Song of Solomon 4

Ewe 2014 (EƲEGBE BIBLIA)

← Chapter 3 Jump to: Chapter 5 →

1Kpɔ ɖa, nye dzi lɔlɔ̃a, èdze tugbe loo! Kpɔ ɖa, ènyakpɔna ale gbegbe! Wò ŋkuwo nye ahɔnɛwo le wò moxevɔ la godo. Wò ɖa le abe gbɔ̃hawoe le abu ɖim le Gilead-to ŋu ene.

2Wò aɖuwo le abe alẽha si woko fu na vɔ teti, eye wodo tso tsileƒe va ene. Wo katã dzi evenɔviwo, ɖeketɔ meku le wo dome o.

3Wò nuyiwo le abe ka dzẽ ene, eye wò nu nyale kpɔkpɔm. Wò alɔgowo dze abe yevuboɖa si me wofe ene, le wò moxevɔ godo.

4Wò kɔ le abe David ƒe xɔ tsrala si wotu hena gbetakpɔkpɔ ene. Woku akpoxɔnu akpe ɖe eŋu, wo katã nye kalẽtɔwo ƒe akpoxɔnuwo.

5Wò no eveawo le abe sãdevi eve alo zi evenɔvi siwo le gbe ɖum le dzogbenyawo dome ene.

6Mawɔ kaba ayi ɖanɔ kotoklobotowo dzi kple lifitogbɛwo dzi, va se ɖe esime anyinu nafa, eye vɔvɔli nu ayi.

7Nye dzi lɔlɔ̃a, èsɔ, nyakpɔ, dzuƒe aɖeke mele ŋuwò o.

8Nye ŋugbetɔ, ɖi va kplim tso Lebanon-to dzi! Ði va kplim tso Lebanon-to dzi! Dzo le Amana-to tame; ɖi le Senir to kple Xermon-to tame, dzatawo kple lãklewo nɔƒewoe.

9Nɔvinye nyɔnu, nye ŋugbetɔ, ègblẽ tame nam. Ŋku si nètre kpɔmee kple atsyɔ̃ɖonu si le wò kɔdzonu me la gblẽ tame nam.

10Nɔvinye nyɔnu, nye ŋugbetɔ, wò lɔlɔ̃ vivina loo! Wò lɔlɔ̃ vivina wu wain, eye wò ami sisiwo ƒe ʋeʋẽ lílilĩ ƒo atike ʋeʋẽewo katã tɔ ta.

11Nye ŋugbetɔ, wò nuyi ɖaa seƒoƒo me tsi vivi; anyitsi kple notsi le wò aɖe te. Wò awuwo me le ʋeʋẽm lílilĩ abe Lebanon tɔ ene.

12Nɔvinye nyɔnu, nye ŋugbetɔ, ènye abɔ si ƒe ʋɔ wodo, abɔ si le tutu; tsidzɔƒe si nu wotre.

13Wò numiemiewo nye yevuboɖabɔ si me kutsetse nyuiwo, henaseƒoƒo kple gbe ʋeʋẽewo le.

14Gbe ʋeʋẽewo kple agumetaku, gbekee, botsyo kple dzudzɔ ʋeʋẽe dogbewo katã, kotoklobo kple dzogbebable kpakple atike veviwo katã hã le afi ma.

15Tsidzidzi le abɔ me, tsi gbagbe vudo kple tɔʋu si le sisím tso Lebanon-to dzi lae nènye.

16Dzigbemeya, tso! Anyigbemeya, va! Miƒo to nye abɔ me ne eƒe ʋeʋẽ lílilĩ la nade afi sia afi. Na ne nye dzi lɔlɔ̃a nava eƒe abɔ me, ne wòaɖu eƒe kutsetse nyuiawo.

← Chapter 3 Jump to: Chapter 5 →