niriba maa mi Lɛbanɔn dakuɣiri maa ŋmabu pam.

9Chɛ ka bɛ ŋma dakuɣiri maa pam ti ma, dama n ni yɛn me du’ shɛli maa ni galisi pam ka viɛla.

10N ni ti a niriba bɛn yɛn ŋma dakuɣiri maa alikama biɛlim din tibisim nyɛ tɔn tusaayi mini chi din tibisim nyɛ tɔn tusaayi ni wain lita tuhi’ kɔbisinahi ni olivi kpam lita tuhi’ kɔbisinahi.”

11Di saha ka Taai Naa Hiram daa sabi gbaŋ ti Sulemaana n-garigi yɛl’ o, “Yawɛ ni yur’ o niriba maa zuɣu n-chɛ ka o zaŋ a leei bɛ naa maa.”

12Hiram daa lan yɛli, “Paɣimiya Yawɛ ŋun nyɛ Izraɛlnim’ Naawuni ŋun nam zuɣusaa ni dunia, ka nyɛ ŋun ti Naa Dauda bi’ so ŋun mali baŋsim mini yɛm, ka lan mi tuma viɛnyɛliŋga, din ni me Yawɛ jɛmbu duu ka lan me omaŋmaŋ’ nam yili ŋɔ.

13“N ni chɛ ka Huramabi ŋun nyɛ tuumbaŋda, ka mali yɛm pam la ka a sanna.

14O ma daa nyɛla Dan zuliya ni paɣa, ka o ba nyɛ Taai nira. O nyɛla ŋun bɔhim salima mini anzinfa ni daanya ni kuriti ni kuɣa ni dari tuma zaa; ka lan nyɛ ŋun mi ago ʒiɛkpeein mini ago sabilifaa ni ago ʒiɛkpain ni tan’ piɛl’ viɛlli wuɣibu. O lan mi binkpɛra balibu kam kpɛbu, ka ni tooi kpe li kaman bɛ ni wuh’ o ni o kpe li shɛm. O ni kana ti pah’ a ninvuɣ’ shɛb’ bɛn nyɛ nuhi tuumbaŋdiba mini n dan’ a ba Dauda ninvuɣ’ shɛb’ bɛn nyɛ nuhi tuumbaŋdiba la zuɣu.

15Dinzuɣu di yi nyɛla n dan’ ni yɛli ma chi mini alikama ni wain ni kpa’ shɛli yɛla la dina, zaŋmi li ti tinim’ bɛn nyɛ n dan’ tumtumdiba ŋɔ na.

16Ti ni ŋma a ni bɔri Lɛbanɔn dakuɣ’ shɛŋa zaa ti a, ka lo li n-zaŋ niŋ teeku ni n-dolisi kom tahi Jɔpa na, ka yi kana ti kpuɣi li kuli Jɛrusalɛm.”

17Ka Sulemaana daa chɛ ka bɛ kali tinzunnim’ bɛn be Izraɛl tiŋgbɔŋ maa ni kaman o ba Dauda ni daa chɛ ka bɛ kali ba shɛm la. Ka bɛ kalinli daa yiɣisi niriba tuhi’ kɔbiga ni tuhi’ pihinunaata ni kɔbisiyɔbu.

18Ka o daa pii bɛ niriba tuhi’ pisopɔin ni bɛ ʒiri ʒiya, ka pii niriba tuhi’ pihinii ni bɛ chaŋ zoya tiŋgban’ ni ti kpɛri kuɣa, ka zaŋ niriba tusaata ni kɔbisiyɔbu ni bɛ lihiri ba ka bɛ tumdi tuma maa.

← Chapter 1 Jump to: Chapter 3 →