2 Chronicles 34

Dagbani Bible (Naawuni Kundi Kasi)

← Chapter 33 Jump to: Chapter 35 →

1Jɔsia yuma daa nyɛla yuma anii saha shɛl’ o ni daa di nam. O daa di nam maa ʒini Jɛrusalɛm la yuun’ pihitaniyini.

2O daa tum din tuhi Yawɛ sani, ka dol’ o yab’ Dauda soli, ka bi ŋmaligi kpa o nudirigu polo bee o nuzaa polo.

3Dama o ni daa di nam maa zaŋ chaŋ yuma anii, saha shɛl’ o ni daa na nyɛ bia maa, ka o daa piligi jɛmd’ o yab’ Dauda Naawuni. Yuun’ shɛli din pahiri yuun’ pinaayi saha ka o daa piligi wurindi buɣa jɛmbu luɣ’ shɛŋa din daa be Juda mini Jɛrusalɛm la. O daa lan wurim buɣili Ashɛrim mini bɛ ni kpe binnan’ shɛŋa ni bɛ ni zaŋ kuriti mali binnan’ shɛŋa zali zaa.

4O daa lan chɛ ka bɛ wurim Baalnim’ bimbina din daa be nimaani mini tulaale zim tuɣilibu bimbina din daa ʒe Baalnim’ maa zuɣusaa la zaa; ka ŋme ŋ-ŋma buɣili Ashɛrim mini bɛ ni kpe binnan’ shɛŋa ni bɛ ni daa me binnan’ shɛŋa zal’ la zaa m-baɣisibaɣisi li ka di leei taŋkpa’ zim ka bɛ zaŋ li chaŋ ti kpaai bahi ninvuɣ’ shɛb’ bɛn daa maani maligu tiri li gbala zuɣu.

5O daa lan nyo tindaannim’ kɔba buɣim bɛ bimbina zuɣu, ka daa yihi Juda mini Jɛrusalɛm daɣiri ni.

6Ka o daa lan chaŋ Manaasa mini Ifriim ni Simiɔn zuliya tinsi ni n-zaŋ hal ni Naftali zuliya tinsi ni nti gili bɛ dabari la ni zaa

7n-wurim di bimbina la, ka ŋme ŋ-ŋma buɣili Ashɛrim min’ o binnana la zaa m-baɣisibaɣisi li ka di be kaman taŋkpa’ zim, ka daa ŋme ŋ-ŋma tulaale zim tuɣilibu bimbina din daa be Izraɛl tiŋgbɔŋ maa ni zaa. Di nyaaŋa ka o daa lab’ kuli Jɛrusalɛm.

8O ni daa di nam maa zaŋ chaŋ yuun’ pisaayika saha din nyɛ saha shɛl’ o ni daa yihi tiŋgbɔŋ maa mini Naawuni jɛmbu duu daɣiri ni naai la nyaaŋa, ka o daa tim Azalia bia Shafan mini Maasɛya ŋun daa nyɛ bɛ fɔŋ maa ni gomna la ni Jɔahaz bia Jɔa ŋun daa nyɛ gbaŋŋmar’ la ni bɛ ti mali Yawɛ ŋun nyɛ o Naawuni la jɛmbu duu.

9Ka bɛ daa chaŋ maligumaaniba zuɣulan’ Hilikia sani nti zaŋ bɛ ni daa deei laɣ’ shɛli Naawuni jɛmbu duu la ti o. Lɛvinim’ bɛn daa nyɛ dunɔguliba la n-daa deei li Manaasa mini Ifriim zuliya niriba ni Izraɛlnim’ bɛn kpalim la zaa sani. Bɛ daa lan deei shɛli Juda mini Bɛnjamin zuliya ni Jɛrusalɛmnim’ zaa sani ti o.

10Ka bɛ daa zaŋ li ti ninvuɣ’ shɛb’ bɛn daa nyɛ Yawɛ jɛmbu duu maa malibu tuma zuɣulaannim’ maa ka bɛ mi daa zaŋ li ti ninvuɣ’ shɛb’ bɛn daa maani Yawɛ jɛmbu duu maa ni bɛ zaŋ li mal’ li ka di niŋ yaa.

