Judges 10

Guarani 2015 (Ñanderuete Ñe’ẽ Porã 2015)

← Chapter 9 Jump to: Chapter 11 →

1Abimelec rire, opu’ã osalva hag̃ua Israélpe, Tola, Pua ra’y, Dodo ra’yre, kuimba’e Isacar tríbu peguáva, oikóva Samírpe, Efrain cérrope.

2Ha’e oisãmbyhy Israélpe 23 áño pukukue; ha omano ha oñeñotỹ Samírpe.

3Tola rire opu’ã Jair, peteĩ Galaadgua, ha’e oisãmbyhy Israélpe 22 áño pukukue.

4Ha’e 30 ita’ýra, omboguatáva 30 búrro ári; ha oguereko hikuái 30 táva, hérava Jair tavakuéra ko ára peve, ha umíva opyta Galaad yvýpe.

5Ha Jair omano, ha oñeñotỹ Camónpe.

6Ha Israel ñemoñarenguéra ojapo jevy ivaíva Ñanderuete resa renondépe, ha omomba’eguasu hikuái: Umi Baal ha Astarótpe, umi Síria járape, Sidon jarakuérape, umi Moab járape, umi Amon ñemoñare járape ha Filisteayguakuéra járape; ha opoi hikuái Ñanderuetégui, omomba’eguasu hag̃ua hikuái ta’ãngakuérape.

7Ha Ñanderuete ipochy Israel ndive, ha oheja ichupekuéra ho’a Filisteaygua ha Amon ñemoñarenguéra pópe.

8Ha’ekuéra ojopy ha oipy’apy asy Israel ñemoñarenguérape oikóva Jordan mboypýri Amorgua yvykuépe, opytáva Galaádpe, 18 áño pukukue.

9Ha umi Amon ñemoñare ohasa hikuái Jordánpe ojeity hag̃ua Juda, Benjamin ha Efrainguakuéra ári, ha oipy’apy hikuái avei ichupekuéra.

10Upémaramo Israel ñemoñarenguéra omba’ejerure asy Ñanderuetépe, he’ívo: Ore roñemoangaipa ne renondépe ropoi haguére ore Járagui romomba’eguasu hag̃ua Baalkuérape.

11Ha Ñanderuete he’i jevy Israel ñemoñarenguérape: Ndapeikoiva’ekue piko Egípto poguýpe, ha napendejopyiva’ekue piko Amorgua, Amongua, Filisteaygua,

12Sidongua, Amalecgua ha Madiayguakuéra, ha pemba’ejerure asývo chéve Che posalva ipokuéragui.

13Upeichavérõ jepe pepoi jevy chehegui pemomba’eguasu hag̃ua ambue jarakuérape, upévare Che napoipytyvõveiva’ekue avei.

14Tapeho pemba’ejerure asy pende jára peiporavova’ekuépe penepytyvõ hag̃ua pende jepy’apyha árape.

15Ha umi Israel ñemoñare he’i jevy Ñanderuetépe: Roñemoangaipákuri, ejapo orehegui ndéve iporãve háicha rojeruremínte ndéve oresalva hag̃ua ko árape ko jejopy asyetégui.

16Ha oipe’a hikuái ijapytégui opaite ambue jára gua’u, ha omomba’eguasu jevy hikuái Ñanderuete oikovévape; ha Ñanderuetépe oipy’apy Israel jehasa asykuéra.

17Uperire umi Amon ñemoñare oñembyaty Galaádpe, ha Israel ñemoñarenguéra oñembyaty avei hikuái Mizpápe.

18Ha umi mburuvicha ha Galaadguakuéra he’i joa ojupe: Mávapa omoñepyrũta pe ñorãirõ Amon ñemoñarenguéra ndive. Upe oñepyrũva oikóta mburuvicha ramo Galaadguakuéra ári.

← Chapter 9 Jump to: Chapter 11 →