John 9

Guarani 1970 (Ñandeyara Ñe'ẽ)

← Chapter 8 Jump to: Chapter 10 →

1Jesús ohasávo ohóvo peteĩ henda rupi ohecha peteĩ kuimba'e onace va'ekue ciego.

2Ha hemimbo'e kuéra oporandu Jesúspe: --Mbo'ehára, ¿mba'e rehe piko ko kuimba'e onace ciego? ¿Túva kuéra pecado rehe pipoko, terãpa ha'e ipecádo tee rehe?

3Jesús he'i ichupe kuéra: --Ndaha'éi ipecádo rehe, ha ndaha'éi avei túva kuéra pecado rehe; Tupã Ñandejára ohechaukaséguinte uvei ha'e rupi pe ha'e ikatúva ojapo.

4Ára reheve tekotevẽ ajapo pe che mbou va'ekue rembiapo; oguahẽta pyhare ha avave ndaikatu mo'ãvéima omba'apo.

5Aime aja ko yvy ári che ha'e yvypóra kuéra resapehára.

6Jesús he'i rire ko'ã mba'e ondyvu yvýpe, ojapo tuju hendýpe ha omoĩ ohecha'ỹva resa rehe.

7Ha he'i ichupe: --Tereho ejovahéi pe Siloe ý ono'õhápe (téra he'iséva Temimondo). Pe ohecha'ỹva oho ojovahéi, ha ou jevývo ikatúma ohecha.

8Upéramo umi hóga ypy pegua, ha umi yma ha'e ohecha mboyve ohecha va'ekue ichupe he'i hikuái: --¿Ndaha'éi piko ko kuimba'e ku oguapými va'ekue ojerure tupãmba'e?

9Oime he'íva: --Hẽe, ha'e niko. Ambue katu he'i: --Ndaha'éi; oiméne ijoguahánte. Pe kuimba'e voi katu he'i: --Che ha'e.

10Upémaramo oporandu hikuái pe kuimba'épe: --¿Ha mba'éicha piko ikatu rehecha ko'ãga?

11Pe kuimba'e he'i ichupe kuéra: --Ku kuimba'e Jesús hérava, ojapo tuju, omoĩ che resa rehe, ha he'i chéve: “Tereho pe Siloe ý ono'õhápe ha ejovahéi.” Aha, ajovahéi, ha upévove ahecha.

12Upéramo oporandu hikuái ichupe: --¿Mamo piko oime upe kuimba'e? Ha ha'e he'i ichupe kuéra: --Ndaikuaái.

13Ogueraha hikuái pe yma ohecha'ỹ va'ekuépe fariseo kuéra rendápe.

14Pytu'uha ára va'ekue upe Jesús ojapo ramo tuju ha omonguera pe ohecha'ỹ va'ekuépe,

15ha upéva rehe fariseo kuéra oporandu jevy pe kuimba'épe mba'éichapa ikatu ohecha ra'e. Ha'e he'i ichupe kuéra: --Omoĩ tuju che resa rehe, ha ajovahéi, ha ko'ãga ahecha.

16Upéramo oime umi fariseo kuérava he'i va'ekue: --Upe kuimba'e kóva ojapo va'ekue ndaikatúi Tupã Ñandejára remimboúvo nomomba'éigui pe pytu'uha ára. Ambue kuéra katu he'i: --¿Mba'éicha piko ikatúta ojapo ko'ã milagro ha'e pecador ramo? Ha ojuavy hikuái oñoñe'ẽme,

17ha oporandu jevy hikuái pe ohecha'ỹ va'ekuépe: --¿Ha ndépa mba'e ere pe nde resa omonguera va'ekue rehe? Ha ha'e he'i: --Che ha'e hese Tupã Ñandejára remimbouha.

18Umi Israelita katu ndogueroviaséi ha'e ndohechái hague ha okuera hague. Ipahápe ohenói hikuái pe oñemonguera va'ekue ru ha isýpe,

19ha oporandu ichupe kuéra: --¿Kóva piko ha'e pende ra'y, pe peẽ pejéva ndohechái hague onacévo? ¿Mba'éicha katu piko ko'ãga ohecha?