11Bɛ daa zaŋ li tila kapintanim’ mini tammɛriba ni bɛ da kuɣ’ kpɛra mini yɔɣira ni gurilɔnima m-mali Juda nanim’ ni daa chɛ ka shɛli polo lu la me.

12Ka niriba maa daa tum bɛ tuma maa ni nimmaŋtali. Jahat mini Obadia bɛn daa nyɛ Lɛvinima, ka yi Mɛrari daŋ ni na la mini Zakaria ni Mɛshulam bɛn daa yi Kɔhat daŋ ni na la ka bɛ daa zaŋ leei bɛ zuɣulaannima. Ka Lɛvinim’ shɛb’ bɛn zaa daa mi biŋkumda ŋmɛbu viɛnyɛliŋga la

13daa su ʒiʒiriba fukumsi, ka wuhiri bɛnkam daa tumdi tuma balibu kam bɛ ni yɛn tumdi li shɛm. Ka Lɛvinim’ maa shɛb’ daa nyɛ gbansabiriba, ka shɛb’ nyɛ kpamba, ka shɛb’ mi nyɛ dunɔguliba.

14Bɛ ni daa yihiri laɣ’ shɛli bɛ ni daa zaŋ tahi Yawɛ jɛmbu duu na la saha shɛli ka maligumaana Hilikia daa nyɛ Yawɛ ni daa zaŋ zaligu shɛŋa ti Musa ni o ti o niriba la kundi.

15Ka Hilikia daa yɛli Shafan ŋun daa nyɛ gbaŋŋmar’ la, “N nyala zaligu kundi Yawɛ jɛmbu duu maa ni;” ka o daa zaŋ kundi maa ti Shafan.

16Ka Shafan mi daa zaŋ li chaŋ ti ti naa ka yɛl’ o, “A ni zal’ a kpambaliba maa ni bɛ tum tuun’ shɛlikam zaa la, bɛ be di tumbu ni.

17Bɛ yihi laɣ’ shɛli bɛ ni nya Yawɛ jɛmbu duu maa ni n-zaŋ li ti tuma zuɣulaannim’ mini bɛ tumtumdiba maa.”

18Di saha ka Shafan ŋun daa nyɛ gbaŋŋmar’ maa daa lan yɛli naa, “Maligumaana Hilikia n-zaŋ kundi ŋɔ ti ma.” Di nyaaŋa ka Shafan daa karim li wuhi naa.

19Naa ni daa wum zaligu kundi yɛtɔɣa maa, o daa darigimi cheeg’ omaŋmaŋ’ binyɛrigu.

20Ka naa daa yɛli Hilikia maa mini Shafan bia Ahikam ni Maika bia Abidɔn ni Shafan ŋun daa nyɛ gbaŋŋmar’ la ni naa kpambala Asaaya,

21“Chamiya ti bɔhi baŋ din be Yawɛ sani n-ti m mini Izraɛlnim’ bɛn kpalim ni Judanima zaŋ chaŋ ti ni nya kundi shɛli maa puuni yɛtɔɣa maa polo; dama Yawɛ suhu yiɣisiya pam bahi ti zuɣu, ti yaannim’ ni daa bi doli Yawɛ yɛligu, ka bi lan doli din kam zaa daa sabi kundi ŋɔ puuni maa zuɣu.”

22Di saha ka Hilikia mini naa ni daa tim ninvuɣ’ shɛb’ maa daa chaŋ paɣ’ so ŋun daa nyɛ anabi, ka o yuli booni Hulda sani. O yidana n-daa nyɛ Tikiva bia Shallum. O daa nyɛla Harihas yaaŋa ka nyɛ ŋun su zabbanim’ fukumsi. (Di saha paɣ’ maa daa bela Jɛrusalɛm yapala polo.) Ka bɛ daa zaŋ bɛ ni mali yɛtɔɣ’ shɛli yɛl’ o.

