2 Chronicles 22

Dagbani Bible (Naawuni Kundi Kasi)

← Chapter 21 Jump to: Chapter 23 →

1Ka Jɛrusalɛmnim’ daa zaŋ Ahazia ŋun daa nyɛ Jɛhɔram kaluɣi la n-leei naa zal’ o ba zaani; dama ŋmɛnditoya bɛn daa doli Laribunim’ maa ka sansani maa ni na daa ku Jɛhɔram bikpamba zaa. Dinzuɣu ka Jɛhɔram bia Ahazia daa leei Juda naa maa.

2Ahazia yuma daa nyɛla yuun’ pihinahinaayi saha shɛl’ o ni daa di nam maa. O daa di nam maa ʒini Jɛrusalɛm la yuun’ yini. O ma yuli n-daa booni Atalia, o daa nyɛla Omri bia.

3O gba daa dolila Naa Ɛhab daŋ niriba naba, dama o ma n-daa nyɛ o saawaralana n-wuhir’ o ka o tumdi tuumbiɛri.

4O daa tum tuumbiɛri Yawɛ sani kaman Ɛhab daŋ niriba ni daa niŋ shɛm la, dama o ba kum nyaaŋa, bɛna n-daa nyɛ o saawaranim’ bɛn luh’ o.

5O daa deei bɛ yɛligu hal ti dolila Izraɛl Naa Ɛhab bia Jɔram ŋun nyɛ Izraɛl naa la chaŋ Ramɔtigiliad nti tuhi Siria naa Hazaɛl. Ka Sirianim’ maa daa ti Jɔram daŋa.

6Ka o daa labi Jɛziriil ni o ti tib’ o ni daa deei dan’ shɛŋa o ni daa chaŋ Rama ka o mini Siria Naa Hazaɛl ti tuhi la ni. Ka Ahazia ŋun daa nyɛ Juda naa Jɛhɔram bia la daa chaŋ Jɛziriil ni o ti kaai Naa Jɔram ŋun daa nyɛ Naa Ɛhab bia la o dansi maa zuɣu.

7Amaa Naawuni daa zaliya ni Jɔram kaabu maa n-yɛn nyɛ Ahazia bahigu. Dama o ni daa yi nimaani ka o mini Jɔram doli tab’ chana, ka bɛ daa chirigi Nimshi bia Jɛhu, Yawɛ ni daa zali so ni o kum’ Ɛhab daŋ ni niriba zaa la.

8Jɛhu ni daa kuri Ɛhab daŋ niriba maa saha shɛli maa, ka o daa tuhi Juda kpambaliba mini Ahazia mabihi bidibisi bɛn daa doli Ahazia maa soli n-daa ku ba.

9Ka o daa gbaai Ahazia shee bɔbu, ka bɛ ti nya o ka o sɔɣila Samaria, ka bɛ gbaag’ o tahi Jɛhu sani nti ku o. Amaa bɛ daa sɔɣ’ o, dama bɛ daa yɛlimi, “O nyɛla Jɛhɔshafat ŋun daa jɛmdi Yawɛ ni o suhu zaa la yaaŋa.” Ka Ahazia daŋ niriba ni so daa lan kani ŋun ni tooi di nam.

10Ahazia ma Atalia ni daa nya ka o bia lan kani maa, ka o bahi noli ni bɛ kum Juda nabihi zaa.

11Amaa ka nabipuɣiŋga ŋun yuli daa booni Jɛhɔshabiat la daa sɔɣi kpuɣi Ahazia bidibiga Jɔash bɛ ni daa yɛn ku nabi’ shɛb’ maa ni yino min’ o biyola ti sɔɣ’ o dugbɛrili ni. Lala ka Jɛhɔshabiat ŋun daa nyɛ Naa Jɛhɔram bipuɣiŋga, ka nyɛ Ahazia tizɔpaɣa ŋun daa nyɛ Jɛhɔiada ŋun daa nyɛ maligumaani la paɣ’ la daa zaŋ o sɔɣi, ka Atalia daa bi tooi ku o.

12Ka o daa be bɛ sani hal ni yuma ayɔbu n-kul sɔɣila Naawuni jɛmbu duu maa ni, ka Atalia daa leei naa su tiŋgbɔŋ maa.

← Chapter 21 Jump to: Chapter 23 →