2 Chronicles 3

Dagbani Bible (Naawuni Kundi Kasi)

← Chapter 2 Jump to: Chapter 4 →

1Ka Sulemaana daa piligi Yawɛ jɛmbu duu maa mɛbu Jɛrusalɛm Mɔria Zoli zuɣu Aruna ŋun daa nyɛ Jɛbusi nir’ la kabɔɣili la ni. O ba Dauda ni daa wuhi ni bɛ mɛm’ li luɣ’ shɛli din nyɛ Yawɛ ni daa yi ŋun Naa Dauda zuɣu la.

2O ni daa di nam ti paai yuma anahi ni gol’ so ŋun pahir’ ayi daba ayi dali ka o daa piligi duu maa mɛbu.

3Sulemaana ni daa buɣisi Naawuni jɛmbu duu maa mɛbu shɛm m-bɔŋɔ: Di wɔɣilim daa nyɛla mita pisinaayopɔin, ka di yɛliŋ nyɛ mita awɛi kaman kurimbuni ha binyɛra buɣisibu ni daa nyɛ shɛm.

4Ka di varanda wɔɣilim daa nyɛ mita awɛi, dimbɔŋɔ wuhiya ni di mini jɛmbu duu maa puuni yɛliŋ daa nyɛla yim, ka di dubu mi daa nyɛ mita pihinunaanahi, ka o daa chɛ ka bɛ dooi salima alali pa di puuni dukpina zuɣu.

5Ka o daa chɛ ka bɛ zaŋ sipirɛs dari pili pie tab’ tabili duu maa puuni dukpini, ka dooi salima alali pa di zuɣu, ka chɛ ka bɛ mali abie tihi mini zoligɔnim’ kɔtomsi pa di zuɣu.

6Ka o daa lan chɛ ka bɛ zaŋ kuɣ’ viɛla pie taba n-dihi duu maa nachiinsi. Parivaim salima ka bɛ daa zaŋ dihi li nachiinsi.

7Ka o daa chɛ ka bɛ dooi salima pa duu maa dukpina mini di yɔɣira ni di dunɔbihi ni di pundi zaa zuɣu, ka daa lan chɛ ka bɛ kpe chɛrubinima n-zaŋ tabili dukpina maa zuɣu.

8Ka o daa lan me luɣ’ kasi zaa kasi shee, ka di wɔɣilim mini duu maa yɛliŋ nyɛ yim. Di daa nyɛla mita awɛi, ka di yɛliŋ gba daa nyɛ mita awɛi. Ka o chɛ ka bɛ zaŋ salima alali, din tibisim gari mɛtiriki tɔn pisi n-dooi pa di zuɣu.

9Salima kpahi tibisim daa nyɛla kilɔgiram giram kɔbisinu ni pisopɔin ni biɛla. Ka o daa chɛ ka bɛ dooi salima pa di zuɣusaa duri la dukpina zaa zuɣu.

10O daa lan chɛ ka bɛ zaŋ dari kpe chɛrubinima, n-dooi salima pa bɛ zuɣu, ka o zaŋ ba zali luɣ’ kasi zaa kasi shee maa.

11Chɛrubinim’ maa kpiŋkpama zaŋ tuɣi tab’ wɔɣilim daa nyɛla mita awɛi. Zaɣ’ yino kam kpiŋkpaŋ’ yini wɔɣilim daa nyɛla mita ayi ni biɛla n-chaŋ ti shihi dukpini, ka kpiŋkpaŋ’ din’ la din gba wɔɣilim daa nyɛ mita ayi ni biɛla la mi chaŋ ti shihi chɛrubi ŋun’ la kpiŋkpaŋa.

12Ka Chɛrubi ŋun’ maa gba kpiŋkpaŋ’ yini din wɔɣilim daa nyɛ mita ayi ni biɛla la daa chaŋ ti shihi dukpini. Ka kpiŋkpaŋ’ din’ la, din’ gba wɔɣilim daa nyɛ mita ayi ni biɛla maa mi daa chaŋ ti shih’ o kpee la kpiŋkpaŋa.

13Chɛrubinim’ ayi maa kpiŋkpama zaŋ tuɣi taba wɔɣilim daa nyɛla kaman mita awɛi, ka bɛ daa ʒe bɛ naba zuɣu, ka bɛ nina kpa dunoli.

14Ka Sulemaana daa chɛ ka bɛ wuɣi tan’ ʒiɛkpeein mini tan’ sabilifaa ni zaɣ’ ʒiɛkpain ni tan’ piɛl’ viɛlli, ka mali chɛrubinim’ kɔtomsi pa di zuɣu n-zaŋ li yili dunoli maa.

15Ka Naa Sulemaana daa lan chɛ ka bɛ mali daanya daantalis’ ayi, zaɣ’ yini kam wɔɣilim daa nyɛla mita pinaanu, ka bɛ daa mali zuɣuri tamtam di zuɣu, ka zuɣu yini kam wɔɣilim daa nyɛ mita ayi ni biɛla; ka bɛ daa zaŋ li sa duu maa tooni.

16Ka o daa chɛ ka bɛ mali zoligɔnim’ kaman nyiŋgokɔriti la n-zaŋ li pa daantalisi maa zuɣusaa, ka daa lan chɛ ka bɛ zaŋ daanya mali pumpɔrinchihi kɔtomsi bini kɔbiga n-zaŋ li yiliyili zoligɔnim’ maa.

17Ka o daa zaŋ daantalisi maa sa Naawuni jɛmbu duu maa dunɔdali luɣa zuɣu; yini daa sala nudirigu polo, ka din’ la mi sa nuzaa polo. Ka bɛ daa boli din sa nudirigu polo maa Jachin, ka boli din sa nuzaa polo maa mi Bɔaz.

← Chapter 2 Jump to: Chapter 4 →