23Ka o daa yɛli ba, “Yawɛ ŋun nyɛ Izraɛlnim’ Naa ŋɔ ni yɛli shɛm m-bɔŋɔ: Yɛlimiya ninvuɣ’ so ŋun tim ya n sani maa na,

24Yawɛ ni yɛli shɛm m-bɔŋɔ: Nyamiya n ni chɛ ka zaɣ’ biɛɣu lu tiŋgbɔŋ ŋɔ mini di niriba zuɣu din nyɛ yɛl’ biɛ’ shɛŋa zaa din sabi kundi shɛli bɛ ni karim wuhi Juda naa maa ni la.

25Bɛ ni zaɣisi ma jɛmbu ka tuɣindila tulaale zim maani bɛ buɣa la zuɣu, bɛ chɛ ka bɛ nuhi tuma zaa ku ma suli ka n suhu ni yiɣisi bahi yi yaŋɔ nim’ zuɣu ka ku maai.

26Amaa zaŋ chaŋ Juda naa ŋun tim ya na ni yi ti bɔhi baŋ din be Yawɛ sani ŋɔ polo, Yɛlimiy’ o: Yawɛ ŋun nyɛ Izraɛlnim’ Naawuni ŋɔ yɛliya: Zaŋ chaŋ a ni wum yɛtɔɣ’ shɛŋa la polo,

27a ni niŋ tuuba a suhu ni, ka siɣis’ amaŋ’ Naawuni sani n-darigi cheeg’ a binyɛrigu ka kum niŋ ma zaŋ chaŋ a ni wum ka n yɛli ni n ni niŋ Jɛrusalɛm mini di niriba shɛm la polo, man’ Yawɛ yɛliya, ‘N gba wumya.’

28N ni ti chɛ ka a dɔni a kabiri ni ni suhudoo, ka n chɛ ka a paag’ a yaannim’ tooni pɔi. A nini ku nya n ni ti yɛn chɛ ka zaɣibiɛ’ shɛli zaa lu Jɛrusalɛm mini di niriba zuɣu maa.” Ka bɛ zaa daa zaŋ o yɛtɔɣa ŋɔ labi ti yɛli naa.

29Di saha ka Naa daa tim boli Juda mini Jɛrusalɛm kpamba zaa na.

30Ka naa mini Judanim’ zaa ni Jɛrusalɛmnim’ ni maligumaaniba ni Lɛvinim’ ni sokam zaa bɛn nyɛ wɔɣira ni tarimba zaa daa laɣim Yawɛ jɛmbu duu, ka Naa Jɔsia ti karim Naawuni kundi shɛli bɛ ni daa nya Yawɛ jɛmbu duu maa ni la yɛtɔɣa zaa ka bɛ wum.

31Ka Naa daa zan’ o zaashee n-lo alikauli Yawɛ tooni ni o ni jɛmd’ o, ka dol’ o zaligunim’ mini zaligu shɛŋa din pahi ni o suhu zaa ni o shia zaa, ka niŋ kaman alikauli yɛtɔɣ’ shɛŋa din sabi kundi maa puuni ni wuhi shɛm.

32Di saha ka o daa chɛ ka ninvuɣ’ shɛb’ bɛn be Jɛrusalɛm mini Bɛnjamin zuliya zaa po pɔri ni bɛ ni gbibi alikauli maa, ka Jɛrusalɛmnim’ daa niŋ kaman Naawuni ŋun nyɛ bɛ yaannim’ Naawuni daalikauli maa ni wuhi shɛm.

33Ka Jɔsia daa va binshɛɣukam din jɛmbu chihira zaa Izraɛlnim’ ni daa su tiŋgban’ shɛli maa ni ti bahi, ka chɛ ka niriba bɛn be Izraɛl zaa jɛmdi Yawɛ ŋun nyɛ bɛ Naawuni maa. Naa Jɔsia ʒiɛmani maa ni zaa, bɛ daa bi lan jɛm binshɛli pahi Yawɛ ŋun nyɛ bɛ yaannim’ Naawuni maa zuɣu.

← Chapter 33 Jump to: Chapter 35 →