Song of Solomon 7

Ewe 2014 (EƲEGBE BIBLIA)

← Chapter 6 Jump to: Chapter 8 →

1Nyɔnu bubume, wò azɔlizɔzɔ nyale kpɔkpɔm le atokota me loo! Wò kpe toɖoewo le abe kpe xɔasi si aɖaŋudɔwɔla aɖe wɔ ene.

2Wò agɔbɔ nye goe toɖoe; si me wain si wotɔtɔ la mevɔna le o. Wò ƒodo nye lu si woli kɔe, eye dzogbenya ƒo xlãe.

3Wò no eveawo le abe sãdevi eve, alo zinɔ evenɔviwo ene.

4Wò kɔ le abe nyiɖuxɔ tsrala ene. Wò ŋkuwo nye tá le Xesbon le Batrabim-gbo nu. Wò ŋɔti le abe Lebanon-xɔ tsrala si le Damasko ta kpɔm ɖa ene.

5Wò ta le wò, ameti la nu abe Karmel ene. Wò taɖa le legbee abe aɖabɛ ene; eƒe nyonyo zu kɔsɔkɔsɔ bla fia.

6Lɔlɔ̃tɔ, èdze tugbe, nyakpɔna; ɖetugbi, wò nu lé dzi nam loo!

7Èle tsralɛ abe deti ene; wò nowo le abe detawo ene.

8Mebe made deti la dzi alé eƒe alɔwo. Wò nowo nenye wainkpo le wainka ŋu, eye wò gbɔgbɔ ƒe ʋeʋẽ lílilĩ nenɔ abe yevutɔ tɔ ene.

9Wò nu me nenɔ abe wain nyuitɔ ene. Ekema nàna wain la nasí blewuu ato nuyiawo kple aɖuawo dome ayi.

10Nye dzi lɔlɔ̃a tɔ menye, eye ele diyem vevie.

11Nye dzi lɔlɔ̃a, va, na mído yi agbleta aɖadze kɔƒe aɖe me.

12Na mído yi waingblewo me kaba aɖakpɔ ɖa be wainkaawo do lotò, seƒoƒowo kè, eye yevuboɖatiwo ƒo se hã. Afi ma matsɔ nye lɔlɔ̃ ana wò le.

13Agbitsawo ƒe ʋeʋẽ lílilĩ kaka ɖi, kutsetse nyui vovovowo le míaƒe ʋɔtru nu. Nye dzi lɔlɔ̃a, medzra wo ɖo na wò; yeyeawo kple xoxoawo siaa.

← Chapter 6 Jump to: Chapter 8 →