20Túva kuéra he'i: --Roikuaa niko kóva ore ra'yha, ha ndohechái hague onacévo;

21upéicharamo jepe, ndoroikuaái mba'éicha rupípa ko'ãga ohecha, terã mávapa omonguera ra'e. Peporandúna ichupe; ha'e niko kakuaáma ha oñe'ẽkuaa ojehe.

22Túva kuéra he'i upéva okyhyjégui, Israelita kuéra oñemoĩma ra'e peteĩ ñe'ẽme omosẽ haguã pe sinagógagui oimeraẽva he'ívape Jesús rehe ha'eha pe Cristo.

23Upéva rehe túva kuéra he'i: “Peporandúna ichupe, ha'e niko kakuaáma.”

24Upéramo ohenói jevy hikuái pe kuimba'e ohecha'ỹ va'ekuépe ha he'i hikuái ichupe: --Emomba'eguasúna Tupã Ñandejárape, ore roikuaa upe kuimba'e pecadorha.

25Upéramo ha'e he'i ichupe kuéra: --Che ndaikuaái ha'épa pecador terãpa ahániri. Peteĩ mba'e añoite che aikuaa: ndahechái hague ha ko'ãga ahechaha.

26Ha oporandu jevy hikuái ichupe: --¿Mba'e piko ojapo ra'e nde rehe? ¿Mba'éicha piko omonguera ra'e ndéve pe nde resa?

27Pe kuimba'e he'i ichupe kuéra: --Ha'éma niko kuri peẽme ha na pe che renduséi; ¿maerã piko peipota ha'e jevy peẽme? ¿Terã piko peẽ peikose avei hemimbo'e ramo?

28Upéramo ipochypa hikuái ha he'i ichupe: --Nde niko upe kuimba'e remimbo'e, ore katu Moisés remimbo'e kuéra.

29Ore roikuaa Tupã Ñandejára oñe'ẽ hague Moiséspe; péva katu ndoroikuaái mamóguinte jepépa ou.

30Pe kuimba'e upéramo he'i ichupe kuéra: --¡Kóva katu mba'ete! Peẽ ndapeikuaái mamoguápa, ha chéve che monguera.

31Jaikuaa niko Tupã Ñandejára nohenduiha pecador kuérape; umi ichupe omomba'eguasúva ha ojapóva hembipotápe mante.

32Araka'eve noñehendúiva avave omonguera hague peteĩ onace guive ohecha'ỹ va'ekuépe.

33Ko kuimba'e ndoúi rire Tupã Ñandejára gui, ndaikatúi vaerã mo'ã ojapo mba'eve.

34Upéramo he'i hikuái ichupe: --Nde ne renyhẽte va'ekue pecádogui renacévo, ¿ha piko ore mbo'éta? Ha omosẽ hikuái ichupe pe sinagógagui.

35Jesús oikuaa ra'e omosẽ hague hikuái pe ohecha'ỹ va'ekuépe; ha ojuhúvo ichupe he'i: --¿Rejeroviápa nde pe Tupã Ñandejára Ra'y rehe?

36Pe kuimba'e he'i Jesúspe: --Karai, eréna chéve mávapa ha'e ajerovia haguã hese.

37Jesús he'i ichupe: --Rehecháma niko kuri ichupe; ko oñe'ẽva hína nendive niko ha'e.

38Upéramo pe kuimba'e oñesũ Jesús renondépe ha he'i ichupe: --Ajerovia, che Jára.

39Upéi Jesús he'i: --Che aju ko yvy ári juiciorã; umi ohecha'ỹva ohecha haguã, ha umi ohecháva katu ndohechái haguã opytávo.

40Upéramo fariseo kuérava oĩ va'ekue hendive hína, ohendúvo upéva oporandu hikuái ichupe: --¿Ore nga'u piko ndorohechái avei?

41Jesús he'i ichupe kuéra: --Peẽ ndapehecháiva rire ndaperekói vaerã mo'ã culpa. Peje hague rehe pehechaha katu pereko pe pende pecado rehegua culpa.

← Chapter 8 Jump to: Chapter 10 →