2 Chronicles 15

Dagbani Bible (Naawuni Kundi Kasi)

← Chapter 14 Jump to: Chapter 16 →

1Ka Naawuni Shia daa kpe Odɛd bia Azaria ni,

2ka o daa chaŋ ni o ti tuhi Asa soli, ka yɛl’ o, “Nyin’ Naa Asa mini Juda zuliya ni Bɛnjamin zuliya zaa, wummiya n ni yɛn yɛli ya shɛm ŋɔ, yi yi kul be Naawuni sani, o gba ni be yi sani. Yi yi bo o, yi ni nya o. Amaa yi yi zaɣis’ o, o gba ni zaɣisi ya.

3Dama Izraɛlnim’ daa ti chɛ Naawuni maŋli jɛmbu ka di yuui pam, ka mi ka maligumaana ŋun ni wuhiri ba; ka daa bi lan doli zaligu yaha.

4Amaa bɛ ni daa ti be muɣisigu ni, ka ŋmaligi kpa Yawɛ ŋun nyɛ Izraɛl Naawuni maa polo ti bo o, bɛ daa nya o.

5Di saha maa ha so daa yi yɛn chaŋ shɛli polo ka labina o suhu bi doya; dama tinsi maa nim’ daa kul zabirimi.

6Bɛ daa piripirila taba, ka zuliya ŋɔ tuhiri zuliya ŋɔ, ka tiŋ’ ŋɔ nim’ mi tuhiri tiŋ’ ŋɔ nima, dama Naawuni n-daa chɛ ka suhugarigu balibu kam ŋɔ paai ba.

7Amaa nyin’ ŋuna, di simdi ni a mali suhukpeeni, di chɛ ka a kɔba ni chɔɣisi, dama a nya a ni tum tuun’ shɛli maa laara.”

8Asa ni daa wum Odɛd bia Azaria daanabitali yɛtɔɣa maa, ka di ti o suhukpeeni pam, ka o daa wurim buɣa din jɛmbu chihiri la Juda mini Bɛnjamin zuliya tinsi ni zaa, ka lan wurim buɣ’ shɛŋa din daa be o ni daa tuhi fa Ifriim zoya ni tiŋ’ shɛŋa la ni, ka daa malimali Yawɛ sara maligu bimbini din daa be Yawɛ jɛmbu duu varanda tooni la.

9Ka niriba pam daa yi Ifriim mini Manaasa ni Simiɔn zuliya tiŋgbana ni n-zo n-kuli Asa sani, dama bɛ daa nyaya ka Yawɛ ŋun nyɛ o Naawuni maa be o sani. Ka Asa daa boli Judanim’ mini Bɛnjamin zuliya niriba n-tabili bɛn zaa daa nyɛ saamba ka be bɛ sani maa.

10Bɛ daa laɣimla Jɛrusalɛm Asa ni daa di nam ka di ti paai yuun’ pinaanu gol’ so ŋun pahir’ ata la ni.

11Ka bɛ daa zaŋ bɛ ni tuhi tɔbu n-di biŋkɔb’ shɛb’ la naɣilahi kɔbisiyopɔin mini piɛri tusaayopɔin m-mali sara ti Yawɛ dindali maa.

12Ka bɛ daa lo alikauli ni bɛ ni jɛmdi Yawɛ ŋun nyɛ bɛ yaannim’ Naawuni ŋɔ ni bɛ suhuri zaa ni bɛ shihi zaa;

13ka ŋunkam zaɣisi ni o ku jɛm Yawɛ ŋun nyɛ Izraɛl Naawuni maa, dilan’ yi nyɛla ninkurigu bee bia bee doo bee paɣa, bɛn’ kum’ o.

14Ka bɛ daa duhi bɛ yɛhi tahi pampam m-po pɔri Yawɛ sani, ka piɛbi kikahi mini binyila.

15Ka Judanim’ zaa suhuri daa paligi bɛ pɔri maa zuɣu, dama bɛ daa pola pɔri maa ni bɛ suhuri zaa, ka suhi Naawuni bɛ ni bɔr’ shɛli zaa, ka Naawuni daa deei bɛ suhigu maa, ka ŋun’ Yawɛ daa ti ba vuhim luɣilikam zaa.

16Hal Naa Asa daa yihila Maaka ŋun daa nyɛ o yabipaɣ’ la Napaɣ’ nam ni, o ni daa me buɣili Ashɛra ŋmahinli zal’ la zuɣu. Ka Naa Asa daa chɛ ka bɛ daai o ni me ŋmahinli shɛli zali maa luhi n-wurim li ka zaŋ li ti nyo buɣim Kidirɔn Vinvamli ni.

17Amaa bɛ daa bi wurim buɣ’ jɛmbo luɣ’ shɛŋa din daa be Izraɛl tiŋgbani ni la dina. Di zaa yoli, Asa daa kul ʒiɛla yim o biɛhigu ni zaa.

18Ka o daa zaŋ o ba ni daa zaŋ pin’ shɛŋa zaa ti Naawuni la mini ŋun maŋmaŋ’ ni mali pin’ shɛŋa din daa nyɛ anzinfa mini salima binyɛra la zaa nti zali Naawuni jɛmbu duu puuni.

19Ka bɛ mini so daa bi lan tuhi tɔbu hal ti paai Asa nam dibu maa yuun’ pihitanaanu saha.

← Chapter 14 Jump to: Chapter 16 →