2 Chronicles 5

Dagbani Bible (Naawuni Kundi Kasi)

← Chapter 4 Jump to: Chapter 6 →

1Sulemaana ni daa tum Yawɛ jɛmbu duu tuma maa zaa naai, ka o daa zaŋ o ba Naa Dauda ni daa pun zaŋ neen’ shɛŋa din daa nyɛ anzinfa mini salima ni la’ shɛŋa zaa ti Naawuni la nti zali Naawuni jɛmbu duu maa nɛma zaashee.

2Di saha ka Naa Sulemaana daa laɣim Izraɛl kpamba zaa mini daŋ kam ni kpamba Jɛrusalɛm na ni bɛ ti zaŋ Yawɛ Daalikauli Adaka la Dauda tiŋ’ din nyɛ Ziɔn la ni na.

3Ka Izraɛlnim’ maa daa laɣim naa sani chu’ shɛli din daa puhiri chira ayopɔin ni la dali.

4Ka Izraɛl kpamba maa daa kana, ka Lɛvinim’ daa kpuɣi Alikauli Adaka maa.

5Ka bɛ daa kpuɣi Alikauli Adaka maa mini Yawɛ chirigibu shee suɣili maa nti pahi neen’ kasi shɛŋa din daa be di puuni la zaa. Ka bɛ daa zaŋ Alikauli Adaka maa mini Yawɛ chirigibu shee suɣili maa ni la’ kasi shɛŋa din daa be di puuni zaa na. Maligumaaniba mini Lɛvinim’ n-daa ʒi li na.

6Ka Naa Sulemaana mini Izraɛl niriba bɛn zaa daa laɣim o sani maa daa be Alikauli Adaka maa tooni. Bɛ daa kɔri piɛri mini naɣilahi mali sara hal ka so daa naan ku tooi lan kali ba bee m-baŋ bɛ kalinli ni nyɛ shɛm yaha.

7Di saha ka maligumaaniba maa daa zaŋ Naawuni Daalikauli Adaka maa ti kpɛhi Naawuni jɛmbu duu maa puuni luɣ’ kasi zaa kasi shee la nti zali di zaashee chɛrubinim’ la kpiŋkpama lɔŋni.

8Ka chɛrubinim’ maa daa teei bɛ kpiŋkpama pɔbi Alikauli Adaka maa zaashee maa, ka di daa chɛ ka bɛ kpiŋkpama pɔbi Alikauli Adaka mini di dapuhi.

9Amaa dapuhi maa daa wɔɣ’ pam, ka so daa yi ʒe luɣ’ kasi shee maa ka lihi, o ni tooi nya di nyoya ni. Amaa so daa yi zani samban’ ni, o ku tooi nya li. Di na kul be nimaani hal ni zuŋɔ.

10Binshɛli daa ka Alikauli Adaka maa puuni, naɣila Musa ni daa zaŋ kuɣ’ parilana ayi shɛŋa niŋ di puuni Sinai Zoli zuɣu luɣ’ shɛli Yawɛ ni daa lo Izraɛlnim’ alikauli bɛ ni daa yi Ijipti tiŋgbɔŋ ni na nyaaŋa la.

11Saha shɛli maligumaaniba maa ni daa yi luɣ’ kasi shee maa na, bɛ daa bi lan doli zaɣila nyɛla yaakaza, dama maligumaaniba maa zaa daa pun malila bɛmaŋa.

12Ka Lɛvi baansi zaa bɛn daa nyɛ Asaf mini Hɛman ni Jɛdutun mini bɛ bidibisi ni bɛ dɔɣiriba zaa daa ye tan’ piɛl’ viɛlli binyɛra ka gbibi guŋgombihi din mali chaɣisa mini mɔɣilɔnima ni goonjɛnim’ ŋmɛra, ka bɛ mini maligumaaniba kɔbiga ni pisi bɛn daa nyɛ kikapiɛbiriba la daa zani sara maligu bimbini maa wulimpuhili polo.

13Di daa yi nyɛla kikapiɛbiriba mini baansi tuma ni bɛ laɣim duhi bɛ yɛhi n-tibigi ka paɣi Yawɛ ka sokam wum bɛ damli. Bɛ ni daa piɛbiri kikahi maa, ka ŋmɛri guŋgombihi din mali chaɣisa mini biŋkumda shɛŋa din pahi m-paɣiri Yawɛ maa bɛ daa yɛrimi, “O ni nyɛ Naawuni suŋ ka o yurilim bi naari zuɣu.” Di saha ka sagbani daa yi zuɣusaa sirigina ti pali Naawuni jɛmbu duu maa zaa.

14Ka sagbani maa zuɣu daa chɛ ka maligumaaniba ku tooi tum bɛ tuma, dama Yawɛ jilima n-daa pali jɛmbu duu maa zaa.

← Chapter 4 Jump to: Chapter 6 →