Amos 4

Galacian 1989 (Biblia SEPT)

← Chapter 3 Jump to: Chapter 5 →

1Escoitade esta palabra, vacas de Baxán que morades sobre o monte de Samaría, as que asoballades os necesitados, as que esfolades os pobres, mentres lles dicides ós vosos maridos: "Botádenos de beber!"

2Xurou o Señor Iavé pola súa santidade: "Havos chegar o tempo no que vos arrastren con adivais e o resto de vós con garfos.

3Teredes que saír polas gretas tirando cara adiante, para serdes levadas ás partes do Hermón, —Oráculo de Iavé—.

4Ide en romaría a Betel para pecar, ou a Guilgal, e amoreade delitos; levade de mañá os sacrificios e ó día terceiro os vosos décimos.

5Queimade parte do levedado en acción de grazas, anunciade ben alto as ofrendas voluntarias xa que así vos peta, israelitas, —Oráculo do Señor Iavé—.

6Eu, da miña banda, déravos dentes limpos en todas as vosas vilas e carencia de pan en todos os vosos casais, mais non volvestes a min —Oráculo de Iavé—.

7Denegueivos a chuvia cando faltaban aínda tres meses para a colleita, fixen que chovese nunha vila si e noutra non; unha leira foi regada e outra, onde non choveu, murchou.

8Dúas vilas e ata tres foron a tombos ata a veciña por beber auga, mais non se deron saciado e aínda así non volvestes a min —Oráculo de Iavé—.

9Ferinvos co caruncho e coa mera, mandei a seca ós vosos hortos e viñas; as vosas figueiras e oliveiras comeunas o saltón, mais non volvestes a min —Oráculo de Iavé—.

10Mandei sobre vós unha peste semellante á de Exipto, pasei pola espada os vosos mozos ó tempo que capturaban os vosos cabalos, fixen subir ós vosos narices o fedor do campamento, mais non volvestes a min —Oráculo de Iavé—.

11Derrubeivos coma derrubara Deus a Sodoma e Gomorra e quedastes coma muxica saída dun incendio, mais non volvestes a min —Oráculo de Iavé—.

12Por iso voute tratar deste xeito, Israel; e porque te vou tratar así aparéllate para o encontro co teu Deus".

13Pois olla: Quen moldeou os montes e creou o vento, quen lle descobre ó home o que está a matinar, quen fai o abrente e mais as tebras, quen camiña sobre os lombos da terra, Iavé, Deus dos Exércitos, é o seu nome.

← Chapter 3 Jump to: Chapter 5 →