Judges 12

Guarani 2015 (Ñanderuete Ñe’ẽ Porã 2015)

← Chapter 11 Jump to: Chapter 13 →

1Uperire umi Efraingua oñembyaty ohasa hag̃ua nórte gotýo, ha he’iuka Jeftépe: Mba’érehe piko rehora’e rejeity hag̃ua Amon ñemoñarenguéra ári, ha naorerenóirira’e roho hag̃ua nendive, upévare ore rohapýta ndéve ha nde róga avei.

2Ha Jefte he’i jevy ichupekuéra: Che ha che retãygua roguerekókuri peteĩ ñorãirõ ndetuichaitéva Amon ñemoñarenguéra ndive, ha ore pohenói ramo jepe naorepytyvõséikuri.

3Ahechávo, peẽ nachepytyvõitaha, che amoĩ che rekove che pópe ha aha ajeity hag̃ua Amon ñemoñarenguéra ári, ha Ñanderuete omoĩ ichupekuéra che pópe; ha mba’érehe piko ko’ág̃a peju peñorãirõ hag̃ua chendive.

4Upémaramo Jefte ombyaty mayma kuimba’e Galaadguápe, ha ojeity Efraingua ári; ha umi Galaadgua ipu’aka Efrainguakuéra rehe, ha’ekuéra he’ígui: Peẽ Galaadgua peiko kañyháme Efrain ha Manases apytépe.

5Ha umi Galaadgua omoĩ ipópe pe Jordan ysyry páso ohóva Efrain yvy gotýo; ha ojohu umi Efraingua okañýva ohasase Jordan mboypýri, umi Galaadgua oporandu ichupekuéra: Ndépa Efraingua, ha he’i ichupe: Nahániri.

6Upémaramo he’i ichupe: Eremi, chibolet, ha ha’e he’i sibolet; ndaikatúigui he’i hekoitépe. Upévare Jefte irũnguéra oikuaa porã ha’eha peteĩ Efraingua ha ojuka ichupe Jordan pásope. Upéicha omano 42.000 Efraingua Jordan ysyry pásope.

7Ha Jefte oisãmbyhy Israélpe 6 áño pukukue; ha omano Jefte, pe Galaadgua, ha oñeñotỹ ichupe peteĩ Galaad pegua távape.

8Jefte rire Ibzan, peteĩ Belengua, oisãmbyhy Israélpe.

9Ha’e 30 ita’ýra ha 30 itajýra, ha’e omomendapa ita’ýra ha itajyrakuérape ambue Israel tríbu reheguáre, ha’e oisãmbyhy Israélpe 7 áño pukukue.

10Ha omano Ibzan, ha oñeñotỹ ichupe Belénpe.

11Ha’e rire Elon, peteĩ Zabulongua, oisãmbyhy Israélpe 10 áño pukukue.

12Ha omano Elon, pe Zabulongua, ha oñeñotỹ ichupe Ajalónpe, Zabulon yvýpe.

13Ha’e rire Abdon, Hilel ra’y, peteĩ Piratongua, oisãmbyhy Israélpe,

14kóa 40 ita’ýra ha 30 ita’ýra ra’yre (hemineno) oikóva 70 búrro ári; ha’e oisãmbyhy Israélpe 8 áño pukukue.

15Ha omano Abdon, Hilel, pe Piratongua ra’y, ha oñeñotỹ Piratónpe, Efrain yvýpe, Amalec cérrope.

← Chapter 11 Jump to: Chapter 13 →