2 Chronicles 16

Dagbani Bible (Naawuni Kundi Kasi)

← Chapter 15 Jump to: Chapter 17 →

1Naa Asa ni daa di nam ka di ti paai yuun’ pihitanaayɔbu saha shɛli, ka Izraɛl Naa Baasha daa kana ti liri Judanima, ka me goma gili Rama ni di chɛ ka so ku tooi yi Juda Naa Asa tiŋgban’ ni bee n-kana ti kpe di ni.

2Di saha ka Asa daa zaŋ anzinfa mini salima din daa be Naawuni jɛmbu duu mini nayil’ la n-tim ni bɛ zaŋ ti ti Naa Bɛnhadad ŋun daa nyɛ Siria naa, ka be Damaskus la ka yɛl’ o,

3“Chɛ ka m min’ a laɣi tab’ zɔri kaman a ba mini m ba ni daa be shɛm la. Nyama, Anzinfa mini salima ŋɔ, n zaŋ li mi ti a pini. Larigim a mini Izraɛl Naa Baasha zɔsimdi alikauli la din ni chɛ ka o zaŋ o tɔbbihi yiɣisi ka chɛ ma.”

4Ka Bɛnhadad daa wum Naa Asa ni yɛl’ o shɛm maa, ka tim o sapashin’ kpamba mini bɛ tɔbbihi ka bɛ chaŋ ti lu Izraɛl fɔntinsi zuɣu n-daa tuhi nyaŋ Ijɔn mini Dan ni Ɛbɛlibɛtimaaka ni nɛma ni daa be fɔntin’ shɛŋa ni zaa Naftali tiŋgban’ ni.

5Naa Baasha ni daa wum lala, ka o daa chɛ Rama mɛbu, ka o tuma maa daa zani tariga.

6Di saha ka Naa Asa daa zaŋ Judanim’ zaa pa omaŋ’ zuɣu ka bɛ chaŋ ti va kuɣ’ shɛŋa mini dakuɣ’ shɛŋa Naa Baasha ni daa mali mɛri Rama maa zaa n-chaŋ ti me Gɛba mini Mizipa.

7Di saha ka anabi Hanani daa ka Juda Naa Asa sanna ti yɛl’ o, “A ni niŋla Siria naa naani ka bi niŋ Yawɛ ŋun nyɛ a Naawuni ŋɔ naani la zuɣu, Siria naa tɔbbihi maa ni ti zo ka chɛ a.

8Itiɔpianim’ mini Libianim’ daa mali tɔbbihi pam bɛn mali chɛchɛbunsi mini wɔribariba, amaa a ni daa niŋ Yawɛ naani la zuɣu, o daa zaŋ ba niŋ a nuu ni.

9Dama Naawuni nina kul gɔrimi gindi dunia ŋɔ ni luɣilikam ni o kpaŋsi ninvuɣ’ shɛb’ bɛn gbibi yɛlimaŋli zaŋ chaŋ o sani suhuri. A tum jɛrilim dimbɔŋɔ puuni, dama pumpɔŋɔ zaŋ chana, a kul yɛn bela tɔb’ tuhibu ni.”

10Ka yɛtɔɣa ŋɔ daa chɛ ka Asa suhu yiɣisi bahi anab’ maa zuɣu, ka o chɛ ka bɛ gbaag’ o kpɛhi duu nti ga o zoligɔnim’ zali, dama yɛlli maa daa chɛ ka o suhu yiɣisi pam bahi anabi maa zuɣu. Di saha ka Asa daa gbaai niriba maa shɛb’ nahimbu.

11Asa ni daa tum tuun’ shɛŋa zaa piligu ni hal ni di bahigu ni bɛ sabi di yɛla niŋ Juda nanim’ mini Izraɛl nanim’ yɛlikura litaafi ni.

12Asa ni daa ti paai yuun’ pihinahiyinika o nam maa ni saha shɛli, ka naba polo dɔro daa gbaag’ o, ka o dɔro maa daa muɣis’ o pam; amaa dɔro maa ni daa muɣis’ o maa zaa yoli, o daa bi suhi Yawɛ, amaa ka naɣ’ dolila timanim’ bɔri sɔŋsim.

13Naa Asa daa niŋla o nam maa ni yuun’ pihinahi ni yini ka faai siɣ’ o yaannim’ sani.

14Ka bɛ daa sɔɣ’ o omaŋmaŋ’ ni daa chɛ ka bɛ chibi sil’ shɛli ka di be Dauda tiŋ’ la ni la puuni. Bɛ daa zaŋ o sɔŋla garibil’ zuɣu, ka daa chɛ ka tulaale duɣiriba zaŋ tulaale mih’ o, ka bɛ zaŋ o ti sɔɣi, ka mali buɣim titali sɔŋ ti o kuli maa jilima.

← Chapter 15 Jump to: Chapter 17 →